ພັກລັດ ໃຊ້ອຳນາດແລະໝ້າທີ່ ຂູດຮີດ ປະຊາຊົນ
ທາງການລາວ ຮັບວ່າ ບໍ່ມີຜູ້ໃດ ກ້າເປີດເຜີຍ ຂໍ້ມູນ ຂອງ ເຈົ້າໜ້າທີ່ ຫຼື ພະນັກງານ ຣັດ ທີ່ສວຍໃຊ້ ອໍານາດ ໃນທາງຜິດ ເໜືອ ກົດໝາຍ
ເຈົ້າໜ້າທີ່ ກະຊວງ ຍຸຕິທັມ ຮັບຮູ້ວ່າ ໃນສັງຄົມລາວ ບໍ່ມີຜູ້ໃດ ກ້າເປີດເຜີຍ ຂໍ້ມູນ ຂອງບຸກຄົນ ທີ່ໃຊ້ອໍານາດ ເໜືອ ກົດໝາຍ ເນື່ອງຈາກ ບໍ່ມີຫລັກຖານ ຄັກແນ່ ຫລື ບໍ່ດັ່ງນັ້ນ ຜູ້ທີ່ຮູ້ຂໍ້ມູນ ກໍໄດ້ຮັບ ຜົນປະໂຫຍດ ນໍາກັນ ດັ່ງນັ້ນ ຈຶ່ງບໍ່ສາມາດ ແກ້ໄຂ ບັນຫາ ດັ່ງກ່າວ ໃຫ້ໝົດໄປໄດ້. ຍານາງ ເວົ້າກ່ຽວກັບ ເຣື່ອງນີ້ ໃນວັນທີ 19 ພຶສຈິກາ ນີ້ວ່າ:
"ທີ່ລາວກໍບໍ່ ປະຕິເສດໄດ້ ຖ້າມີຫຼັກຖານ ຂໍ້ມູນ ຊັດເຈນ ວ່າຄົນນີ້ ໃຊ້ເງິນ ເໜືອກົດໝາຽ ໃຜຈະເປັນຄົນ ຟ້ອງໃຜ ຈະເປັນຄົນສເນີໃຫ້ ມວນຊົນຮູ້ ມັນກໍບໍ່ມີໃຜ. ໃຊ້ອິດທິພົນ ໃຊ້ອໍານາດ ເໜືອກົດໝາຍ ມັນກໍມີ ແຕ່ວ່າໃຜ ຈະເປັນຄົນ ເປີດໂປງ ອັນນີ້ອອກມາ ໃຜຈະເປັນ ຄົນຟ້ອງ ໃຜຈະເປັນ ຄົນສເນີ ແລະ ຈະເອົາຫລັກຖານ ຢູ່ໃສ ມັນບໍ່ມີ ຄົນເຮັດ ແບບນີ້".
ຍານາງ ເວົ້າຕໍ່ໄປວ່າ ເຣື່ອງກົດໝາຍ ບໍ່ມີຜົນສໍາລັບ ຜູ້ມີອໍານາດ ຫລື ຜູ້ມີເງິນ ຢູ່ໃສກໍຄືກັນ ບໍ່ແມ່ນແຕ່ຢູ່ ປະເທດລາວ. ແຕ່ຢູ່ລາວ ທີ່ຜ່ານມາ ຍັງບໍ່ມີ ຜູ້ມາແຈ້ງ ພ້ອມຫລັກຖານ ກ່ຽວກັບ ພວກໃຊ້ອໍານາດ ເໜືອກົດໝາຍ. ໂດຍສ່ວນຕົວແລ້ວ ຄິດວ່າ ຍັງບໍ່ທັນ ມີໃຜກ້າ ເຮັດເຣື່ອງ ດັ່ງກ່າວ.
ໃນຂະນະ ດຽວກັນ ກໍມີຊາວລາວ ໄດ້ສະແດງ ຄວາມເຫັນວ່າ ເປັນເຣື່ອງຍາກ ທີ່ຈະໃຊ້ ກົດໝາຍ ຕໍ່ຜູ້ມີ ອິດທິພົນ ແລະຜູ້ມີເງິນ ໃນສັງຄົມລາວ ໄດ້:
"ສ່ວນຫລາຍ ທີ່ຕໍາຣວດເຮັດ ຜ່ານມາ ຖ້າຜູ້ໃດ ມີໜ້າທີ່ການສູງ ການຈັບ ການກຸມ ການໄສ່ໂທດນີ້ ກໍຍາກ ແບບມີ ລັກສນະເກງໃຈ ໜ່ອຍນຶ່ງ ຄັນຊີ່ເຮັດ ທຽບເທົ່າ ຄືກັບຄົນ ທົ່ວໄປ ກໍຊີ່ບໍ່ຄ່ອຍມີ ປານໃດ ບາງທີ ເຈົ້າໜ້າທີ່ ກໍບໍ່ຄ່ອຍ ຢາກຫຍຸ້ງກ່ຽວນໍາ ປານໃດ ມີປາກົດການ ແບບນີ້ຢູ່".
ເລົາເວົ້າຕື່ມວ່າ ສໍາລັບຢູ່ ສປປລາວ ການໃຊ້ ອໍານາດເງິນ ຫລື ອໍານາດຕໍາແໜ່ງ ໜ້າທີ່ການງານ ເພື່ອໃຫ້ຕົນເອງ ຫລືຜູ້ກ່ຽວຂ້ອງ ໄດ້ພົ້ນຄວາມຜິດ ນັ້ນ ຖືວ່າເປັນ ເຣື່ອງທີ່ບໍ່ອາດ ປະຕິເສດໄດ້ ແລະ ກໍບໍ່ສາມາດ ທີ່ຈະແກ້ໄຂ ໃຫ້ຫລຸດລົງໄດ້ ເຊັ່ນກັນ.
