ກົມອຸຕຸນິຍົມ ວິທຍາ ໄດ້ແຈ້ງໃຫ້ ປະຊາຊົນ ໃນເຂດ ພາກເຫນືອ ແລະ ພາກກາງ ຂອງລາວ ໃຫ້ຣະວັງ ພະຍຸ ລູກໃຫມ່ ທີ່ຈະເຮັດໃຫ້ ມີຝົນຕົກຫນັກ ຣະຫວ່າງ ວັນທີ 30 ກໍຣະກະດາ ຫາ ວັນທີ 1 ສິງຫາ ອາຈເຮັດໃຫ້ ນ້ຳຖ້ວມ ກະທັນຫັນ ແລະ ດິນເຈື່ອນໄດ້. ດັ່ງ ເຈົ້າຫນ້າທີ່ ທ່ານນື່ງ ເວົ້າວ່າ:
"ເຕືອນຣະຫວ່າງ ເຂດ ພາກເຫນືອ ແລະພາກກາງ ແຂວງ ບໍຣິຄຳໄຊ ຄຳມ່ວນ ແລະ ວຽງຈັນ ເນາະ ກັບ ພາກເຫນືອ ກໍຂ້ອນຂ້າງ ຢາກຫມົດ ທຸກບ່ອນເນາະ ສະພາບ ຝົນຕົກຫນັກ ໂອກາດ ຈະເກີດມີ ດິນເຈື່ອນ ນ້ຳຖ້ວມ ສູງເນາະ".
ທ່ານ ເວົ້າອີກວ່າ ແຂວງພາກເຫນືອ ທີ່ຈະຕ້ອງ ຣະມັດຣະວັງ ກໍມີແຂວງ ຫລວງນ້ຳທາ ບໍ່ແກ້ວ ອຸດົມໄຊ ແລະ ຫລວງພຣະບາງ ຍ້ອນວ່າ ໃນອາທິດນີ້ ຈະມີສະພາບ ຄວາມກົດດັນ ອາກາດຕໍ່າ ຢາກແນະນຳໃຫ້ ປະຊາຊົນ ຣະວັງ ສະພາບ ນ້ຳຂື້ນລົງ ໃນແມ່ນ້ຳ ແລະ ຕິດຕາມ ການພຍາກອນ ອາກາດ ຢ່າງໃກ້ຊິດ. ຖ້າມີຝົນຕົກຫນັກ ລຽນຕິດກັນຫລາຍມື້ ຄວນໂຍກຍ້າຍ ສີ່ງຂອງ ທີ່ຈຳເປັນ ຫລືສັດລ້ຽງຂື້ນທີ່ສູງ ແຂວງ ທີ່ມີສາຍນ້ຳ ໄຫລຜ່ານ ຄວນຣະວັງ ເປັນພິເສດ. ປັດຈຸບັນ ບາງເມືອງ ໃນແຂວງ ບໍຣິຄຳໄຊ ມີລາຍງານ ວ່າຖືກນ້ຳຖ້ວມ ຖນົນ ຫົນທາງ ເຮືອນຊານ ແລະໄຮ່ນາປະຊາຊົນໃນບາງເຂດ ແລ້ວ. ທ່ານເວົ້າເພີ້ມວ່າ:
"ໂຕນີ້ກໍຖ້ວມ ຢູ່ຄຸ້ມ ຫນອງກອກພຸ້ນ ແຖວນາງອຍບໍ ແຖວນາຄຳ ຫຍັງນີ້ແຫລະ".
ທ່ານເວົ້າວ່າ ຣະຫວ່າງ ວັນທີ 25 ຫາ 28 ກໍຣະກະດາ ເມືອງຄຳເກີດ ແລະ ເມືອງປາກກະດິງແຂວງບໍຣິຄຳໄຊມີຝົນຕົກຫນັກ ຕິດຕໍ່ກັນ ຫລາຍວັນ ເຮັດໃຫ້ເກີດ ນ້ຳຖ້ວມ ຫ້ອງການ ເຮືອນຊານ ແລະ ຮ້ານຄ້າ ຮ່ວມທັງໄຮ່ນາ ຂອງ ປະຊາຊົນ ຫລາຍແຫ່ງ.
ຄວນສົ່ງເຂົ້າມືຖືຖ້າຢາກໃຫ້ຂ່າວນີ້ທົ່ວເຖິງ.
