NGO ເຊື່ອວ່າ ທ.ສົມບັດຍັງຢູ່

ອົງການ ຈັດຕັ້ງ ທີ່ ບໍ່ຂຶ້ນກັບ ຣັຖບານ ແລະ ອົງການ ຈັດຕັ້ງສາກົນ ຢູ່ລາວ ຍັງເຊື່ອວ່າ ທາງການລາວ ຈະສາມາດ ຊອກຫາ ແລະ ຊ່ວຍເຫລືອ ທ່ານ ສົມບັດ ສົມພອນ ນັກພັທນາ ຄົນສໍາຄັນ ຂອງລາວ ກັບຄືນມາ ສູ່ໂລກ ພາຍນອກ ໄດ້ ເຖິງ ແມ່ນວ່າ ການສືບສວນ ສອບສວນ ຍັງບໍ່ມີ ຄວາມຄືບໜ້າ ຢູ່ກໍາຕາມ, ກໍຣະນີ ຂອງ ທ່ານ ບໍ່ເປັນສິ່ງ ທີ່ຍາກເກີນໄປ ສໍາລັບ ທາງການລາວ. ດັ່ງ ເຈົ້າໜ້າທີ່ ອົງການ ຈັດຕັ້ງ ສາກົນ ທ່ານນຶ່ງ ເວົ້າວ່າ:

"ມັນເປັນ ຄະດີ ບໍ່ຍາກ ໃນມຸມມອງ ຂ້ອຍເອງເດ້ ມັນບໍ່ແມ່ນ ຈະຫາຍໂຕ ໄດ້ເນາະ ບາດນີ້ຄັນ ຢູ່ໃນ ປະເທດລາວ ມັນຕ້ອງຮູ້ ຕ້ອງຮູ້ ແນ່ນອນ ຢູ່ລາວ ເພາະວ່າ ຂະເຈົ້າຈັດ ເປັນບ້ານ ເປັນກຸ່ມ ໝາຍຄວາມວ່າ ຂະເຈົ້າ ຈະຕ້ອງ ຮູ້ຈັກໝົດ".

ທ່ານເວົ້າ ຕໍ່ໄປວ່າ ຫາກຕອນນີ້ ທ່ານ ສົມບັດ ຍັງຖືກຂັງ ຢູ່ບ່ອນໃດ ບ່ອນນຶ່ງ ໃນ ປະເທດລາວ ທ່ານເຊື່ອວ່າ ຕໍ່ໄປ ເຈົ້າໜ້າທີ່ ຈະຕ້ອງສືບຫາ ໄດ້ແນ່ນອນ ເພາະຣະບົບ ການປົກຄອງ ຂອງລາວ ຮັດກຸມ ແລະ ມີເຈົ້າໜ້າທີ່ ຂັ້ນທ້ອງຖິ່ນ ສອດຊ່ອງ ເປັນຫູ ເປັນຕາ ແລະ ຈັດຕັ້ງ ເວນຍາມ ຢູ່ຕລອດ, ດັ່ງນັ້ນ ທາງ ການລາວ ຈຶ່ງຄວນເລັ່ງມື ຊອກຫາ ໃຫ້ຫລາຍຂຶ້ນ.

ເກືອບຮອດ 3 ເດືອນແລ້ວ ທີ່ທ່ານ ສົມບັດ ສົມພອນ ຖືກລັກພາ ຕົວໄປ ຊຶ່ງ ປັດຈຸບັນ ຫລາຍປະເທດ ແລະ ຫລາຍອົງການ ຈັດຕັ້ງ ໃນໂລກ ພຍາຍາມ ກົດດັນ ໃຫ້ ຣັຖບານ ລາວ ເລັ່ງແກ້ໄຂ ເຣື້ອງນີ້ ຢ່າງຕໍ່ເນື່ອງ ແລະ ທາງການລາວ ກໍໄດ້ ອອກຂ່າວ ກ່ຽວກັບ ການຕິດຕາມ ສືບສວນ ເປັນລະຍະ.

ຢ່າງໃດກໍຕາມ ເຈົ້າໜ້າທີ່ ອົງການ ຈັດຕັ້ງສາກົນ ກໍເຄີຍເວົ້າວ່າ ກໍຣະນີ ການຫາຍສາບສູນ ຂອງ ທ່ານ ສົມບັດ ສົມພອນ ນີ້ ຈະມີຜົນ ກະທົບ ໂດຍກົງ ຕໍ່ການເຂົ້າ ຮ່ວມ ປະຊາຄົມ ເສຖກິດ ອາຊຽນ ໃນປີ 2015 ຂອງ ຣັຖບານລາວ.