ເຈົ້າຫນ້າທີ່ ກະຊວງ ພລັງງານ ແລະ ບໍ່ແຮ່ ທ່ານນື່ງເວົ້າວ່າ ການກໍສ້າງ ເຂຶື່ອນ ໄຟຟ້າ ນ້ຳຄານ 2 ທີ່ແຂວງ ຫລວງພຣະບາງ ໄດ້ບັນລຸ ວຽກງານຫລາຍຢ່າງ ໄປແລ້ວ ແລະ ກຳລັງດຳເນີນ ການກໍ່ສ້າງ ບ້ານຈັດສັນ ໃຫ້ຊາວບ້ານ ຜູ້ທີ່ຕ້ອງໄດ້ ໂຍກຍ້າຍ ຄາດວ່າ ຈະສຳເຣັດ ພາຍໃນເດືອນ ມີນາ ປີນີ້. ດັ່ງທ່ານ ກ່າວວ່າ:
"ເຈົ້າແມ່ນແລ້ວ ຂະເຈົ້າຊີ່ ກຳລັງແລ້ວ ດຽວນີ້ຂະເຈົ້າ ກຳລັງ ປະຕິບັດ ກຳລັງກໍ່ສ້າງ ກຳລັງ ກໍ່ສ້າງຢູ່ ຂັ້ນຕອນຫັ້ນ ກຳລັງ ເກັບກຳ ຜົລກະທົບ ຂອງ ປະຊາຂົນ ຫັ້ນແຫລະ".
ຈາກການເກັບກຳ ຂໍ້ມູນ ຂອງໂຄງການ ພົບວ່າ ຈະມີ 523 ຄອບຄົວ ຈາກ 7 ຫມູ່ບ້ານ ໃນເມືອງຊຽງເງິນ ແລະ ເມືອງພູຄູນ ທີ່ຈະໄດ້ຮັບ ຜົລກະທົບ ຈາກໂຄງການ ເຂື່ອນນໍ້າຄານ 2 ນີ້ ຊື່ງເວລານີ້ ທາງໂຄງການ ໄດ້ໂຍກຍ້າຍ ຊາວບ້ານ ຈຳນວນ 114 ຄອບຄົວ ຈາກບ້ານໜອງດີ ແລະ ບ້ານສະມຸຸ່ຍ ເມືອງຊຽງເງິນ ໄປຢູ່ບ້ານ ໜອງຊ້າງເຜືອກ ທີ່ເປັນບ້ານ ຈັດສັນ ແຫ່ງໃຫມ່ ສ່ວນເຫລືອ 5 ຫມູ່ບ້ານ ມີແຜນວ່າຈະ ໂຍກຍ້າຍ ໃຫ້ຫມົດ ໃນເດືອນ ມີນາ ປີນີ້.
ທ່ານວ່າ ນອກຈາກວຽກງານ ໂຍກຍ້າຍແລ້ວ ວຽກງານອື່ນໆ ອີກທີ່ໃກ້ ຈະສຳເຣັດ ກໍແມ່ນ ການສ້າງຖນົນ ເຂົ້າໄປໃນ ໂຄງການ ຊື່ງໃນປັດຈຸບັນ ສຳເຣັດແລ້ວ 96% ແລະ ວຽກງານ ກໍ່ສ້າງອື່ນໆ ກໍ່ກຳລັງ ດຳເນີນງານ ໄປພ້ອມໆກັນ ຄາດວ່າ ການກໍໍ່ສ້າງ ເຂື່ອນນ້ຳຄານ 2 ຈະໃຫ້ແລ້ວ ພາຍໃນປີ 2015.
ເຂື່ອນໄຟຟ້າ ນ້ຳຄານ 2 ຈະຜລິດໄຟຟ້າ ໄດ້ປະມານ 130 ເມກາວັດ ສ້າງໂດຍ ບໍຣິສັດ Sinohydro ຂອງຈີນ ໃນມູນຄ່າ ການກໍສ້າງ ປະມານ 308 ລ້ານໂດລາ ສະຫະຣັດ ໄດ້ເລີິ້ມການ ກໍ່ສ້າງ ມາແຕ່ເດືອນ ພຶສຈິກາ ປີ 2011.
