ສະຖານທູດ ສະຫະຣັຖ ອະເມຣິກາ ປະຈໍາລາວ ຝຶກອົບຮົມ ເຈົ້າໜ້າທີ່ ດ່ານ ຊາຍແດນ ຂອງລາວ.
ການຝຶກອົບຮົມ ດັ່ງກ່າວ ໄດ້ຖືກຈັດ ຂື້ນຢູ່ ໂຮງແຮມ ຣັສມີ ໃນນະຄອນຫລວງ ວຽງຈັນ ເມື່ອບໍ່ດົນ ຜ່ານມາ ໂດຍມີ ເຈົ້າໜ້າທີ່ ລາວ ເຂົ້າຮ່ວມ ປະມານ 30 ຄົນ. ທ່ານ Paul Mayer ຮອງ ທູດ ສະຫະຣັຖ ປະຈຳລາວ ກ່າວວ່າ ການລັກ ຂົນສົ່ງ ຢາເສບຕິດ ສານເຄມີ ສັດປ່າ ແລະ ການ ຄ້າມະນຸດ ຂ້າມຊາດ ປັດຈຸບັນ ໄດ້ເພິ້ມຂື້ນ ຫລາຍ.
ສະນັ້ນ ເຈົ້າໜ້າທີ່ ຊາຍແດນ ຈຶ່ງມີພາລະໜ້າທີ່ ຫລາຍຂື້ນ. ປັດຈຸບັນ ອາຊຍາກອນ ແລະ ກຸ່ມທຸຈຣິດ ອື່ນໆ ມີເງິນຫລາຍ ແລະ ກໍມີວິທີ ລະເມີດ ກົດໝາຍ ຫລາຍວິທີ. ພວກເຂົາຄົນ ເຫລົ່ານີ້ ບໍ່ສົນໃຈເຣື່ອງ ອະທິປະໄຕ ຂອງ ປະເທດໃດ ແລະ ກໍບໍ່ສົນໃຈ ເຣື່ອງ ຄວາມປອດໄພ ຂອງໃຜ; ພວກເຂົາສົນໃຈ ແຕ່ເຣື່ອງເງິນ ຢ່າງດຽວ ເຮັດແນວໃດ ຈຶ່ງຈະໄດ້ ເງິນຫລາຍ ທີ່ສຸດ ເຂົ້າຖົງເຂົາ.
ສ່ວນທ່ານ ບຸນປະເສີດ ສີກຸນລະບຸດ ຮອງຫົວໜ້າ ດ່ານພາສີ ອາກອນ ຂອງລາວ ໄດ້ກ່າວຂອບໃຈ ສະຖານທູດ ສະຫະຣັຖ ທີ່ໄດ້ຊ່ວຍ ຝຶກອົບຮົມ ແລະ ຍົກຣະດັບ ຄວາມຮູ້ ແລະ ຄວາມສາມາດ ຂອງ ເຈົ້າໜ້າທີ່ ດ່ານຊາຍແດນ ຂອງລາວ ໃຫ້ສູງຂື້ນ ໃຫ້ໄດ້ ມາຕຖານ ສາກົນ.
ທ່ານ ບຸນປະເສີດ ກ່າວອີກວ່າ ພາລະໜ້າທີ່ ຂອງ ເຈົ້າໜ້າທີ່ ຊາຍແດນ ໄດ້ປ່ຽນໄປ ແຕ່ກ່ອນ ມີແຕ່ ເອົາໃຈໃສ່ ເກັບພາສີ ອາກອນ ຈາກພວກ ພໍ່ຄ້າ ແມ່ຄ້າ ເທົ່ານັ້ນ ແຕ່ປັດຈຸບັນ ຕ້ອງປາບປາມ ການຄ້າເຖື່ອນ ໃນທຸກຮູບແບບ. ການຝຶກອົບຮົມ ເຈົ້າໜ້າທີ່ລາວ ເປັນໂຄງການ ຊ່ວຍເຫລືອ ຢ່າງນຶ່ງ ທີ່ສະຫະຣັຖ ໄດ້ໃຫ້ແກ່ ສປປລາວ ເປັນປະຈຳ ໃນຣະຍະ 25 ປີ ທີ່ຜ່ານມາ.
