ເຈົ້າໜ້າທີ່ ທາງການລາວ ບອກວ່າ ການສໍ້ຣາສ ບັງຫລວງ ໃນໜ່ວຍ ພາສີ ມີເພີ້ມຂຶ້ນ
ເຈົ້າໜ້າທີ່ ຈາກກົມພາສີ ທ່ານນື່ງ ທີ່ຂໍສງວນຊື່ ໄດ້ບອກກັບ ນັກຂ່າວວ່າ ປາກົດການ ຫຍໍ້ທໍ້ ໃນໜ່ວຍ ພະນັກງານ ພາສີ ມີທ່າອຽງ ສູງຂື້ນ ໂດຍສະເພາະ ການປະຕິບັດ ໜ້າທີ່ ແບບບໍ່ໂປ່ງໃສ ເຊັ່ນການ ຮັບເອົາສິນບົນ ເພື່ອແລກປ່ຽນ ກັບການຊ່ວຍ ໃຫ້ຫລີກລ່ຽງ ພາສີ ຂອງບັນດາ ພວກປະກອບການ ທຸຣະກິດ ຕ່າງໆ.
ສະພາບການ ທີ່ໜ້າເປັນຫ່ວງນີ້ ບໍ່ສາມາດ ຄວບຄຸມ ປາບປາມໄດ້ ຍ້ອນວ່າ ເຈົ້າໜ້າທີ່ ເກືອບໝົດທຸກຄົນ ຕ່າງກໍ ປະຕິບັດ ໃນທາງທີ່ບໍ່ ຊອບທັມ ຫລາຍຂື້ນ. ທ່ານວ່າການ ສໍ້ຣາສ ບັງຫລວງ ໃນຮູປນີ້ ອົງການ ຕ່າງປະເທດ ໃນລາວ ເຂົາກໍຮູ້ກັນດີ. ສະນັ້ນ ໃນຣາຍງານ ຂອງອົງການ ເພື່ອຄວາມ ໂປ່ງໄສ ນານາຊາຕ ໄດ້ຈັດ ສປປ ລາວ ໃຫ້ຢູ່ໃນ ຣະດັບທີ່ 154 ໃນຈໍານວນ 182 ປະເທດ ທີ່ມີການ ສໍ້ຣາສ ບັງຫລວງ ແລະ ໄດ້ຮັບຄະແນນ ຄວາມເຊື່ອຖື ໃນການລົງທືນ ຂອງຕ່າງຊາຕ 2.2 ຈາກ ຄະແນນ ເຕັມ 10 ຊື່ງເປັນເຣື້ອງ ທີ່ໜ້າເປັນຫ່ວງ ເຮັດໃຫ້ພໍ່ຄ້າ ບໍ່ຢາກມາ ລົງທຶນ ແຕ່ກັບ ກົງກັນຂ້າມ ບໍຣິສັດ ຈາກບາງປະເທດ ທີ່ລົງທຶນ ໃນລາວ ແຮງມັກ ໃຫ້ມີການ ສໍ້ຣາສ ບັງຫລວງ ເພາະມັນເປັນ ວິທີທີ່ຫາ ກໍາໄຣ ໄດ້ງ່າຍ.
ຕ່າງປະເທດ ທີ່ໃຫ້ການ ຊ່ວຍເຫລືອ ສປປລາວ ສ່ວນຫລາຍ ແມ່ນບົນພື້ນຖານ ນະໂຍບາຍ ຢາກໃຫ້ລາວ ພັທນາປະເທດ ເພື່ອໃຫ້ ປະຊາຊົນ ຫລຸດພົ້ນ ຈາກຄວາມ ທຸກຍາກ ແລະ ເພື່ອໃຫ້ການ ເຕີບໃຫ່ຽ ຂອງເສຖກິດ ຢູ່ໃນຣະດັບ ຢ່າງຕໍ່າ 8%.
ທາງການລາວວ່າ ເພື່ອຈະເຮັດໃຫ້ ການເຕີບໃຫ່ຽ ຢູ່ໃນຣະດັບ ນີ້ຕໍ່ໄປ ຕ້ອງໄດ້ຣະດົມ ເງິນຊ່ວຍເຫລືອ ແລະ ການລົງທຶນ ຈາກຕ່າງປະເທດ ໃຫ້ໄດ້ຢ່າງນ້ອຍ 15,300 ລ້ານ ແຕ່ນີ້ ຫາປີ 2015.
