ລາວ ແລະ ໄທ ຈະແກ້ໄຂ 6 ບັນຫາ ເຣື່ອງຊາຍແດນ ພາຍຫລັງ ກອງປະຊຸມ ຄັ້ງທີ 8 ຂອງ ທີມງານ ຊາຍແດນ ຂັ້ນແຂວງ ລາວ-ໄທ.
ຂໍ້ຕົກລົງ ດັ່ງກ່າວ ຖືກປະກາດ ໂດຍທ່ານ ຈາຣຸພົງ ເຣືອງສຸວັນ ຣັຖມົນຕຣີ ກະຊວງ ມະຫາດໄທ ຂອງໄທ ແລະ ທ່ານ ທອງບັນ ແສງອາພອນ ຣັຖມົນຕຣີ ກະຊວງ ຮັກສາ ຄວາມສງົບ ພາຍໃນ ຂອງລາວ. ຣາຍງານ ເວົ້າວ່າ ລາວແລະໄທ ຈະຮ່ວມມືກັນ ແກ້ໄຂ ກໍຣະນີ ທີ່ກ່ຽວຂ້ອງ ກັບການ ກັກຂັງ ພົລເມືອງ ຂອງກັນ ແລະ ກັນ, ປາບປາມ ການຄ້າ ຢາເສບຕິດ ແລະ ຮັກສາຄວາມ ເປັນຣະບຽບ ຮຽບຮ້ອຍ ຕາມແນວ ຊາຍແດນ.
ພ້ອມດຽວກັນ ທັງ ລາວ-ໄທ ກໍຈະປັບປຸງ ດ່ານຊາຍແດນ, ສົ່ງເສີມ ໃຫ້ທີມງານ ຣະດັບ ແຂວງ ເຮັດວຽກ ຮ່ວມກັນ ເພື່ອຮັບປະກັນ ຄວາມສງົບ ຕາມຊາຍແດນ ແລະ ຫາທາງ ຕິດຕໍ່ ພົວພັນ ຣະຫວ່າງກັນ ນໍາດ້ວຍ. ກອງປະຊຸມ 3 ວັນ ຊຶ່ງມີຂຶ້ນ ຢູ່ທີ່ ປະເທດໄທ ແລະ ມີການສລຸບ ເມື່ອວັນສຸກ ຜ່ານມາ ມີເຈົ້າແຂວງ ຈາກ 12 ແຂວງ ຂອງໄທ ແລະ 9 ແຂວງ ຂອງລາວ ເຂົ້າຮ່ວມ ນໍາດ້ວຍ.
ຈາກກະແສຂ່າວ ອີກແຫ່ງນຶ່ງ ຣາຍງານວ່າ ດ່ານຊາຍແດນ ລາວ-ໄທ ໄດ້ຮັບຄໍາສັ່ງ ໃຫ້ສິ້ງຊອມ ຫາຕົວ ແມ່ຍິງລາວ ຊື່ ນາງ ລອຍ ຈັນທະວົງສາ ອາຍຸ 35 ປີ ທີ່ ເຊື່ອກັນວ່າ ມີສ່ວນຮ່ວມ ໃນວົງການ ລັກຄ້າ ສັດປ່າ. ນາງຖືກ ຕ້ອງການຕົວ ໃນກໍຣະນີ ທີ່ກ່ຽວຂ້ອງ ກັບ ຕໍາຣວດ 3 ຄົນ ທີ່ສນາມບິນ ສຸວັນນະພູມ ບາງກອກ ທີ່ຖືກຕັ້ງ ຂໍ້ຫາວ່າ ລັກນໍາເອົາ ນໍແຮດ ເຂົ້າໄທ ເມື່ອວັນທີ 6 ມົກຣາ 2013 ນີ້. ບັນທຶກ ການເຂົ້າເມືອງ ບົ່ງບອກວ່າ ນາງລອຍ ມັກເຂົ້າມາໄທ ໂດຍຜ່ານ ແຂວງ ທາງ ພາກອິສານ.
