ພໍ່ແມ່ຜູ້ປົກຄອງ ເປັນຫ່ວງນໍາ ພວກຊາວໜຸ່ມ ຕິດຢາເສບຕິດ ທີ່ມີ ເພີ້ມຂຶ້ນ ໃນຂະນະທີ່ ການຈັບກຸມ ກໍໄດ້ພຽງແຕ່ພວກຂາຍຣາຍຍ່ອຍ ເທົ່ານັ້ນ. ການຕິດ ຢາເສບຕິດ ຂອງຊາວໜຸ່ມລາວ ທີ່ນັບມື້ເພີ້ມຂຶ້ນ ສ້າງຄວາມເປັນຫ່ວງໃຫ້ແກ່ຜູ້ທີ່ເປັນພໍ່ແມ່ ໃນຂະນະທີ່ການປາບປາມ ແລະຈັບກຸມ ຂອງ ເຈົ້າໜ້າທີ່ ສາມາດເຮັດໄດ້ພຽງແຕ່ກັບພວກຂາຍ ຢາບ້າ ຣາຍຍ່ອຍເທົ່ານັ້ນ. ດັ່ງຊາວລາວໃນແຂວງສວັນນະເຂດເວົ້າ ກ່ຽວກັບເຣື້ອງນີ້ວ່າ:
“ຈັບໄດ້ແຕ່ໝວດເສພ ໝວດຂາຍຍິບຂາຍຍ່ອຍຫັ໋ນລະ ໝວດໃຫຍ່ ລະຈັບບໍ່ໄດ້, ຈັບໄດ້ກໍຄືໝວດ 5 ເມັດ 10 ເມັດ ຫັ້ນລະ ຂາຍນະ ຈັບໄດ້ຢູ່ ເຂົ້າໄປ ກະປ່ອຍອອກມາ ມີເງິນໄປເສັຽກະປ່ອຍອອກມາ.”
ພວກທີ່ຂາຍຢາບ້າ, ສ່ວນຫລາຍ ຈະເປັນຊາວໜຸ່ມ ທີ່ບໍ່ມີວຽກເຮັດ ຈຶ່ງຖືກພວກຄ້າ ຢາເສບຕິດ ຣາຍໃຫຍ່ ຫລອກໃຊ້, ຊຶ່ງລູກຄ້າ ເປົ້າໝາຍ ຂອງຂະເຈົ້າ ກໍແມ່ນກຸ່ມ ຊາວໜຸ່ມແລະນັກຮຽນທົ່ວໄປ. ໃນເມື່ອ ສ່ວນຫລາຍ ເຈົ້າໜ້າທີ່ ສາມາດຈັບໄດ້ ພຽງແຕ່ ພວກຂາຍ ຢາບ້າຣາຍຍ່ອຍ ເທົ່ານັ້ນ ຈຶ່ງເຮັດໃຫ້ ຜູ້ປົກຄອງ ເປັນຫ່ວງເພາະຢ້ານວ່າຈະບໍ່ ສາມາດ ປ້ອງກັນ ແລະ ບອກສອນ ລູກຕົນເອງໄດ້ ໃນຂະນະທີ່ ບາງຄອບຄົວ ກໍບໍ່ມີເວລາ ຢູ່ກັບຂະເຈົ້າ ຕລອດເວລາ:
“ພໍ່ແມ່ ກະເວົ້າບໍ່ໄດ້ລະ, ພໍ່ແມ່ ກະເມື່ອຍເວົ້າລະເດ, ເວົ້າບໍ່ຟັງລະ ເຂົາກະປ່ອຍລະ. ຂໍ (ເງິນ) ນໍາພໍ່ແມ່ ຫັ໋ນລະ ບໍ່ມີກະໄປ ຫາລັກຫາເລັມ ເອົາລະເນາະ. ເຮັດໄປໝົດ ວັຍຣຸ້ນບ້ານເຮົາ.”
ການຕິດ ຢາເສບຕິດ ຂອງຊາວໜຸ່ມ ໃນສປປລາວ, ເຈົ້າໜ້າທີ່ກ່ຽວຂ້ອງກໍໄດ້ເອົາໃຈໃສ່ປາບປາມ ພ້ອມທັງໄດ້ເຜີຍແຜ່ຂໍ້ມູນ ແກ່ປະຊາຊົນ ໃນເຂດທ້ອງຖິ່ນ ໃຫ້ຮູ້ເຖິງພັຍ ອັນຕຣາຍ ຂອງ ຢາເສບຕິດ ແລະສ້າງບ້ານ ປອດຢາເສບຕິດ ເປັນຕົວຢ່າງ. ເຖິງປານນັ້ນກໍຕາມ ຈໍານວນ ຊາວໜຸ່ມ ຕິດຢາບ້າ ຍັງມີເພີ້ມຂຶ້ນ ຫລາຍ ໃນຂະນະທີ່ ພວກພໍ່ຄ້າ ຣາຍໃຫຍ່ ຍັງລອຍນວນຢູ່ ແລະ ຢູ່ເບື້ອງຫລັງ ຂອງການຄ້າຂາຍ ຢາເສບຕິດ ນັ້ນ.
