ສານລາວ ສັ່ງຍຶດ ຊັພສົມບັດ ຂອງ ບໍຣິສັດ Sanum ທີ່ມີມູນຄ່າ ເຖິງ 6 ລ້ານ ດອນລ່າ ສະຫະຣັຖ.
ເມື່ອວັນທີ່ 12 ເດືອນ 12 ປີ 2012 ນີ້ ສານປະຊາຊົນ ພາກກາງ ຄະນະສານ ການຄ້າ ຂັ້ນອຸທອນ ຂອງລາວ ໄດ້ຕັດສິນ ອະນຸຍາດ ໃຫ້ ຣັຖບານລາວ ຍຶດ ຊັພສິນ ຂອງ ບໍຣິສັດ ສະໜໍາ (Sanum) ຊຶ່ງເປັນ ບໍຣິສັດ ລົງທຶນ ໂຮງກາສິໂນ ຢູ່ລາວ. ຊັພສິນ ທີ່ຖືກຍຶດ ເທື່ອນີ້ ມີມູນຄ່າ ທັງໝົດ ເຖິງ 6 ລ້ານ ດອນລ່າ ສະຫະຣັຖ ຊຶ່ງສ່ວນຫລາຍ ແລ້ວ ແມ່ນເຄື່ອງຈັກ ຫລິ້ນກາສີໂນ ຢູ່ທ່ານາແລ້ງ ນະຄອນຫລວງ ວຽງຈັນ.
ກ່ຽວກັບເຣື່ອງນີ້ ຂ້າພະເຈົ້າ ໄດ້ໂທຣະສັບ ໄປຖາມ ຣາຍລະອຽດ ເພິ້ມຕື່ມກັບ ທ່ານ ວຽງສວັນ ພັນທະລີ ທະນາຍຄວາມ ຂອງ ບໍຣິສັດ ສະໜໍາ ອິນແວສມັ້ນ ເປັນບໍຣິສັດ ຈາກມາເກົ້າ ປະເທດຈີນ ວ່າເປັນຫຍັງ ສານລາວ ຈຶ່ງຕັດສິນ ຍຶດ ຊັພສິນ ຂອງ ບໍຣິສັດ ສະໜໍາ. ທ່ານ ວຽງສວັນ ພັນທະລີ ຕອບພຽງແຕ່ວ່າ:
"ພວກເຮົາ ກໍບໍ່ສາມາດ ເປີດເຜີຍ ແນວໃດໄດ້ ເພາະພວກເຮົາ ເຮັດວຽກ ບົນພື້ນຖານ ຈັນຍາບັນ ທະນາຍຄວາມ ກໍຄືຮັກສາ ຂໍ້ມູນ ຄວາມລັບ ຂອງລູກຄວາມ ທຸກຢ່າງຫັ່ນນ໋າ ໂຕນີ້ພວກເຮົາ ບໍ່ສາມາດ ມີຄວາມເຫັນ ແລະ ກໍບໍ່ສາມາດ ໃຫ້ຄຳຕອບ ດຽວລູກຄວາມ ເຮົາກະຊິ ຕ້ອງຕິ ມັນອາດຈະມີ ບັນຫາ."
ຫລັງຈາກນັ້ນ ຂ້າພະເຈົ້າ ກໍໄດ້ຕິດຕໍ່ ໄປເຖິງຫ້ອງການ ຂອງ ບໍຣິສັດ ສະໜໍາ ຢູ່ລາວ ແລະ ໄດ້ຮັບຄຳຕອບວ່າ ເຈົ້າໜ້າທີ່ ທີ່ເວົ້ານຳນັ້ນ ບໍ່ມີໜ້າທີ່ ຈະເວົ້າ ກ່ຽວກັບ ເຣື່ອງນີ້ ສ່ວນຫ້ອງການ ຂອງ ບໍຣິສັດ ດັ່ງກ່າວ ຢູ່ ກຳພູຊາ ປະກົດວ່າ ບໍ່ມີຜູ້ໃດຮັບ ໂທຣະສັບ ເລີຍ.
ແຕ່ເຖິງຢ່າງໃດ ກໍດີ ບໍຣິສັດ ສະໜໍາ ເອງໄດ້ອອກ ໃບແຈ້ງການວ່າ ຣັຖບານລາວ ຍຶດເອົາ ຊັພສົມບັດ ຂອງ ນັກລົງທຶນ ຕ່າງປະເທດ ເພາະ ບໍຣິສັດ ນັ້ນບໍ່ຍອມ ຈ່າຍອາກອນ ໃຫ້ແກ່ຣັດ ແຕ່ບໍຣິສັດ ສະໜໍາ ເວົ້າວ່າ ອາກອນ ນັ້ນເປັນອາກອນ ທີ່ບໍ່ຖືກຕ້ອງ ເປັນທັມ.
ໃບແຈ້ງການ ຂອງ ບໍຣິສັດ ສະໜໍາ ຂຽນອີກວ່າ ຄະນະສານອຸທອນ ຂອງລາວ ທີ່ມີສາມຄົນ ໄດ້ຕັດສິນ ສັ່ງຍຶດຊັບສົມບັດ ຂອງ ບໍຣິສັດ ສະໜໍາ ໂດຍທີ່ ທາງສານ ບໍໄດ້ແຈ້ງໃຫ້ ບໍຣິສັດ ສະໜໍາ ຮູ້ລ່ວງໜ້າ ແລະ ກໍເປັນການ ພິຈາຣະນາ ຕັດສິນ ແຕ່ຝ່າຍດຽວ ບໍຣິສັດ ສະໜໍາ ບໍ່ມີໂອກາດ ໄດ້ຕໍ່ສູ້ຄະດີ ເລີຍ.
ຄະນະ ຜູ້ພິພາຄສາ ໃຫ້ເຫດຜົນວ່າ ສານຕັດສິນ ຍຶດຊັພສິນ ຂອງ ບໍຣິສັດ ສະໜໍາ ກໍເພື່ອຮັກສາ ຜົນປະໂຫຍດ ຂອງ ຣັຖບານລາວ ຊັພສິນ ເຫລົ່ານັ້ນ ປະກອບດ້ວຍ ເຄື່ອງຈັກ ຫລິ້ນ ກາສິໂນ (Slot machines) ຫລາຍຮ້ອຍເຄື່ອງ ຈາກໂຮງກາສິໂນ ທ່ານາແລ້ງ ໃກ້ໆກັບຫົວຂົວ ມິຕພາບ ລາວ-ໄທ ແຫ່ງທີ່ນຶ່ງ.
ຣັຖບານລາວ ອ້າງວ່າ ຈຳເປັນຕ້ອງ ຍຶດຊັພສິນ ເພາະບໍຣິສັດ ສະໜໍາ ບໍ່ຍອມໃຊ້ຄ່າ ປັບໃໝ ເປັນເງິນຈຳນວນ 5 ລ້ານດອນລ່າ ແຕ່ທາງ ບໍຣິສັດ ສະໜໍາ ເວົ້າວ່າ ຄ່າປັບໃໝ ທີ່ວ່ານັ້ນ ເປັນຄ່າປັບໃໝ ທີ່ບໍ່ຖືກຕ້ອງ ເປັນທັມ ບໍ່ມີເຫດຜົນ.
