ການລັກລອບ ລ້າສັດປ່າ ຢູ່ລາວ ຍັງມີຫລາຍ ໂດຍສະເພາະ ທາງພາກເໜືອ ເຊັ່ນ ແຂວງ ໄຊຍະບຸຣີ ຫລວງນ້ຳທາ ຫລວງພຣະບາງ ແລະ ຜົ້ງສາລີ.
ເຈົ້າໜ້າທີ່ ກະຊວງ ກະສິກັມ ແລະ ປ່າໄມ້ ທ່ານນຶ່ງ ໃຫ້ ຣາຍລະອຽດ ກ່ຽວກັບ ເຣື່ອງນີ້ ຕື່ມວ່າ:
“ເຣື່ອງການ ລັກລອບລ່າ ສັດມັນ ກໍຍັງມີ ຢູ່ແລ້ວ ແຕ່ວ່າ ເພາະວ່າອັນ ອັນນີ້ ມັນບໍ່ແມ່ນ ສະເພາະປ່າ ສງວນເນາະ ມັນມີ ຢູ່ທຸກບ່ອນ ເຣື່ອງລ່າສັດ ໜີ່ມັນມີໝົດ ເຮົາກໍບໍ່ ອະນຸຍາດ ຫ່ັນແຫລະ ແຕ່ກໍ ສະກັດກັ້ນ ບໍ່ໄດ້ ຄາວນີ້ ພະນັກງານ ເຮົາກໍມີ ຈຳນວນ ຈຳກັດ.”
ເຈົ້າໜ້າທີ່ ທ່ານນີ້ ກ່າວອີກວ່າ ການລັກຄ້າຂາຍ ສັດປ່າ ຢູ່ລາວ ຍັງມີຫລາຍ ເພາະ ປະຊາຊົນ ລາວ ທ້ອງຖິ່ນ ສົມຮູ້ ຮ່ວມຄິດ ກັບພວກຄ້າ ສັດປ່າ ວຽດນາມ ທີ່ ເຂົ້າມາຮັບ ຊື້ສັດປ່າ ຢູ່ລາວ ແລ້ວສົ່ງ ໄປຂາຍ ຕໍ່ຢູ່ຈີນ. ສັດປ່າ ທີ່ ພວກຄ້າສັດປ່າ ຕ້ອງການຫລາຍ ທີ່ສຸດ ກໍແມ່ນ ເສືອ ງູເຫົ່າ ງູເຫລືອມ ແລະ ຫລິ່ນ.
ເຈົ້າໜ້າທີ່ ກະຊວງ ກະສິກັມ ແລະ ປ່າໄມ້ ທ່ານນີ້ ຍອມຮັບວ່າ ເຈົ້າໜ້າທີ່ ບໍ່ສາມາດ ປາບປາມ ການລັກລອບລ້າ ແລະ ຄ້າສັດປ່າ ໄດ້ດີ ເທົ່າທີ່ຄວນ ເພາະຂາດ ກຳລັງ ຄົນ. ນັກປົກປ້ອງ ສັດປ່າ ໃຫ້ ຂໍ້ສັງເກດ ວ່າ ການປາບປາມ ພວກ ຄ້າສັດປ່າ ຢູ່ລາວ ບໍ່ມີ ປະສິດທິພາບ ດົນໆ ເຈົ້າໜ້າທີ່ ຈຶ່ງສາມາດ ຈັບ ພວກຄ້າ ສັດປ່າ ໄດ້.
ເມື່ອເດືອນ ຕຸລາ 2012 ເຈົ້າໜ້າທີ່ ກວດກາ ປ່າໄມ້ ແຂວງ ໄຊຍະບຸຣີ ຈັບພວກ ຄ້າສັດປ່າ ແລະ ຍຶດຫລິ່ນ ເຕົ່າ ຕີນ ໝີ ແລະ ແຂ້ວໝູປ່າ ທີ່ມີມູນຄ່າ ກວ່າ 87 ລ້ານ ກີບ; ຕໍ່ມາ ເດືອນທີ່ ແລ້ວ ເຈົ້າໜ້າທີ່ ແຂວງ ອຸດົມໄຊ ກໍຍຶດສັດປ່າ ແລະ ຊິ້ນສ່ວນ ຂອງ ສັດປ່າ ໄດ້ ລວມນ້ຳໜັກ ເກືອບ 500 ກິໂລກຣາມ ທີ່ ພວກຄ້າສັດປ່າ ກຳລັງ ລັກຂົນສົ່ງໄປ ວຽດນາມ. ສັດປ່າ ຢູ່ລາວ ນັບມື້ ນັບຫລຸດໜ້ອຍ ລົງ ສັດຫລາຍໆ ຊນິດສູນພັນ ໄປແລ້ວ.
