ສະຫະຣັຖ ຈະສິ້ງຊອມ ນະໂຍບາຍ ຂອງ ຣັຖບານລາວ ຢ່າງໃກ້ຊິດ ກ່ຽວກັບ ຜູ້ລີ້ພັຍ ເກົາຫລີ ເຫນືອ.
ທ່ານ Daniel Clune ເອກອັຄຣາຊທູຕ ສະຫະຣັຖ ປະຈຳລາວ ໃນອະນາຄົດ ໄດ້ໃຫ້ ຄຳຫມັ້ນ ສັນຍາ ຕໍ່ເວທີການ ໃຫ້ປາກຄຳ ຕໍ່ຄນະກັມມະການ ສະພາສູງ ສະຫະຣັຖ ໃນມື້ວັນທີ 23 ກໍຣະກະດາ ນີ້ວ່າ ສະຫະຣັຖ ຈະສິ້ງຊອມ ນະໂຍບາຍ ຂອງ ຣັຖບານລາວ ຢ່າງໃກ້ຊິດ ກ່ຽວກັບ ຜູ້ລີ້ພັຍ ເກົາຫລີເຫນືອ ໃນ ອະນາຄົດ, ຫລັງຈາກ ທີ່ ຣັຖບານລາວ ໄດ້ສົ່ງເດັກນ້ອຍ ລີ້ພັຍ ຊາວ ເກົາຫລີເຫນືອ 9 ຄົນ ກັບຄືນປະເທດ ໃນເດືອນ ພຶສພາ ຜ່ານມາ.
ທ່ານວ່າ ຫລັງຈາກທີ່ ຣັຖບານລາວ ໄດ້ກັກຂັງ ເດັກນ້ອຍ ເກົາຫລີເຫນືອ 9 ຄົນ ສະຫະຣັຖ ແລະ ຣັຖບານ ເກົາຫລີໃຕ້ ຮ່ວມທັງ ປະເທດຢູໂຣບ ໄດ້ຮຽກຮ້ອງ ຣັຖບານລາວ ບໍ່ໃຫ້ສົ່ງ ຜູ້ລີ້ພັຍ ກັບຄືນໄປບ່ອນ ທີ່ ຈະເປັນ ອັນຕຣາຍ ແກ່ພວກ ຂະເຈົ້່າ.
ຄຳຮຽກຮ້ອງ ດັ່ງກ່າວ ໄດ້ຜົລ ຕໍ່ຈາກນັ້ນມາ ຣັຖບານລາວ ໄດ້ສົ່ງຜູ້ລີ້ພັຍ ຊາວ ເກົາຫລີິເຫນືອ ອີກກຸ່ມໃຫມ່ ຈຳນວນ 20 ຄົນ ໄປເກົາຫລີໃຕ້ ແລະ ສະຫະຣັຖ ກໍຫວັງວ່າ ການກະທຳ ດັ່ງກ່າວ ຂອງ ຣັຖບານລາວ ເປັນສັນຍານ ການກັບມາ ໃຊ້ ນະໂຍບາຍ ເກົ່າ ກ່ຽວກັບ ຜູ້ລີ້ພັຍ ເກົາຫລີເຫນືອ.
ແຕ່ ເຖິງຢ່າງໃດ ກໍຕາມ ທ່ານວ່າ ທາງການ ສະຫະຣັຖ ຈະທຳການ ສິ້ງຊອມ ນະໂຍບາຍ ຂອງ ຣັຖບານລາວ ຢ່າງໃກ້ຊິດ ກ່ຽວກັບ ຜູ້ລີ້ພັຍ ຊາວ ເກົາຫລີເຫນືອ ຮ່ວມກັບ ຣັຖບານ ເກົາຫລີໃຕ້ ແລະ ບັນດາ ປະເທດຢູໂຣບ ດ້ວຍການ ປຶກສາ ຫາລື ກັບ ຄນະກັມມະການ ສະພາ ສະຫະຣັຖ ຖ້າມີເຫດການ ດັ່ງກ່າວ ເກີດຂຶ້ນອີກ ໃຫມ່ ໃນ ອະນາຄົດ.
