ນັກທຸຣະກິດ ຈີນ ແລະ ວຽດນາມ ໃຊ້ຊື່ລູກຈ້າງ ຄົນລາວ ໃນການ ຄອບຄອງ ທີ່ດິນ
ເຈົ້າໜ້າທີ່ ອົງການ ກວດກາ ແຫ່ງຣັຖ ທີ່ເປີດເຜີຽ ຕໍ່ນັກຂ່າວ ເມື່ອອາທິດ ຜ່ານມາວ່າ ທຸຣະກິດ ການລົງທຶນ ດ້ານກະສິກັມ ຂອງ ຕ່າງປະເທດ ຕາມຫລັກສູຕ 3+2 ໃນລະຍະ ຜ່ານມາ ຈົນຮອດ ປັດຈຸບັນ ມີປາກົດການ ທີ່ບໍ່ດີ ເກີດຂື້ນ. ສີ່ງທີ່ພົບເຫັນ ນັ້ນ ແມ່ນສິດທິ ໃນການຄອບຄອງ ທີ່ດິນ. ທ່ານເວົ້າວ່າ ຕາມຄວາມຈິງແລ້ວ ສິດທິ ໃນການເປັນ ເຈົ້າຂອງ ທີ່ດິນ ຖືກປ່ຽນມື ເປັນຂອງ ນັກລົງທຶນ ຕ່າງປະເທດ ໄປຈໍານວນນຶ່ງ ໂດຍສະເພາະ ນັກທຸຣະກິດ ວຽດນາມ ແລະ ຈີນ ສາມາດ ໃຊ້ຊື່ ຂອງລູກຈ້າງ ຄົນລາວ ເປັນຜູ້ຖືຄອງທີ່ດິນ ແທນ ໂດຍຕົນເອງຖື ກັມມະສິດ ເປັນເຈົ້າຂອງ ຍ້ອນວ່າ ພະນັກງານ ທີ່ດິນ ອໍານວຍ ຄວາມສະດວກໃຫ້.
ສູຕການລົງທຶນ 3+2 ດ້ານກະສິກັມ ໝາຍເຖິງ ນັກລົງທຶນ ຕ່າງປະເທດ ເປັນຝ່າຍລົງທືນ ດ້ານການເງິນ ເທັກນິກ ແນວພັນປູກ ແລະ ຮັບປະກັນ ຫາຕລາດ ຈໍາໜ່າຍ ຂາຍຜົນຜລິດໃຫ້. ສ່ວນຊາວ ກະສິກອນ ລາວ ທີ່ເປັນເຈົ້າຂອງ ທີ່ດິນ ແລະ ມີໃບຕາດິນ ຢ່າງຖືກຕ້ອງ ນັ້ນ ເປັນຜູ້ປະກອບ ສ່ວນດ້ານ ທີ່ດິນ ປູກຝັງ ແລະ ປະກອບສ່ວນ ທາງດ້ານ ແຮງງານ. ສິດທິໃນການ ຖືຄອງທີ່ດິນ ໄດ້ກາຍເປັນ ຂອງນັກລົງທຶນ ຕ່າງປະເທດ ຍ້ອນຊາວ ກະສິກອນ ບາງກຸ່ມ ຂາຍສິດຂອງຕົນ ໃຫ້ນັກລົງທຶນ ໂດຍມີ ພະນັກງານ ອົງການ ຄຸ້ມຄອງ ທີ່ດິນ ເປັນຜູ້ອໍານວຍ ຄວາມສະດວກ ໃຫ້.
ບົດວິຈັຍ ຂອງ ກຸ່ມຄົ້ນຄວ້າ ແມ່ນໍ້າຂອງ Mekong Research Group ຈາກ ມະຫາວິທຍາໄລ ນະຄອນສິດນີ ປະເທດ Australia ວ່າໃນປີ 2005 ທາງການລາວ ໄດ້ອອກ ໃບຕາດິນ ໃຫ້ ປະຊາຊົນ ຈໍານວນ ທັງໝົດ 3 ແສນ ກ່ວາຄອບຄົວ ໃນຈໍານວນ ທີ່ດິນ 4 ແສນ ກວ່າຕອນ. ແຕ່ວ່າ ການສໍາຣວດ ລ້າສຸດໃນປີ 2012 ພົບວ່າ 10% ຂອງທີ່ດິນ 4 ແສນ ກ່ວາຕອນ ຖືກປ່ຽນມື ໄປແລ້ວ.
