ອໍານາດເງິນຂອງຈີນ ແຊກຊຶມລາວ

ນັກວິຊາການ ໄທ ເວົ້າວ່າ ຈີນ ເຊຶ່ອມ ອິດທິພົລ ເຂົ້າມາ ລາວ ຫລາຍກວ່າ ແຕ່ກ່ອນ ແລະ ເຫັນວ່າ ເພີ້ມຂຶ້ນ ທຸກມື້.

ທ່ານ ອະດິສອນ ເສີມແຍ້ມ ສາສດາຈານ ແລະ ນັກວິຈັຍ ຈາກ ສູນກາງການ ສຶກສາ ແມ່ນ້ຳຂອງ ມະຫາວິທຍາລັຍ ຈຸລາລົງກອນ ຂອງໄທ ກ່າວ ໃນງານ ເສວະນາ ກ່ຽວກັບ ເຂື່ອນ ໄຊຍະບູຣີ ໃນວັນທີ 14 ມີນາ ວ່າ ປັດຈຸບັນ ອິດທິພົລ ຈີນ ໄດ້ແຜ່ ຂຍາຍ ໃນປະເທດ ລຸ່ມ ແມ່ນ້ຳຂອງ ຢ່າງວ່ອງໄວ ໂດຍສະເພາະ ໃນລາວ ຊຶ່ງ ໃນອະດີດ ເຄີຍ ອາສັຍ ການຊ່ອຍເຫລືອ ຈາກ ວຽດນາມ ເປັນສ່ວນໃຫຍ່ ໃນເວລານີ້ ຈີນ ເລີ້ມມີ ບົດບາດ ຫລາຍຂຶ້ນ ໃນໂຄງການ ພັທນາ ຕ່າງໆ. ດັ່ງ ທ່່ານກ່າວ ໃນຕອນນຶ່ງວ່າ:

"ຈະເຫັນໄດ້ ວ່າຈີນ ເຂົ້າມາມີ ອິດທິພົລ ຂ້ອນຂ້າງ ຫລາຍ ໃນເຣື້ອງ ເງິນກູ້ ເຣື້ອງຄວາມ ຊ່ອຍເຫລືອຕ່າງໆ ບໍ່ວ່າຈະເປັນ ໂຄງການ ຣົຖໄຟ ຄວາມໄວສູງ ຈີນ ມີລັກສນະ ອີກຢ່າງອື່ນ ກໍຄືການ ສົ່ງອອກ ນັກວິຊາການ ຂອງຕົນ ໃນການສ້າງ ເຂື່ອນ, ຈະເຫັນໄດ້ວ່າ ບໍຣິສັດ ຊີໂນໄຮໂດຣ ແລະ ບໍຣິສັດ ໃຫຍ່ໆ ທີ່ ເປັນ ຣັຖວິສາຫະກິຈ ຂອງ ຈີນ ພາກັນເຂົ້າມາ ອັນນີ້ມັນ ກໍມີຄວາມ ເຊື່ອມໂຍງ ກັບ ອິດທິພົລ ຈີນ".

ທ່ານວ່າ ລາຍໄດ້ ສ່ວນຫລາຍ ຂອງ ປະເທດລາວ ແມ່ນການ ຂາຍ ຊັພຍາກອນ ທັມມະຊາດ ເຊັ່ນ ການສ້າງ ເຂື່ອນ ໄຟຟ້າ ແລະ ໃຫ້ ສຳປະທານ ບໍ່ແຮ່ ຊຶ່ງ ໃນເວລານີ້ ຈີນ ເປັນຜູ້ໄດ້ ສຳປະທານ ຫລາຍກວ່າຫມູ່ ຍ້ອນໃຫ້ເງິນ ຊ່ອຍເຫລືອ ຣັຖບານ ລາວ. ເຊັ່ນ ຕົວຢ່າງ ບໍຣິສັດ ຊີໂນໄຮໂດຣ ຂອງຈີນ ກໍໄດ້ ສຳປະທານ ສ້າງເຂື່ອນ ນ້ຳອູ່ 6 ແຫ່ງ ໃນແຂວງ ຫລວງພຣະບາງ ແລະ ແຂວງ ຜົ້ງສາລີ. ທ່ານວ່າ ຈີນ ແລະ ວຽດນາມ ມີການ ແຂ່ງຂັນກັນ ໃນການ ເຊື່ອມ ອິດທິພົລເຂົ້າຫາ ສປປ ລາວ. ທ່ານກ່າວເພີ້ມວ່າ:

"ໃນກໍຣະນີ ລາວ ເຮົາເຫັນໄດ້ ຊັດເຈນວ່າ ລາວ ເປັນປະເທດນຶ່ງ ໃນກໍຣະນີ ຂອງ ເຂື່ອນ ທີ່ຈີນ ເຊື່ອມ ອິດທິພົລ ເຂົ້າມາລາວ. ເຖິງຢ່າງໃດ ກໍຕາມ ຈະເຫັນຈາກ ກໍຣະນີ ເຂື່ອນ ໄຊຍະບູຣີ ວຽດນາມ ບໍ່ອອກມາ ກົດດັນລາວ ເກີນໄປ ເພາະວ່າ ຖ້າມີ ການກົດດັນ ລາວ ແຮງເກີນໄປ ລາວ ອາດຫັນໄປ ເພີ່ງ ຈີນ ຫລາຍຂຶ້ນ. ດັ່ງນັ້ນ ວຽດນາມ ກໍບໍ່ສະແດງອອກ ກ່ຽວກັບ ຄວາມ ບໍ່ພໍໃຈ ໃນເຣື້ອງນີ້ ພໍປານໃດ".

ໃນກໍຣະນີ ດ່ັງກ່າວ ປະຊາຊົນ ລາວ ຫລາຍຄົນ ກໍໃຫ້ ຄວາມຄິດເຫັນ ວ່າ ໃນ ປັດຈຸບັນ ມີອິດທິພົລ ຕ່າງຊາດ ເຂົ້າມາລາວ ຢ່າງຫລວງຫລາຍ ເຊັ່ນ ວຽດນາມ ໄທ ແລະ ຊາດອຶ່ນໆ ຈົນເຮັດໃຫ້ ຄົນລາວ ຢ້ານວ່າ ໃນ ອະນາຄົດ ປະເທດລາວ ອາດຖືກ ກືນກິນ ຈາກ ຕ່າງຊາດ ບໍ່ວ່າທາງດ້ານ ວັທນະທັມ ຫຼື ພື້ນທີ່.