ອະດີດ ເຈົ້າໜ້າທີ່ ອົງການ ຊ່ວຍເຫລືອ ແມ່ຍິງ ທີ່ຖືກເຄາະຮ້າຍ ເວົ້າວ່າ ການ ປະຕິບັດ ວຽກງານ ຊ່ວຍເຫລືອ ຜູ້ເຄາະຮ້າຍ ຈາກການ ຄ້າມະນຸດ ໃນລາວ ບໍ່ດີພໍ ຂາດ ປະສິດທິພາບ.
ອະດີດ ເຈົ້າໜ້າທີ່ ອົງການ ຊ່ວຍເຫລືອ ແມ່ຍິງ ທີ່ ຖືກເຄາະຮ້າຍ ຈາກ ການຄ້າມະນຸດ ຜູ້ບໍ່ປະສົງ ອອກຊື່ ທ່ານນຶ່ງ ເປີດເຜີຍວ່າ ການເຮັດວຽກ ຂອງ ເຈົ້າໜ້າທີ່ ລາວ ຖືວ່າຍັງ ບໍ່ມີ ປະສິດທິພາບ. ຍານາງ ໄດ້ເວົ້າເຖິງ ຂໍ້ບົກຜ່ອງວ່າ, ຣັຖບານລາວ ບອກວ່າ ຈະປ້ອງກັນ ບໍ່ໃຫ້ມີ ການ ຄ້າມະນຸດ ພາຍໃນ ປະເທດ, ແຕ່ ທີ່ຜ່ານມາ ການຄ້າມະນຸດ ກັບມີຫລາຍຕື່ມ ຂະນະທີ່ ຜູ້ເຄາະຮ້າຍ ກໍມີພຽງ ສ່ວນໜ້ອຍ ທີ່ໄດ້ຮັບ ການຊ່ວຍເຫລືອ ຈາກຣັຖບານ. ຜູ້ເຄາະຮ້າຍ ຍັງຖືກເອົາປຽບ ຈາກ ເຈົ້າໜ້າທີ່ ອີກດ້ວຍ. ຍານາງວ່າ:
"ຖືກຂ້າມໄປ ຢູ່ໄທ ເຮັດວຽກ 13 ປີ ຮອດ 20 ປີ ແລ້ວ ກໍ ທໍຣະມານ ຕັດລີ້ນ ເອົາເຕົາລີດ ດາດຫລັງລາວ ແລ້ວຕໍາຣວດ ກໍດໍາເນີນ ທຸກຢ່າງ ແລ້ວສານ ກໍຕົກລົງວ່າ ຈະໃຫ້ເງິນລາວ ສໍາລັບທີ່ວ່າ ທໍຣະມານ ເອົາແຂ້ວຫຍັງ ລາວອອກຫັ້ນ ແຕ່ວ່າ ບໍ່ມີຜູ້ໃດ ເອົາເງິນ ມາໃຫ້ລາວເລີຍ ມີແຕ່ຕໍາຣວດ ຝັ່ງໄທ ເຂົ້າມາຫາ ຕໍາຣວດ ຝັ່ງລາວ ເອົາເງິນ ມາໃຫ້ລາວ ແລ້ວລາວ ກໍບໍ່ໄດ້ ເອົາເງິນໄປໃຫ້ ໄປເຖິງ case ແລ້ວເງິນນັ້ນ ກໍຫາຍ ຄະດີນັ້ນ ກໍປິດໄປ ໂດຍບໍ່ມີຜູ້ follow ເລີຍ".
ຄະດີ ດັ່ງກ່າວ ຍານາງ ວ່າເກີດຂຶ້ນ ໃນປີ 2007 ຄືສານໄທ ໄດ້ຕັດສິນວ່າ ນາຍຈ້າງ ຕ້ອງຈ່າຍ ຄ່າເສັຽຫາຍ ໃຫ້ລູກຈ້າງລາວ ຈາກແຂວງ ສວັນນະເຂດ ທີ່ຖືກທາຣຸນ ນັ້ນ ເປັນເງິນ 5 ແສນບາດ ແຕ່ເທົ່າເຖິງ ທຸກວັນນີ້ ກໍຍັງບໍ່ໄດ້ ຮັບເງິນ ຈໍານວນນັ້ນເລີຍ. ນີ້ເປັນພຽງ 1 ໃນຫລາຍຄະດີ ຄ້າມະນຸດ ທີ່ເກີດຂຶ້ນ.
ຍານາງ ເວົ້າວ່າ ການຄ້າມະນຸດ ມີຫລາຍໃນ ປະເທດລາວ ບາງແຫ່ງເປີດໃຫ້ ແມ່ຍິງຂາຍ ບໍຣິການ ຢ່າງເປີດແປນ ບໍ່ມີ ເຈົ້າໜ້າທີ່ ຂອງຣັຖ ເຂົ້າໄປສົນໃຈ ແຕ່ຢ່າງໃດ. ຣາຍງານ ທີ່ ຣັຖບານລາວ ເປີດເຜີຍ ໃນປີ 2011 ແມ່ນວ່າ ຄະດີ ການ ຄ້າມະນຸດ ໃນລາວ ທີ່ ດໍາເນີນ ການສືບສວນ ຢູ່ນັ້ນ ມີ 20 ຄະດີ ຂະນະທີ່ ຕັດສິນແລ້ວ ມີ 33 ຄະດີ ຊຶ່ງອົງການ ສາກົລວ່າ ໃນຕົວຈິງແລ້ວ ມີຫລາຍກວ່ານັ້ນ. ການຄ້າມະນຸດ ດໍາເນີນກັນ ເປັນຂະບວນ ມີການຈ່າຍເງິນ ໃຫ້ຕໍາຣວດ ເພື່ອ ຄວາມສະດວກ ເຮັດໃຫ້ ການ ຄ້າມະນຸດ ບໍ່ໝົດສິ້ນ ຈັກເທື່ອ.
