ຊາວບ້ານ ໂພນຊອງ ເມືອງ ວຽງຄຳ ແຂວງ ວຽງຈັນ ຖືກກັກຕົວ ຍ້ອນ ບໍ່ຍອມ ຍ້າຍອອກຈາກເຂດ ໂຄງການ ຂຍາຍ ເສັ້ນທາງ.
ຊາວບ້ານ ໂພນຊອງ ເຂດເມືອງ ວຽງຄໍາ ແຂວງວຽງຈັນ ຜູ້ບໍ່ປະສົງ ອອກຊື່ ໄດ້ຣາຍງານ ຕໍ່ເອເຊັຽ ເສຣີ ໃນວັນທີ 7 ມິນາ 2013 ນີ້ວ່າມີ ຊາວບ້ານ ຜູ້ນຶ່ງ ຖືກເຈົ້າໜ້າທີ່ ກັກຕົວ ຍ້ອນບໍ່ຍອມ ມ້າງເຮືອນ ຂອງຕົນ ອອກໃຫ້ ໂຄງການ ຂຍາຍທາງ ຣະຫວ່າງ ສາມແຍກ ບ້ານ ໂພນໝີ ຫາ ເມືອງ ທ່າລາດ. ຫລັງຈາກນັ້ນ ທາງ ເອເຊັຍເສຣີ ກໍໄດ້ຕິດຕໍ່ ໄປຍັງ ເຈົ້າໜ້າທີ່ ເມືອງ ວຽງຄໍາ ແລະ ໄດ້ຮັບ ຄໍາຕອບວ່າ ບໍ່ມີເຣື່ອງ ແນວນັ້ນ ເກີດຂຶ້ນ ແຕ່ຢ່າງໃດ:
"ບໍ່ ຄືປະຊາຊົນ ແມ່ນເຫັນດີ ການພັທນາໝົດ ຖືວ່າເຫັນດີ ການຮ່ວມມື ໂຕນີ້ແທ້ ມີບັນຫາ ຫຍັງ ເຮົາກະໄກ່ເກັ່ຽ ໄດ້ໝົດ".
ທ່ານເວົ້າ ຕໍ່ໄປວ່າ ໂຄງການ ຂຍາຍເສັ້ນທາງ ດັ່ງກ່າວ ເປັນໂຄງການ ຂອງ ຣັຖບານ ທີ່ໄດ້ສ້າງ ທາງຄອນກຣີດ ຜ່ານ 3 ບ້ານ ຄື: ບ້ານໂພນໝີ, ບ້ານໂພນຊອງ ໄປຫາ ເມືອງທ່າລາດ, ມີຄວາມຍາວ ທັງໝົດ 6.6 ກິໂລແມັດ ແລະ ໄດ້ເລີ່ມສ້າງ ມາແຕ່ຕົ້ນປີ 2013, ຈະໃຊ້ເວລາ ກໍ່ສ້າງ 3 ປີ.
ຫລັງຈາກຖາມ ເຈົ້າໜ້າທີ່ ແລ້ວ ເອເຊັຍເສຣີ ກໍໄດ້ຕິດຕໍ່ ໄປຍັງບ້ານ ໂພນຊອງ ແລະ ກໍໄດ້ ຄໍາຕອບ ແບບດຽວກັນ ກັບຄໍາຕອບ ຂອງ ເຈົ້າໜ້າທີ່ ພ້ອມທັງ ຢືນຢັນວ່າ ຊາວບ້ານ ທັງໝົດ ລ້ວນແຕ່ ເຫັນດີນໍາ ໂຄງການ, ບໍ່ມີຜູ້ໃດ ຄັດຄ້ານ.
ຢ່າງໃດກໍຕາມ ຂໍ້ມູນ ເພີ່ມເຕີມ ຂອງຊາວບ້ານ ທີ່ ແຂວງວຽງຈັນ ວ່າ ທີ່ຜ່ານມາ ໂຄງການ ກໍ່ສ້າງຕ່າງໆ ພາຍໃນແຂວງນີ້ ທີ່ກວມເອົາດິນ ຂອງຊາວບ້ານ ຫລື ກວມເອົາເຮືອນ ຂອງ ປະຊາຊົນ ທາງຣັຖບານ ບໍ່ຍອມ ຈ່າຍຄ່າ ຊົດເຊີຍໃຫ້, ຜູ້ໃດ ຂັດຂວາງ ຫລື ບໍ່ຍອມ ປະຕິບັດ ຕາມຄໍາສັ່ງ ກໍອາດຖືກຈັບ ເຂົ້າຄຸກໄດ້.
