ຊາວລາວທີ່ເຄີຍ ໃຊ້ດິນຢູ່ ຫາດດອນຈັນ ທໍາມາຫາລ້ຽງຊີພ ຍັງບໍ່ດີໃຈ ທີ່ພວກເຂົາເຈົ້າ ໄດ້ຮັບເງິນ ຄ່າຊົດເຊີຍໜ້ອຍ ສຳລັບທີ່ດິນ ທີ່ຣັຖບານຍຶດໄປ ມອບໃຫ້ ນັກລົງທຶນຈີນ ສ້າງເປັນໂຮງແຮມ ດອນຈັນພາເລສ ເມື່ອສິບກວ່າປີກ່ອນ . ເມື່ອບໍ່ດົນຜ່ານມາ ຜູ້ຕາງໜ້າຊາວສວນ ຫາດດອນຈັນ ໄດ້ມາຈົດຊື່ ປະຊາຊົນ ທີ່ເຄີຍມີດິນ ຢູ່ຫາດດອນຈັນນັ້ນ ແລະ ອະທິບາຍວ່າ ເຂົາຈະນຳເອົາ ຣາຍຊື່ ຊາວສວນທັງໝົດ ໄປປະກອບ ຄຳຮ້ອງ ຍື່ນຂື້ນໄປຫາ ເຈົ້າໜ້າທີ່ ທີ່ກ່ຽວຂ້ອງ ເພື່ອຂໍຄວາມເປັນທັມ ຫລື ເພື່ອຂໍເງິນ ຄ່າຊົດເຊີຍຕື່ມ. ດັ່ງລູກຊາຍ ຂອງອະດີດຊາວສວນ ຢູ່ຫາດດອນຈັນ ຜູ້ນຶ່ງເວົ້າວ່າ:
"ຢາກໄປສເນີເພິ່ນ ການນຳກໍຄືຜູ້ໃຫຍ່ ໃຫ້ຄວາມເປັນທັມ ແກ່ພໍ່ແມ່ ປະຊາຊົນ ກຸ່ມຊາວສວນ ເຮົານີ້ວ່າ ຢາກໄດ້ເງິນ ຄ່າຊົດເຊີຍ ຄືນຫລັງ."
ລູກຊາຍ ອະດີດຊາວສວນ ຫາດດອນຈັນ ຜູ້ນີ້ເວົ້າອີກວ່າ ແມ່ຂອງເລົາ ແລະ ຊາວສວນອື່ນໆ ເສັຍໃຈຫລາຍ ທີ່ສູນເສັຍທີ່ດິນ ແລະ ເສັຍໃຈທີ່ໄດ້ ຄ່າຊົດເຊີຍໜ້ອຍ. ກ່ອນຈະສ້າງ ໂຮງແຮມ ດອນຈັນພາເລສ ເຈົ້າໜ້າທີ່ ເອົາຣົດດຸດ ຣົດກວາດ ແລະ ຣົດຈົກ ມາຕັ້ງໄວ້ຢູ່ ໃນສວນ ຂອງຊາວບ້ານ ແລ້ວເອິ້ນຊາວບ້ານ ໄປໂອ້ລົມ ແລະ ມອບເງິນ ຄ່າຊົດເຊີຍໃຫ້ ສໍາລັບແມ່ຂອງເລົາ ໄດ້ເງິນ 8 ແສນກີບ ສຳລັບດິນ ຫ້າໄຮ່ ຊຶ່ງຖືວ່າເປັນ ຄ່າຊົດເຊີຍ ທີ່ຕ່ຳທີ່ສຸດ ຖ້າທ່ຽບໃສ່ ເຈົ້າຂອງທີ່ດິນ ບໍຣິເວນ ບ້ານພັກ ອາແຊັມ ທີ່ໄດ້ຄ່າຊົດເຊີຍ ເຖິງຕອນລະ 200 ລ້ານກີບ.
ຈົນເຖິງປັດຈຸບັນ ອະດີດຊາວສວນ ຫາດດອນຈັນ ຍັງບໍ່ທັນໄດ້ຮັບ ຄຳຕອບ ຈາກທາງການ ກ່ຽວກັບ ຄຳຮຽກຮ້ອງ ນັ້ນເທື່ອ. ຣັຖບານລາວ ມີແຜນຈະສ້າງ ຫາດດອນຈັນ ໃຫ້ເປັນ ເມືອງໃຫຍ່ທັນສມັຍ ທີ່ມີທັງໂຮງແຮມ ເຮືອນພັກ ຕຶກ ອາຄານ ບ່ອນຢູ່ອາສັຍ ສະຖານທີ່ທ່ອງທ່ຽວ ແລະ ຮ້ານຊັພສິນຄ້າ ທີ່ສູງໆງາມໆ ແລະໃຫຍ່ໂຕ ຄືກັບເມືອງໃຫຍ່ ອື່ນໆໃນໂລກ.
ຊົດເຊີຍຖືກແທ້ ເງິນ 200 ລ້ານກີບຊື້ດິນຕອນໃໝ່ໄດ້ບໍ່ລະ?
