ເຈົ້າຫນ້າທີ່ ກ່ຽວຂ້ອງ ແຂວງຄຳມ່ວນທ່ານນື່ງເວົ້າວ່າ ນັກລົງທືນ ລາວ ແລະຕ່າງປະເທດ ຈະຮ່ວມກັນເປີດ ບ່ອນຫລີ້ນການພະນັນ ຕູ້ເກມຫລື slot machine ຢູ່ໃນບໍຣີເວນສົ້ນຂົ້ວຂ້າມ ແມ່ນ້ຳຂອງ ແຫ່ງທີສາມຣະຫວ່າງແຂວງຄຳມ່ວນຫານະຄອນພະນົມ ທ້າຍປີນີ້ ໂດຍເປົ້າຫມາຍຫລັກ ເພື່ອດຶງດູດນັກລົງທືນ ແລະນັກຫລີ້ນການ ພະນັນໃນລາວແລະຕ່າງປະເທດພ້ອມທັງນັກທ່ອງທ່ຽວ. ດັ່ງທ່ານ ກ່າວໃນຕອນນື່ງວ່າ:
“ຕູ້ເກມສລອດ ທັມມະດານີ້ລະ ຂະເຈົ້າກຳລັງ ຊີ່ເປີດນີ້ແຫລະ ປະ ມານທ້າຍປີ ເດືອນສີິບເອັດ ສີບສອງນີ້ແຫລະ ຕູ້ເກມໂຕນີ້ ແມ່ນ ບໍຣິສັດລາວນີ້ນະ ຮ່ວມທືນກັບມາເລບໍ ແມ່ນຫຍັງ ນີ້ແຫລະ.”
ທ່ານເວົ້າຕໍ່ໄປວ່າ ຕູ້ເກມທີ່ຈະເປີດຢູ່ເມືອງທ່າແຂກນັ້ນ ຈະບໍ່ໃຫຍ່ ເທົ່າກັບຢູ່ບ່ອນຫລີ້ນ ສວັນ-ເວເກສ ແຂວງສວັນະເຂດ ຫລືຢູ່ຂົວ ມິຕພາບ ລາວໄທ ແຫ່ງທີ່ນື່ງ ໃນເຂດ ນະຄອນຫລວງ ວຽງຈັນ ແຕ່ ອາດມີ ຕູ້ເກມເຖິງ 200 ຫາ 300 ເຄື່ອງຂື້ນໄປ ເພື່ອຮອງຮັບ ນັກ ຫລີ້ນການພະນັນ ໄດ້ຫລາຍບ່ອນ ຫລີ້ນການພະນັນ ດັ່ງກ່າວ ຈະເປັນແຫລ່ງ ທີສອງ ທີ່ເມືອງທ່າແຂກ ຊື່ງໃນປັດຈຸບັນ ມີບ່ອນນື່ງແລ້ວ ຢູ່ໃກ້ແຄມ ຂອງ ໃນແຕ່ລະມື້ ຈະມີນັກຫລີ້ນ ການພະນັນເຂົ້າໄປຫລີ້ນເປັນຈຳນວນຫລວງຫລາຍ ບໍ່ວ່າຈະເປັນຄົນລາວ ຫຼືຕ່າງປະເທດ.
ຫນັງສືພິມ The Nation ຂອງໄທລາຍງານ ໃນວັນທີ 9 ເດືອນກັນຍາ ຜ່ານມາວ່າ ທ່ານສົມສວາດ ເລັ່ງສວັດ ຮອງນາຍົກຣັຖມົນຕຣີ ລາວ ເວົ້າວ່າສປປລາວ ຈະບໍ່ອະນຸຍາດ ສຳປະທານບ່ອນຫລີ້ນກາຊີໂນແຫ່ງ ໃຫມ່ອີກ. ແຕ່ເຖິງຢ່າງໃດກໍຕາມ ເຖິງແມ່ນຈະບໍ່ມີ ກາຊີໂນ ເພີ້ມອີກ ແຕ່ຍັງມີ ນັກລົງທືນ ປະເພດຕູ້ເກມຢູ່ ຊື່ງເປັນການ ພະນັນອີກແບບນື່ງ ບໍ່ຕ່າງຫຍັງ ຈາກການພະນັນ ແບບອື່ນໆທີ່ຈະຫລອກ ລວງຊາວບ້ານ ໃຫ້ເຂົ້າໄປຫລີ້ນແລະຈະສ້າງ ຄວາມເສັຽຫາຍ ແລະຄວມທຸກຍາກ ໃຫ້ແກ່ປະຊາຊົນ ທ້ອງຖີ່ນຫລາຍຂື້ນບໍ່ວ່າ ຈະມາຈາກ ຝັ່ງໄທຫລືຝັ່ງລາວ.
