ນະຄອນຫລວງວຽງຈັນ - ສູ່ມື້ນີ້

ປ້ອມຍາມຕໍາຣວດ ຄືບ່ອນສຸດທ້າຍ ທີ່ຊາວໂລກເຫັນ ທ່ານ ສົມບັດ ສົມພອນ ອອກຈາກຣົດ. ເປັນປຣິສນາ ທີ່ສັ່ນສະເທືອນ ສ້າງຄວາມກັງວົນ ໃຫ້ກັບສັງຄົມລາວ

ຊາວລາວ ເວົ້າວ່າ ໃນ ນະຄອນຫລວງ ວຽງຈັນທນ໌ ສູ່ມື້ນີ້ ບໍ່ແມ່ນເມືອງ ທີ່ ມີຄວາມສງົບ ແລະ ປອດໄພ ດັ່ງທີ່ເຄີຍ ເຂົ້າໃຈ ມາກ່ອນ.

ພາຍຫລັງ ການຖແລງຂ່າວ ຄັ້ງທີ 2 ຂອງ ກະຊວງ ປ້ອງກັນ ຄວາມສງົບ ຂອງລາວ ກ່ຽວກັບ ການລັກພາຕົວ ທ່ານ ສົມບັດ ສົມພອນ ນັ້ນ ມີການ ວິພາກວິຈານ ກັນຢ່າງໜາຫູ ໃນໝູ່ ມະຫາຊົນ ຢ່າງກວ້າງຂວາງ ວ່າ ສູ່ມື້ນີ້ ນະຄອນຫຼວງ ວຽງຈັນທນ໌ ບໍ່ເປັນເມືອງ ທີ່ມີ ຄວາມສງົບ ແລະ ປອດໄພ ຢ່າງທີ່ ພວກເຂົາເຈົ້າ ເຄີຽ ເຂົ້າໃຈມາກ່ອນ.

ຄໍາເວົ້າທີ່ວ່ານັ້ນ ຟັງແລ້ວ ຄືວ່າ ການລັກພາຕົວ ຫລືການ ຫາຍສາບສູນ ຂອງຄົນ ໃນເມືອງລາວ ນັ້ນ ສາມາດ ເກີດຂຶ້ນໄດ້ ທຸກເມື່ອ ເພາະມັນເກີດຂຶ້ນ ມາຫລາຍຄັ້ງ ແລ້ວ ແລະ ເມື່ອເກີດຂຶ້ນແລ້ວ ກໍຍາກທີ່ສຸດ ທີ່ຈະສືບສາວ ລາວເລື່ອງ ຄືນມາໄດ້. ຍ້ອນເປັນຄື ແນວນັ້ນ ປະຊາຊົນລາວ ຈໍານວນ ຫລວງຫລາຍ ຈຶ່ງມີຄວາມ ວິຕົກກັງວົນ ແລະ ຢ້ານກົວ ທີ່ສຸດ, ບໍ່ກ້າເວົ້າ, ບໍ່ກ້າອອກ ຄວາມເຫັນໃດໆ ຕໍ່ບັນຫາ ຕ່າງໆ ທີ່ພົວພັນ ເຖິງ ພັກແລະຣັຖ ເພາະຢ້ານວ່າ ມື້ນຶ່ງ ຕົນເອງ ອາດຈະ ພົບກັບ ຊາຕາກັມ ດຽວກັນກັບ ທ່ານ ສົມບັດ ສົມພອນ.

ພ້ອມກັນນັ້ນ ຢູ່ ນະຄອນຫລວງ ວຽງຈັນທນ໌ ກໍເກີດມີ ໄພສັງຄົມ ຫລາຍຢ່າງ ເຊັ່ນ: ບັນຫາ ຢາເສບຕິດ, ຂີ້ລັກງັດເເງະ, ປຸ້ນຈີ້ ແລະ ສິ່ງທີ່ບໍ່ດີອື່ນໆ ຊຶ່ງເປັນ ເຣື່ອງສັງຄົມ ພາກັນ ເອົາມາເວົ້າ ສູ່ກັນຟັງ ເກືອບທຸກມື້ ຢູ່ຕາມຫ້ອງການ, ສໍານັກງານ ອົງການ, ໂຮງຮຽນ, ໂຮງໝໍ, ຕາມຕລາດ ແລະ ສະຖານທີ່ ສາທາຣະນະ ຕ່າງໆ.

ກ່ຽວກັບ ສະພາບການ ດັ່ງກ່າວ ຊາວລາວ ຫລາຍຄົນ ຈຶ່ງຕ້ອງໄດ້ ຄ່ອຍໄປຄ່ອຍມາ ແລະ ຣະວັງຕົວ ທີ່ສຸດ, ເຮືອນຊານ ກໍປະບໍ່ໄດ້ ເພາະຢ້ານ ພວກຜູ້ຮ້າຍ. ເຫດການຕ່າງໆ ທີ່ເກີດຂຶ້ນ ໄດ້ນັ້ນ ມີການ ວິພາກວິຈານ ກັນວ່າ ອາດເປັນຍ້ອນ ຄວາມບໍ່ເອົາ ໃຈໃສ່ ຂອງ ເຈົ້າໜ້າທີ່ ບ້ານເມືອງ ຫຼື ຣັຖບາລ ມີແຕ່ ນະໂຍບາຍ ແລະ ແຜນການ ແຕ່ ບໍ່ເອົາໃຈໃສ່ ແກ້ໄຂ ຄວາມບໍ່ປອດພັຍ ໃນສັງຄົມ ກໍເປັນໄດ້.