ປະຊາຊົນ ລາວ ບໍ່ພໍໃຈ ຕໍ່ການໃຊ້ ອຳນາດ ເກີນຂອບເຂດ ຂອງເຈົ້າຫນ້າທີ່ ຕຳຣວດລາວ.
ຊາວລາວ ທີ່ ນະຄອນຫລວງ ວຽງຈັນ ທ່ານນື່ງ ເວົ້າວ່າ ຄົນລາວ ສ່ວນໃຫຍ່ ບໍ່ພໍໃຈ ຕໍ່ການເຮັດວຽກ ຂອງ ເຈົ້າຫນ້າທີ່ ຕຳຣວດ ເພາະຂົ່ມຂູ່ ປະຊາຊົນ ແລະ ປະຊາຊົນ ກໍບໍ່ສາມາດ ຮ້ອງຮຽນ ຫຼືຕໍ່ວ່າໄດ້ ຍ້ອນວ່າ ບໍ່ມີຜູ້ໃດ ກ້າທີ່ຈະ ຮວບຮວມ ຫລັກຖານ ໄປຟ້ອງຮ້ອງໄດ້. ຄົນລາວຜູ້ນີ້ ເວົ້າວ່າ:
"ຄັນຊີ່ເວົ້າໄປ ຢູ່ລາວເບີ່ງຄື ປະຊາຊົນ ບໍ່ມີສິດ ຟ້ອງຮ້ອງ ພະນັກງານຣັຖ ເພາະວ່າ ເຂົາເປັນຄົນ ເຮັດເອກສານ ທຸກຢ່າງ ເຂົາເປັນຄົນ ລາຍງານ ຄັນມາເວົ້າຊື່ງຫນ້າກັນ ເປັນຫຍັງກໍວ່າ ຂະເຈົ້າຖືກ ຂໍ້ມູນຫລັກຖານ ມີຫມົດ ເຂົາກໍຊອກ ຂໍ້ຫາ ສົມມຸດ ວ່າເຮົາເວົ້າຖືກ ເຂົາກໍຊອກ ມາແກ້ເຮົາ ເວົ້າປີ້ນໄປ ປີ້ນມາ ສີ່ແບບຕັ້ງຂໍ້ຫາ ລອຍໆໃສ່ເຂົາ".
ທ່ານກ່າວ ຕໍ່ໄປວ່າ ສ່ວນໃຫຍ່ ບັນຫາທີ່ເກີດຂື້ນ ແມ່ນການຂົ່ມຂູ່ ແມ່ຄ້າ ໃນຕລາດ ແລະ ບາງຄັ້ງພໍ່ຄ້າແມ່ຄ້າ ບາງຄົນ ກໍບໍ່ປະຕິບັດ ຕາມກົດຣະບຽບ ທາງການ ແຕ່ກໍຄວນໃຫ້ ການຕັກເຕືອນ ບໍ່ແມ່ນຈະຂູ່ ແລະ ຢຶດສິນຄ້າ ຫລື ປັບໄຫມ ຂະເຈົ້າໂລດ. ເຈົ້າຫນ້າທີ່ ຕຳຣວດ ຈາຣະຈອນ ກໍຄອຍຈັບຄົນ ຂີ່ຣົຖ ແລະ ໃຫ້ຈ່າຍຄ່າ ປັບໄຫມ ແບບບໍ່ຂຽນ ໃບແຈ້ງຈັບ ວ່າຜິດກົດ ຂໍ້ໃດ ມີແຕ່ເວົ້າເອົາ ວ່າຜິດຕ້ອງຈ່າຍ.
ກົມຕຳຣວດ ແຫ່ງຊາດ ກໍຖືກຮ້ອງຂໍ ຄວາມເປັນທັມ ແລະ ສະພາແຫ່ງຊາດ ກໍຮູ້ກ່ຽວກັບ ເຣື້ອງນີ້ ແຕ່ບໍ່ມີຂໍ້ມູນ ຫລັກຖານ ມາອ້າງອິງວ່າ ພະນັກງານຣັຖ ໃຊ້ອຳນາດ ເກີນຂອບເຂດ. ເຈົ້າຫນ້າທີ່ ນາງນຶ່ງ ເວົ້າວ່າ:
"ຕົວນີ້ກໍຍັງ ບໍ່ທັນມີຂໍ້ມູນ ຕົວຈິງ ມີການ ເວົ້າຕໍ່ກັນຊື່ໆ ຕົວນີ້ບໍ່ທັນມີ ຂໍ້ມູນວ່າ ເຈົ້າຫນ້າທີ່ ເຮັດແນວໃດ ຂໍ້ມູນ ຕົວຈີງວ່າໃຊ້ ອຳນາດແບບໃດ ບາງເທື່ອປະຊາຊົນ ກໍດື້ ບໍ່ມີ ຫລັກຖານ ສາມາດເອົາໄດ້".
ນາງກ່າວ ຕໍ່ໄປວ່າ ບັນຫາທີ່ເກີດຂື້ນ ບໍ່ສາມາດ ປະຕິເສດໄດ້ວ່າ ບໍ່ເປັນຄວາມຈີງ ແຕ່ການທີ່ ຈະລົງໂທດ ຜູ້ກະທຳຜິດ ຕ້ອງມີຫລັກຖານ ຖ້າປະຊາຊົນ ມີຫລັກຖານກໍ ສາມາດຕິດຕໍ່ ມາຍັງຫ້ອງການ ສືບສວນ ຂອງຣັຖບານ ໄດ້.
