ວຽດນາມ ຈະເພີ່ມ ການລົງທຶນ ໃນລາວ ຂຶ້ນເປັນ 2 ເທົ່າ ພາຍໃນ ປີ 2015 ໂດຍອາສັຍ ຄວາມໄດ້ປຽບ ໃນການພົວພັນ ແບບພິເສດ ທີ່ມີກັບ ພັກ-ຣັຖ ໃນ ສປປ ລາວ.
ເຈົ້າໜ້າທີ່ ສູນກາງພັກ ປະຊາຊົນ ປະຕິວັດລາວ ຜູ້ຂໍສງວນຊື່ ທ່ານໜຶ່ງ ເປີດເຜີຍຕໍ່ ນັກຂ່າວ ວິທຍຸເອເຊັຽເສຣີ ວ່າ ຄະນະ ເລຂາທິການ ສູນກາງພັກ ຄອມມິວນິສ ວຽດນາມ ໄດ້ສົ່ງຈົດໝາຍ ເຖິງ ຄະນະ ເລຂາທິການ ສູນກາງພັກ ປະຊາຊົນ ປະຕິວັດລາວ ເມື່ອບໍ່ດົນ ມານີ້ ເພື່ອເນັ້ນເຖິງ ເປົ້າໝາຍ ຂອງວຽດນາມ ທີ່ ຈະຮັກສາ ຖານະເປັນ ປະເທດ ທີ່ ລົງທຶນ ໃນລາວ ຫລາຍອັນດັບ ໜຶ່ງຕໍ່ໄປ.
ປັຈຈຸບັນ ເຖິງວ່າ ວຽດນາມ ຈະເປັນ ອັນດັບໜຶ່ງ ໃນການລົງທຶນ ຢູ່ລາວ, ຣັຖວິສາຫະກິຈ ແລະ ບໍຣິສັດ ເອກກະຊົນ ວຽດນາມ ລົງທຶນ ຢູ່ລາວ 449 ໂຄງການ, ມູນຄ່າທັງໝົດ ຫລາຍກວ່າ 5 ພັນລ້ານ ໂດລາ ສະຫະຣັຖ ກໍຕາມ ແຕ່ທາງການ ວຽດນາມ ກໍຍັງບໍ່ວາງໃຈ ຍ້ອນຢ້ານວ່າ ການລົງທຶນ ຂອງ ຈີນແລະໄທ ຈະແຊງຕົນ ຂຶ້ນ ໃນມໍ່ໆນີ້.
ບໍຣິສັດ ເອກກະຊົນ ໄທ ທີ່ລົງທຶນ ຢູ່ລາວ ໃນ ປັຈຈຸບັນ ມີເຖິງ 760 ໂຄງການ ມູນຄ່າ ທັງໝົດ 4800 ລ້ານ ໂດລາ ສະຫະຣັຖ ຊຶ່ງກໍໃກ້ຄຽງ ກັບຈີນ ທີ່ມີ ການລົງທຶນ ໃນ 800 ກວ່າ ໂຄງການ ອັນເຮັດໃຫ້ ສູນກາງພັກ ຄອມມິວນິສ ວຽດນາມ ເຫັນວ່າ ທັງຈີນ ແລະໄທ ມີໂອກາດ ແຊງໜ້າຕົນໄດ້ ຍ້ອນວ່າ ໄທແລະຈີນ ຕ່າງກໍເນັ້ນໜັກ ການລົງທຶນ ໃນດ້ານ ພລັງງານ ບໍ່ແຮ່ ແລະ ດ້ານກະສິກັມ ຢູ່ລາວ ເຊັ່ນດຽວກັບ ວຽດນາມ. ອີກຢ່າງໜຶ່ງ ບໍຣິສັດ ຈີນແລະໄທ ຕ່າງກໍເປັນ ບໍຣິສັດ ລົງທຶນ ຣາຍໃຫຍ່ ກວ່າວຽດນາມ.
ດັ່ງນັ້ນ ຫົນທາງດຽວ ທີ່ວຽດນາມ ຈະສາມາດ ຄອງອັນດັບໜຶ່ງ ໃນການລົງທຶນ ຢູ່ສປປລາວ ຕໍ່ໄປ ຢ່າງໝັ້ນຄົງ ໄດ້ກໍຄື ອາສັຍ ໃຊ້ຄວາມສັມພັນ ແບບພິເສດ ທີ່ມີກັບ ຣັຖບານລາວ ເພື່ອຄວາມສະດວກ ໃນການລົງທຶນ ທຸກດ້ານ ໂດຍຜ່ານກົນໄກ ການປະຊຸມ ພາກ ທຸຣະກິດ ລາວ-ວຽດນາມ ເພື່ອຊຸກຍູ້ ໃຫ້ວຽດນາມ ເພີ່ມການລົງທຶນ ໃນລາວຂຶ້ນ ເປັນ 2 ເທົ່າໃຫ້ໄດ້ ພາຍໃນປີ 2015.
ຈີນອ້າປາກເຊີ່ເວີ່ ເຮີໆໆໆໆໆໆ
