ນ້ຳເຊກອງ ແລະ ນໍ້າເຊກະໝານ ເປັນມົລພິດ ປົນເປື້ອນ ໄປກັບ ສາຣເຄມີ ທີ່ໃຊ້ລ້າງ ແຮ່ທາດ ຈາກການຂຸດຄົ້ນ ຂອງບໍຣິີສັດຈີນ ແລະ ວຽດນາມ.
ນັກສິ່ງແວດລ້ອມ ທ່່ານນື່ງ ເປີດເຜີຍວ່າ ຊາວບ້ານ ທີ່ແຂວງ ເຊກອງ ແລະ ອັດຕະປື ກຳລັງ ເດືອດຮ້ອນ ຍ້ອນມົລພິດ ໃນແມ່ນ້ຳເຊກອງ ແລະ ນໍ້າເຊກະໝານ ປະຊາຊົນ ເຂົ້າໃຈວ່າ ສາເຫດ ຕ້ອງມາຈາກ ການຂຸດຄົ້ນແຮ່ທາດ ຕາມແຄມນ້ຳ ຂອງ ບໍຣິສັດຈີນ ແລະ ວຽດນາມ. ທ່ານເວົ້າວ່າ:
"ນ້ຳມັນເປື້ອນ ເພາະໃນຍາມແລ້ງ ພວກ ບໍຣິສັດຈີນ ຄົນວຽດນາມ ມາຂຸດຄຳນະ ມັນມີຄຳຫລາຍ ນ້ຳປະປາ ທີ່ຊາວບ້ານໃຊ້ ໃນແຖວນັ້ນ ເຂົາກໍຢ້ານ ຢູ່ໂຕເມືອງ ເຊກອງ ເມືອງອັດຕະປື".
ທ່ານເວົ້າ ຕໍ່ໄປວ່າ ຈາກການ ເກັບກຳຂໍ້ມູນ ເບື້ອງຕົ້ນພົບວ່າ ບໍຣິເວນ ແຄມແມ່ນ້ຳເຊກອງ ແລະ ເຊກະໝານ ມີບໍຣິສັດ ຕ່າງຊາດ ຫລາຍບໍຣິສັດ ເຂົ້າມາຂຸດຄົ້່ນ ແຮ່ທາດ ເຊັ່ນບອກໄຊຕ໌ ເຫລັກ ແລະ ຄຳ ພ້ອມທັງໃຊ້ນ້່ຳ ໃນແມ່ນ້ຳລ້າງ ແຮ່ທີ່ຂຸດໄດ້ ຈົນເຮັດໃຫ້ ນ້ຳເຊກອງ ແລະ ເຊກະໝານ ປ່ຽນເປັນສີແດງ. ບາງບໍຣິສັດ ກໍຂຸດຄົ້ນ ແບບຖືກຕ້ອງຕາມ ກົດຣະບຽບ ແຕ່ຍັງມີ ຫລາຍບໍຣິສັດ ຂຸດຄົ້ນ ໂດຍບໍ່ໄດ້ຮັບ ອະນຸຍາດ ຈາກຣັຖບານ ແລະ ທາງການກໍບໍ່ມີ ການກວດກາ ແຕ່ຢ່າງໃດ.
ຊາວບ້ານສ່ວນໃຫຍ່ ຈະດື່ມ ແລະໃຊ້ນ້ຳ ໃນແມ່ນ້ຳ ສອງສາຍນີ້ ແລະ ທາງການ ກໍຈະປັ່ນນ້ຳ ຈາກແມ່ນ້ຳ ສອງສາຍນີ້ ໃຫ້ເປັນນ້ຳປະປາ ສຳລັບ ປະຊາຊົນ ໃນເຂດ ໂຕເມືອງ ແລະ ນ້ຳປະປາ ໃນບາງມື້ ມີສີຜິດ ປົກກະຕິ ຊາວບ້ານ ກໍມີຄວາມຢ້ານ ທີ່ຈະດື່ມ ຫຼືໃຊ້.
ທ່ານວ່າ ນອກຈາກ ຈະສົ່ງຜົລກະທົບ ຕໍ່ຊາວບ້ານໃນ 2 ແຂວງນີ້ແລ້ວ ຊາວກຳພູຊາ ທີ່ໃຊ້ນ້ຳ ຈາກແມ່ນ້ຳເຊກອງ ກໍຍັງໄດ້ຮັບ ຜົລກະທົບ ນຳອີກ ຊາວບ້ານ ຈື່ງຢາກໃຫ້ ຣັຖບານ ເຂົ້າມາແກ້ໄຂ ບັນຫາ ດັ່ງກ່າວນີ້ ຢ່າງຮີບດ່ວນ.
