ລາວໂຮມລາວ ເພື່ອປະຊາທິປະໄຕ

ຂໍໃຫ້ບັນດາ ທ່ານ ພີຈາຣະນາຫາຄວາມຖືກຕ້ອງ

ສະບາຍດີ ພໍ່ແມ່ພີ່ນ້ອງ ແລະບັນດາທ່ານທີ່ນັບຖື

ປະເທດລາວໄດ້ເອກຣາຊສົມບຸນ ຕັ້ງແຕ່ວັນທີ 22 ຕຸລາ ປີ 1953. ແລະຮ້ອຍກວ່າປະເທດໃນທົ່ວໂລກຮັບຮູ້ຄວາມເປັນເອກຣາຊຂອງລາວ ແລະ ມີຊື່ໃນອົງການສະຫະປະຊາຊາດ ໃນນັ້ນກໍ່ມີ 14 ປະເທດໃຫ້ສັຕະຍາບັນຄ້ຳປະກັນຄວາມເປັນກາງຂອງພຣະຣາຊອານາຈັກລາວ.
ຢູ່ພາຍໃນປະເທດລາວເອງກໍ່ມີການເຈຣະຈາໂຮມລາວລະຫວ່າງຝ່າຍຂວາ ຝ່າຍກາງ ແລະ ຝ່າຍຊ້າຍ ຄືປີ 1957 ແລະ ປີ 1962 ແລະສຸດທ້າຍ ກໍ່ແມ່ນ ປີ 1973.

ຂໍໃຫ້ຄົນລາວເຮົາ ຢ່າໄດ້ພາກັນເບີ່ງຂ້າມດ້ານກົດຫມາຍ ຄະດີຄວາມຈະລ່ວງເລີຍໄປໄດ້ 30 ປີ ຫລື 50 ປີ ກໍ່ຍັງສາມາດຟື້ນຄືນມາໄດ້ ເພື່ອນຳມາຕັດສິນ ຕອບສນອງຄວາມຍຸຕິທັມແກ່ສັງຄົມ.

ຂພຈ ຂໍໃຫ້ຄຳຄິດເຫັນ ໃນທັສນະທາງກົດຫມາຍ ແລະອີງໃສ່ພື້ນຖານຄວາມຖືກຕ້ອງ ຂອງການໂຮມລາວ ທຸກຝ່າຍໃນປີ 1973.
ໃນການສ້າງສັນຕິພາບຮ່ວມວົງສາຄານະຍາດ ເພື່ອການໂຮມລາວຢ່າງແທ້ຈີງແລະເພື່ອຄວາມ ສງົບສຸຂຂອງປະຊາຊົນລາວໃນທົ່ວປະເທດ ລາວທຸກຝ່າຍ ມີຄວາມດີໃຈເຫັນພ້ອມນຳກັນ ແລະໄດ້ຈັດຕັ້ງຣັຖບານປະສົມຊວ່າຄາວຂື້ນໃນວັນທີ 21 ກຸມພາ ປີ1973. ເພື່ອຮ່ວມກັນສ້າງສາປະເທດຊາດ ປ່ອຍໃຫ້ປະຊາຊົນລາວໄດ້ຢູ່ເຢັນເປັນສຸຂ.

ແຕ່ພັກປະຊາຊົນປະຕິວັດລາວທຳລາຍຄວາມປຣາຖນາຂອງປະຊາຊົນລາວທັງຊາດ ພວກເຂົາໄດ້ໂຄ່ລົ້ມຣັຖບານປະສົມທີ່ຖືກຕ້ອງຕາມກົດຫມາຍ ຂອງລາວແລະສາກົນ ໃຫ້ມຸ່ນທະລາຍລົງ ແລະລົບລ້າງຣາຊບັນລັງ ດ້ວຍການໃຊ້ອຳນາດ ຜະເດັດການບັງຄັບໃຫ້ເຈົ້າ ສີສວ່າງວັທນາ ສຣະຣາຊບັນລັງ.

ຖ້າເວົ້າຕາມແງ່ກົດຫມາຍ ພັກປະຊາຊົນປະຕິວັດລາວຕັ້ງຂື້ນມາຕາມລຳພັງ ໃນລັກສະນະ ພວກກໍ່ການຮ້າຍ, ແລະກໍ່ບໍ່ໄດ້ຈົດທະບຽນເປັນທາງການໃຫ້ຖືກຕ້ອງຕາມກົດຫມາຍ ຂອງພຣະຣາຊອານາຈັກລາວ ເພື່ອຮັບໃຊ້ປະຊາຊົນລາວ, ກົດຫມາຍລາວ ແລະປະຊາຊົນລາວຍັງບໍ່ຮັບຮູ້.
ເຖີງແມ່ນວ່າ ທ່ານ ໄກສອນ ພົມວິຫານ ເປັນເລຂາພັກມີອຳນາດຜູກຂາດເຕັມໂຕ ມີການຮັບຮູ້ ແລະຊີ້ນຳໂດຍກົງ ຈາກພັກຄອມມຸນິດວຽດນາມ ທີ່ນຳໂດຍ ທ່ານ ໂຮ່ຈິມີນ ຊື່ງພວກເຂົາມີແຜນລວງຮ່ວມກັນຕັ້ງ ພັກປະຊາຊົນປະຕິວັດລາວຂື້ນມາແມ່ນ ເພື່ອຕັດຫນ້າຂະບວນການ ລາວອິສຣະ ຫລືເອີ້ນອີກວ່າ ຂະບວນການແນວລາວຮັກຊາດ ຊື່ງນຳໂດຍ ເຈົ້າສຸພານຸວົງ.
ທ່ານ ໂຮ່ຈີມີນ ຊື່ງເປັນປະທານປະເທດວຽດນາມເຫນືອ ໃນເວລານັ້ນ ໄດ້ກະທຳຜິດລ່ວງລະເມີດກົດຫມາຍສາກົນ ກໍ່ຄືກົດຫມາຍລະຫວ່າງຊາດ ໂດຍເຂົ້າແຊກແຊງກິຈການພາຍໃນ ການເມືອງຂອງລາວແລະສ້າງຄວາມປັ່ນປ່ວນໃນປະເທດລາວ.

ການທີ່ພັກປະຊາຊົນປະຕິວັດລາວຕັ້ງປະເທດແລະປ່ຽນຊື່ ເປັນສາທາລະນະລັດ ປະຊາທິປະໄຕປະຊາຊົນລາວ ໃນວັນທີ 2 ທັນວາ ປີ 1975 ແລະພາກັນນຸ່ງສູ່ດ ຜຸກກາ ຣະຫວັດ ມັດເນັກທາຍໂກ້ເກ້ ມາໃນຄາບຜູ່ດີ ນັ່ງຄຸມອຳນາດມາໄດ້ 37 ປີ ແຕ່ກໍ່ຫນີບໍ່ພົ້ນຈາກການເປັນໂຈນ ກໍ່ຄືຄາຕະກອນ ທີ່ມີຄະດີອາຍາຕິດຢູ່ ຮອດດຽວນີ້ ເຖີງແມ່ນວ່າ ພັກປະຊາຊົນປະຕິວັດລາວຈະບັງຄັບປະຊາຊົນລາວຮ້ອງໂຮໂຄສະນາສເລີມສລອງພາກັນຟ້ອນຕ້ອນຮັບ ວັນທີ 2 ທັນວາ ທຸກປີກໍ່ຕາມ, ເວົ້າທາງຫລັກກົດຫມາຍກໍ່ຖືວ່າ ພັກປະຊາຊົນປະຕິວັດລາວ ຍັງຜິດກົດຫມາຍອາຍາຄືເກົ່າ ອ້າປາກຂື້ນຍາມໃດ ຜິດຍາມນັ້ນ ຜິດແຕ່ເຊົ້າຮອດຄ່ຳ ເພາະວ່າພັກປະຊາຊົນປະຕິວັດລາວ ເປັນພັກການເມືອງເຖື່ອນ ກໍ່ຄືກຸ່ມມກໍ່ການຮ້າຍ ທຳການກະບົດທໍຣະຍົດມ້າງເພຕໍ່ຄວາມຖືກ ຕ້ອງປອງດອງຊາດ ຂອງຄົນລາວ. ໂດຍອາໃສກຳລັງທະຫານວຽດນາມເຫນືອຫນຸນຫລັງໃຫ້ການສນັບສນຸນເຂົ້າຢືດອຳນາດ ຈາກຣັຖບານປະສົມທີ່ຖືກຕ້ອງຕາມກົດຫມາຍ. ພ້ອມດຽວກັນນັ້ນ ກໍ່ຈັບເຈົ້າ ສີສວ່າງວັທນາ ອັກຂະມະເຫສີ ອົງມຸງກຸດ ແລະພະຍາດຕິວົງ ພ້ອມທັງບັນດາຄະນະຣັຖບານປະສົມ ບັນດານາຍແລະພົນທະຫານ ນາຍແລະພົນຕຳລວດ ແລະບັນດາ ຂ້າຣາຊການຊັ້ນຜູ່ໃຫຍ່ ໃນແຕ່ລະກະຊວງ ເຈົ້າເມືອງ ເຈົ້າແຂວງ ຢ່າງຫລວງຫລາຍເຖີງ 85 000 ຄົນ ໄປເຂົ້າຄຸມຂັງທີ່ສຸນສັພະທຸກ ຊື່ງພວກເຂົາເອີ້ນວ່າ ສຸນສຳມະນາ ປ່ອຍໃຫ້ຕາຍຢ່າງທໍຣະມານ ແລະບໍ່ອະນຸຍາດໃຫ້ບັນດາ ອົງການສິດທິມະນຸດ ຫລືອົງການສາກົນໃດໆເຂົ້າໄປຫຍຸ້ງກ່ຽວ.
ຕໍ່ເຫດການດັ່ງກ່າວນີ້ ໃນທາງກົດຫມາຍອາຍາຖືວ່າ ພັກປະຊາຊົນປະຕິວັດລາວ ມີຄວາມຜິດຢ່າງມະຫັນ ແລະເປັນການລະເມີດກົດຫມາຍພື້ນຖານ ສີດທິມະນຸດ ແລະກົດຫມາຍ ສາກົນຢ່າງຮ້າຍແຮງ.
ໃນສາຍຕາຂອງປະຊາຊົນລາວ ແລະຊາວໂລກ ມອງເຫັນວ່າ ຣັຖບານປະສົມທີ່ຕັ້ງຂື້ນມາ ຢ່າງຖືກຕ້ອງຕາມກົດຫມາຍ ໄດ້ຖືກໂຄ່ນລົ້ມຈາກພວກກຸ່ມກໍ່ການຮ້າຍໂຈນກະບົດ.

ພວກເຮົາມາໂຮມກັນວັນນີ້ໃນນາມປະຊາຊົນລາວ ຢູ່ພາຍໃນປະເທດ ແລະໃນທຸກບ່ອນ ທົ່ວທຸກມຸມໂລກ ແມ່ນເພື່ອທວງເອົາຄວາມຍຸຕິທັມ ແລະສີດທິພື້ນຖານຄືນມາໃຫ້ປະຊາຊົນລາວ ທີ່ເປັນເຈົ້າຂອງປະເທດ ແລະພ້ອມທັງສະແດງຄວາມໂສກເສົ້າເສັຽໃຈ ແລະປະທ້ວງ ທັງປະນາມກຸ່ມກໍ່ການຮ້າຍ ທີ່ເປັນໂຈນກະບົດປຸ້ນອຳນາດຈາກຣັຖບານປະສົມທີ່ຖືກຕ້ອງຕາມກົດຫມາຍ.
ວັນທີ 2 ທັນວາ ເປັນວັນທີ່ປະຊາຊົນລາວທົ່ວປະເທດ ເສັຽເອກຣາຊອັນສົມບຸນ ພ້ອມອະທິປະໄຕແລະຜືນແຜ່ນດີນອັນຄົບຖ້ວນ ເຮັດໃຫ້ລາວກາຍເປັນປະເທດເຄີ່ງເອກຣາຊ ທັງຫາງກົງແລະທາງອ້ອມ.

ພວກເຮົາປະຊາຊົນລາວ ໃນທົ່ວໂລກ ທວງໃຫ້ບັນດາປະເທດມະຫາອຳນາດ ທີ່ເຄີຍຄ້ຳປະກັນໃຫ້ສັຕຍາບັນຄວາມເປັນເອກຣາຊ ແລະຄວາມເປັນກາງຂອງພຣະຣາຊອານາຈັກລາວ ຈົ່ງນຳເອົາຄະດີຄວາມທາງກົດຫມາຍອາຍາ ທີ່ພັກປະຊາຊົນປະຕິວັດລາວ ໄດ້ກະທຳຜີດຕໍ່ການໂຮມລາວ ເພື່ອຄວາມຖືກຕ້ອງປອງດອງຊາດພາຍໄຕ້ຣັຖບານປະສົມໃນປີ 1973,
ຕ້ອງເອົາເລື້ອງນີ້ ຂື້ນມາຖົກຖຽງໃນເວທີສາກົນ ແລະຂໍໃຫ້ນຳເອົາຄະດີ ດັ່ງກ່າວ ສເນີຟ້ອງຕໍ່ສານສູງສຸດຂອງສະຫະປະຊາຊາດ ທີ່ ເຮັກສ໌.

ຂໍໃຫ້ທຸກທ່ານຢືນຂື້ນທຳຄວາມສງົບນື່ງວິນາທີ ເພື່ອໄຫ້ວອາໄລເຖີງດວງວິນຍານຂອງ ບັນພະບຸຣຸດລາວ ທີ່ເສັຽຊີວີດໃນສຸນກັກຂັງ ແຕ່ເຫນືອຕລອດໄຕ້ ແລະຫລາຍຫມື່ນຄົນທີ່ຕາຍຫາຍສາບສຸນຕາມສາຍແມ່ນຳຂອງ ຢ່າງເວທນາ.

ຂໍໃຫ້ຊາດລາວ ແລະປະຊາຊົນລາວຈົ່ງຫມັ້ນຍືນ
ຂໍໃຫ້ຜະເດັດການພັງທະລາຍຍ້າຍອອກໄປ ປະຊາທິປະໄຕຍ໌ ກັບຄືນມາ
ຂໍອາຣາທນາ ຄຸນພຣະພຸດ ພຣະທັມ ພຣະສົງ ຈົ່ງປົກປັກຮັກສາຄຸ້ມຄອງ ພວກທ່ານ ແລະປະຊາຊົນລາວທັງຊາດດ້ວຍເຖີດ