ຫົງອານໄກລານ ກ່າວຕ້ານຂໍ້ກ່າວຫາ

ປະທານ ບໍຣິສັດ ຫົງອານ ໄກລານ ປະຕິເສດ ຕໍ່ ຂໍ້ກ່າວຫາ ຂອງ ອົງການ NGO Global witness ກ່ຽວກັບ ການຍຶດ ທີ່ດີນ ຂອງ ປະຊາຊົນ ໃນລາວ ແລະ ກຳພູຊາ.

ທ່ານ ດວນ ຫງຽນດຶກ ປະທານ ບໍຣິສັດ ຫົງອານ ໄກລານ ໄດ້ປະຕິເສດ ຕໍ່ທຸກຂໍ້ ກ່າວຫາ ຈາກ ອົງການ ທີ່ບໍ່ຂຶ້ນ ກັບ ຣັຖບານ Global Witness ກ່ຽວກັບ ການຕັດໄມ້ ແລະ ຍຶດທີ່ດີນ ຊາວບ້ານ ໃນລາວ ແລະ ກຳພູຊາ ນັ້ນວ່າ ເປັນຂໍ້ກ່າວຫາ ທີ່ບໍ່ມີມູນ ຄວາມຈິງ.

ທ່ານໄດ້ກ່າວຕໍ່ ກຸ່ມນັກຂ່າວ ແລະ ນັກລົງທຶນ ທີ່ ນະຄອນ ໂຮຈີມິນ ໃນມື້ວັນທີ 19 ພຶສພາ 2013 ວ່າ ຫລັງຈາກ ບົດຣາຍງານ ໄດ້ຖືກພິມ ເຜີຍແພ່ ທ່ານໄດ້ ເຊື້ອເຊີນ ຕົວແທນ ຈາກ ອົງການ Global Witness ແລະ ກຸ່ມນັກຂ່າວ ທີ່ ຮ່ວມດ້ວຍ CNN ແລະ BBC ຊຶ່ງ ເປັນອົງການ ຂ່າວທີ່ ກຸ່ມດັ່ງກ່າວ ສົ່ງຂໍ້ຄວາມ ໄປອອກຂ່າວ ໃຫ້ໄປ ທັສນະສຶກສາ ສະພາບ ຄວາມຈິງ ຂອງໂຄງການ ຂອງ ທ່ານໃນລາວ ແລະ ກຳພູຊາ ແຕ່ກຸ່ມດ່ັງກ່າວ ປະຕິເສດ.

ທ່ານວ່າ ອົງການ Global Witness ມີແຕ່ຕ້ອງການ ພົບທ່ານ ໃນວຽດນາມ ແຕ່ທ່ານເວົ້າວ່າ ມັນບໍ່ມີ ຄວາມຫມາຍຫຍັງ ທີ່ຢາກພົບ ທ່ານ ໃນວຽດນາມ ເພາະໂຄງການ ທີ່ວ່ານີ້ ແມ່ນຢູ່ໃນ ລາວ ແລະ ກຳພູຊາ ກຸ່ມດັ່ງກ່າວ ຄວນໄປເບີ່ງ ສະພາບ ຄວາມຈິງ ດ້ວຍຕາ ຂະເຈົ້າເອງ ໃນການ ລົງທຶນ ຂອງທ່ານ ໃນລາວ ແລະ ກຳພູຊາ ທ່ານຍັງບອກ ອີກວ່າ ທ່ານໄດ້ສເນີ ຈ່າຍຄ່າເດີນທາງ ໃຫ້ອີກ.

ທ່ານ ດຶກເວົ້າວ່າ ຣັຖບານລາວ ແລະ ກຳພູຊາ ມີຂັ້ນຕອນ ຢ່າງເຂັ້ມງວດ ໃນການໃຫ້ ສຳປະ ທານ ທີ່ດິນ ແກ່ ນັກລົງທຶນ ທີ່ຮ່ວມດ້ວຍ ການສືບສວນ ຈາກ ຊາວບ້ານ ແລະ ຣັຖບານກາງ ໃນການ ອະນຸມັດ ພື້ນທີ່ ແຕ່ລະຄັ້ງ ນອກຈາກນັ້ນ ຍັງຕ້ອງໄດ້ ຄ້ຳປະກັນ ບໍ່ໃຫ້ສ້າງ ຜົລກະທົບ ຕໍ່ ສິ່ງແວດລ້ອມ ແລະ ຊິວິດ ການເປັນຢູ່ ຂອງ ປະຊາຊົນ ນຳອີກ.

ທ່ານວ່າ ກ່ອນ ບໍຣິສັດ ຂອງທ່ານ ລົງທຶນ ໃນແຂວງ ອັດຕະປື ໃນປີ 2008 ລາຍໄດ້ ຂອງ ປະຊາຊົນ ໃນແຂວງ ຕໍ່ຫົວຄົນ ໂດຍສເຣັ່ຽ ປະມານ 200 ໂດລາ ຕໍ່ປີ ໃນປັດຈຸບັນ ຂຶ້ນເປັນ 1 ພັນ 200 ໂດລາ.

http://www.rfa.org/lao/video?param=value&storyId=GlobalWitnessReport