ເດັກນ້ອຍລາວ ບາງຈໍາພວກ ຖືກປະປ່ອຍ ຢູ່ໄປຕາມ ລໍາພັງ ໃນ ນະຄອນຫລວງ ວຽງຈັນ ແລະ ໃນເມືອງໃຫຍ່ ອື່ນໆ ຂອງລາວ ແລະ ສ່ວນນຶ່ງ ກໍເປັນເຫຍື່ອ ຂອງ ການ ຄ້າມະນຸດ. ເຈົ້າໜ້າທີ່ ອົງການ ຊ່ວຍເຫລືອເດັກນ້ອຍ ຢູ່ລາວ ໃຫ້ຂໍ້ມູນ ກ່ຽວກັບ ເຣື່ອງ ນີ້ຕື່ມວ່າ:
“ຕ່າງແຂວງ ກໍມີ ນະຄອນຫລວງ ກໍມີ ສິແມ່ນ ຂະເຈົ້າ ຫລົງມາກັບ ພໍ່ແມ່ ພໍ່ແມ່ ຂະເຈົ້າມາປະ ຢູ່ພີ້ ສິມີທັງ ຂໍທານ ກໍມີ ຖືກຄ້າມະນຸດ ກໍມີ ທາງນາຍໜ້າ ເພິ່ນຕົວະມາ ກໍມີ ຄືກັນ ທີ່ວ່າ ຊອກຫາ ຄອບຄົວ ບໍ່ໄດ້ ທາງເຈົ້າໜ້າທີ່ ເພິ່ນ ເອົາມາໃຫ້ ແລ້ວເຮົາ ກໍຊອກຕິດຕໍ່ ຫາຄອບຄົວ ຂະເຈົ້າ.”
ເຈົ້າໜ້າທີ່ ທ່ານນີ້ ເວົ້າອີກວ່າ ໃນຈຳນວນ ເດັກນ້ອຍ ເຍົາວະຊົນ ທີ່ ຖືກປະປ່ອຍ ນັ້ນ ມີເດັກນ້ອຍ ນຶ່ງຄົນ ຖືກຂາຍໄປ ໄທ; ແລ້ວກະຊວງ ການຕ່າງ ປະເທດລາວ ຕິດຕໍ່ ປະສານງານ ກັບ ເຈົ້າໜ້າທີ່ ທາງການ ໄທ ທີ່ຊ່ວຍເຫລືອ ເດັກນ້ອຍລາວ ອອກມາໄດ້ ແລະ ໄດ້ຈັດສົ່ງ ກັບຄືນ ແລະ ທາງການລາວ ກໍສົ່ງໃຫ້ ອົງການ ຊ່ວຍເຫລືອ ເດັກນ້ອຍ ເພື່ອ ຊອກຫາ ພໍ່ແມ່ ພີ່ນ້ອງ ຂອງ ເຂົາເຈົ້າ.
ຈົນເຖິງ ປັດຈຸບັນ ທາງ ອົງການ ຊ່ວຍເຫລືອ ເດັກນ້ອຍ ສາມາດ ຈັດສົ່ງ ເດັກນ້ອຍ ກັບຄືນ ສູ່ຄອບຄົວ ປະມານ 20 ຄົນ. ເຈົ້າໜ້າທີ່ ຊ່ວຍເຫລືອ ເດັກນ້ອຍ ເວົ້າວ່າ ຢູ່ ນະຄອນຫລວງ ວຽງຈັນ ຍັງມີ ເດັກນ້ອຍ ຈາກ ຕ່າງແຂວງ ຫລາຍຄົນ ທີ່ ຍັງບໍ່ທັນໄດ້ ຮັບການ ຊ່ວຍເຫລືອ.
