ປະຊາຊົນ ທີ່ຖືກຍ້າຍ ອອກຈາກ ບໍຣິເວນ ໂຄງການ ເຂື່ອນ ນໍ້າງື່ມ-2 ໄປຢູ່ ເມືອງເຟືອງ ໄດ້ເກືອບ 2 ປີ ມາແລ້ວນັ້ນ ເທົ້າປານນີ້ ຍັງບໍ່ໄດ້ຮັບ ທີ່ດິນ ສໍາລັບ ທໍາຢູ່ທໍາກິນ ຕາມທີ່ ທາງການ ໄດ້ຕົກລົງ ໄວ້ນັ້ນ. ຕາມຄໍາເວົ້າຂອງກັມມາທິການ ບັນດາ ຊົນເຜົ່າ ປະຈໍາ ສະພາແຫ່ງຊາຕ ເມື່ອບໍ່ດົນ ມານີ້.
ຊາວບ້ານຈາກ 16 ບ້ານ ທີ່ຍ້າຍໄປຢູ່ ທີ່ດິນຈັດສັນ ເຂດເມືອງເຟືອງ ແຂວງວຽງຈັນ ປັດຈຸບັນ ມີທີ່ດິນ ທໍາຢູ່ທໍາກິນ ຄອບຄົວລະ ເຄິ່ງເຮັກຕາ ເທົ່ານັ້ນ ແທນທີ່ຈະແມ່ນ ຢ່າງນ້ອຍ 1 ເຮັກຕາ ຕາມທີ່ທາງການ ແລະ ບໍຣິສັດ ລົງທືນ ໄດ້ຕົກລົງໄວ້ ກັບຊາວບ້ານ. ຊາວບ້ານເຫລົ່ານີ້ ໄດ້ຍ້າຍໄປຢູ່ ດິນຈັດສັນ ເຂດ ເມືອງເຟືອງ ຕັ້ງແຕ່ທ້າຍປີ 2010. ການທໍາມາ ຫາກິນ ຍັງຫຍຸ້ງຍາກ ລໍາບາກຢູ່ ຍ້ອນທີ່ດິນ ທີ່ຈັດໃຫ້ ແຕ່ລະ ຄອບຄົວນັ້ນ ໜ້ອຍໂພດ ປູກຫຍັງ ກໍບໍ່ໄດ້ພຽງພໍ ຈື່ງຢາກໃຫ້ ທາງການ ກ່ຽວຂ້ອງ ເອົາໃຈໃສ່ຕື່ມ.
ໂຄງການ ເຂື່ອນນໍ້າງື່ມ-2 ທີ່ມີ ສາມາດຜລິດ ໄຟຟ້າໄດ້ 615 MW ໄດ້ສົ່ງໄຟຟ້າ ໄປຂາຍ ໃຫ້ປະເທດໄທ ຕັ້ງແຕ່ປີ 2011 ເປັນຕົ້ນມາ. ຕາມຂໍ້ມູນ ຈາກກະຊວງ ພະລັງງານ ແລະ ບໍ່ແຮ່ ແຈ້ງວ່າ ໂຄງການ ເຂື່ອນ ມີຜູ້ຮ່ວມທືນ ນໍາກັນ 6 ຫຸ້ນ. ຜູ້ທີ່ຖືຫຸ້ນໃຫ່ຽ ໄດ້ແກ່ ໄຟຟ້າລາວ ບໍຣິສັດ ຊໍການຊ່າງ ແລະ ບໍຣິສັດ ຣາຊບູຣີ. ປະຊາຊົນ ທີ່ໄດ້ຮັບ ຜົນກະທົບ ມີທັງໝົດ 6,234 ຄົນ 1,099 ຄອບຄົວ. ຣາຍງານ ການສືກສາ ຜົນກະທົບ ຕໍ່ສັງຄົມ ແລະ ສິ່ງແວດລ້ອມ ແຈ້ງວ່າ ການສ້າງເຂື່ອນ ໃສ່ນໍ້າງື່ມ ຈະຕັນທາງ ຂື້ນແລະລົງ ຂອງໝູ່ປາ ຊື່ງຊາວບ້ານ ຫລາຍໝື່ນຄົນ ອາໄສ ເປັນອາຫານ ລ້ຽງຊີບ.
