ລາວໂຮມລາວ ເພື່ອປະຊາທິປະໄຕ

ສປປລາວ ໄດ້ຕິດຫນີ້ເກີນ ຄາດຫມາຍ ມາຕຖານສາກົນ

ໃນແຜນງົປມານສົກປີ 2013-2014 ຂອງຣັຖບານລາວທີ່ຈະເລີ້ມ ປະຕິບັດ ນັບແຕ່ ເດືອນ ຕຸລາ ນີ້ໄປຮອດ ທ້າຍເດືອນ ກັນຍາ ປີ 2014 ນັ້ນ ຣັຖບານ ຈະຕ້ອງຊໍາລະ ໜີ້ສີນ ພ້ອມກັບດອກເບັ້ຽ ທັງ ໝົດ 4,317 ຕື້ກີບຫລື $508 ລ້ານໂດລາ ໃນນັ້ນມີໜີ້ຕ່າງປະເທດ 2,029 ຕື້ກີບ ຫລືປະມານ $236.5 ລ້ານໂດລາ ແລະ ໜີ້ສີນພາຍ ໃນປະເທດ 2,029 ຕື້ກີບຫລືປະມານ $238.7 ລ້ານໂດລາ. ຕາມ ການເປີດເຜີຽ ຂອງເຈົ້າໜ້າທີ່ ກະຊວງການຄັງ ທີ່ບໍ່ປະສົງ ອອກຊື່.

ສໍາລັບໜີ້ຕ່າງປະເທດນັ້ນເພີ້ມຂຶ້ນ 30 ສ່ວນຮ້ອຍແລະ ໜີ້ພາຍໃນ ຫລຸດລົງ 21 ສ່ວນຮ້ອຍ ເມື່ອທຽບກັບ ສົກງົປມານ ປີ 2012-13 ຜ່ານມາ. ແຕ່ເນື່ອງຈາກວ່າ ໃນສົກປີ 2012-2013 ຣັຖບານຊໍາລະ ໜີ້ສີນພາຍໃນດ້ວຍການຈໍາຫນ່າຍພັນທະບັດທີ່ຕ້ອງຈ່າຍດອກເບັ້ຽ ຄືນ ພາຍໃນລະຍະ 2-3 ປີ ເຮັດໃຫ້ໜີ້ສີນ ພາຍໃນ ເພີ້ມຂຶ້ນເປັນ ຈໍານວນເງິນ 4,421 ຕື້ກີບ ຫລືປະມານ $520 ລ້ານໂດລາ.

ຖ້າຫາກລວມເຂົ້າ ກັບໜີ້ ພາຍໃນອື່ນໆ ທີ່ຣັຖບານ ສ້າງຂຶ້ນ ນອກຣະບົບ ງົປມານ ໂດຍໃຫ້ ບໍຣິສັດ ເອກກະຊົນ ລົງທຶນໃຫ້ກ່ອນ ລ່ວງໜ້າ ເພື່ອສ້າງໂຄງຮ່າງ ພື້ນຖານຕ່າງໆ ໃນທົ່ວ ປະເທດນັ້ນ ເຮັດໃຫ້ ຣັຖບານ ມີໜີ້ສິນພາຍໃນ ທັງໝົດ 18,000 ຕື້ກີບ ຫຼືປະມານ ເກືອບ $2,300 ລ້ານໂດລາ ໃນເວລານີ້. ຖ້າລວມກັບໜີ້ສີນ ຕ່າງປະເທດ $3,500 ລ້ານໂດລາ ອີກ ທີ່ມີຢູ່ ໃນປັດຈຸບັນ ຈະເຮັດໃຫ້ ໜີ້ສີນ ຣັຖບານລາວ ທັງໝົດ ຕົກຢູ່ ປະມານ $5,800 ລ້ານໂດລາ. ສປປລາວ ໄດ້ຕິດຫນີ້ເກີນ ຄາດຫມາຍ ມາຕຖານສາກົນ ທີ່ກຳນົດ ບໍ່ໃຫ້ເກີນ 45% ຂອງຍອດ ຜົລຜລິດຮວມ ຫລື GDP ຂອງປະເທດ.