ທຸກໆຕຳແໜ່ງນຳພາ,ຕຳແໜ່ງຄຸ້ມຄອງ ລ້ວນແລ້ວແຕ່ແມ່ນສະມາຊິກພັກທັງນັ້ນເປັນຜູ້ທີ່ຖຶກມອບໝາຍ, ຍ້ອນຄວາມໄວ້ເນື້ອເຊື່ອໃຈ ວ່າພວກກ່ຽວຈະຮັບໃຊ້ຊາດ,ຮັບໃຊ້ປະຊາຊົນໄດ້ຕາມຄຳຂັວນຂອງພັກທີ່ວ່າ: ພັກປະຊາຊົນ, ໂດຍປະຊາຊົນ ແລະເພື່ອປະຊາຊົນ ດັ່ງນັ້ນ ສະມາຊິກພັກຈຶ່ງມີບົດບາດໃນການຊີ້ນຳ-ນຳພາ ແລະເປັນຜູ້ຕັດສິນບັນຫາທີ່ສຳຄັນຂອງຊາດ ຕາມແຕ່ລະລຳດັບຂັ້ນຂອງການຊີ້ນຳ-ນຳພາ; ແຕ່ບັນດາສະຫາຍສະມາຊິກພັກເລົ່ານັ້ນພັດເຫຼີງອຳນາດ ທັງຫຼົງໄຫຼໃນອະບາຍຍະມຸກຕ່າງໆ ທີ່ສັງຄົມທຶນນິຍົມນຳເຂົ້າມາລອກລໍ້ ເຮັດໃຫ້ເກີດແນວຄິດໂລບມາກໂລພາ, ເກີດແນວຄິດອະພິສິດ ໃຜເວົ້າຫຍັງໃຫ້ບໍ່ໄດ້ ຕາມກູຢູ່ ສູ້ກູມຶງຕາຍ, ພັກດຽວແຕ່ຫຼາຍພວກ, ຈຸ້ມເຈື້ອເຊື້ອສາຍ, ນຳໃຊ້ແນວທາງຂອງພັກຜິດຜ້ຽນໄປ ເຊັ່ນຄຳວ່າ ຮູ້ຈຳແນກມິດ-ສັດຕູຈະແຈ້ງ ຊຶ່ງຄວາມໝາຍຈິງແມ່ນ ຕ້ອງຮູ້ວ່າແມ່ນໃຜເປັນກຳລັງອິດທິປໍລະປັກກັບຊາດ,ກັບພັກປະຊາຊົນ ແຕ່ນີ້ເຂົາພັດເວົ້າວ່າ ຈຳແນກເບິ່ງດຸວ່າໃຜແມ່ນຄົນເຮົາ ໃຜບໍ່ແມ່ນ ແລ້ວກໍ່ຫາທາງທຳລາຍອີກຝ່າຍ ນີ້ລະຄືຈຸດເລີ້ມຕົ້ນຂອງການທໍລະຍົດພັກເອງ, ບັນດາສະຫາຍເລົ່ານັ້ນຂຽນປະຫວັດເພື່ອຕົວະພັກວ່າ ຕົນເອງມີຄວາມເຊື່ອໝັ້ນຢ່າງຕາຍໃຈ,ຊື່ສັດຕໍ່ຊາດ,ຈິງໃຈຮັບໃຊ້ປະຊາຊົນ ແຕ່ການກະທຳມັນກົງກັນຂ້າມກັນ: ເຮັດເພື່ອຕົນເອງ, ເພື່ອວົງສາຄະນາຍາດ, ເພື່ອພວກພ້ອງ ຊຶ່ງເຈດຕະນາຫຼັກຂອງພວກເຂົາຄືກອບໂກຍເອົາວັດຖຸເງິນທອງ-ອຳນາດເພື່ອມາບຳເລີ ແຕ່ພວກເຂົາບໍ່ໄດ້ຄິດເລີຍວ່າພວກເຂົາກຳລັງທໍລະຍົດພັກທີ່ຕົນເອງຍົກຍ້ອງເຊີດຊູ, ເຮັດໃຫ້ສັດຕູຖືເອົາຈຸດນີ້ໂຈມຕີ,ເປົ່າຂ່າວ ປຸກລະດົມເພື່ອຫາແນວຮ່ວມ ເພື່ອຫວັງໂຄ້ນພັກຂອງພວກສະຫາຍ. ຖ້າຫາກແຕ່ລະສະຫາຍຫາກຍັງບໍ່ກ້າຕຳນິ ບໍ່ກ້າປ່ຽນແປງຕົນເອງ ເຮົາເຊື່ອແນ່ວ່າພັກກຳລັງສະສົມຄົນທໍລະຍົດໄວ້ ຊຶ່ງພວກເຂົາພ້ອມແລ້ວທີ່ຈະລະເບີດຂຶ້ນໄດ້ທຸກເວລາເພື່ອທຳລາຍພັກ
ສະນັ້ນ ມັນເຖີງເວລາແລ້ວທີ່ສະມາຊິກພັກທຸກຂັ້ນນັບແຕ່ ຂັ້ນຕໍ່າຫາຂັ້ນສູງ(ໂດຍສະເພາະຂັ້ນສູງ$ ຄວນທີ່ຈະເປັນແບບຢ່າງໃນການແກ້ໄຂ-ປັບປຸງຕົວເອງ ແລ້ວພ້ອມກັນປັບປ່ຽນພືດຕິກຳໃຫ້ໄດ້ຕາມທີ່ໄດ້ຂຽນໄວ້ ຄື 4ບຸກທະລຸ ຊຶ່ງນັ້ນມັນບໍ່ແມ່ນພິໄນກຳທີ່ຂຽນໄວ້ເພື່ອຖ້າເປີດອ່ານຊື່ໆ ແຕ່ແມ່ນທິດເຍືອງທາງໃຫ້ພວກເຮົາເອົາມາຜັນຂະຫຍາຍ ຜູ້ນ້ອຍກະຄອຍຖ້າຜູ້ໃຫຍ່ປັບປ່ຽນ ແຕ່ຜູ້ໃຫຍ່ຫັ້ນລະພ້ອມແລ້ວຫຼືຍັງ
ພຶດຕິກຳຕົ້ນຕໍຂອງສະມາຊິກພັກຜູ້ມີຕຳແໜ່ງໂດຍລວມສັງເຂບໄດ້ດັ່ງນີ້:
1. ຫຼີ້ນຊູ້ຜ່ານສາວ, ມີເມຍນ້ອຍຫ້ອຍເມຍປາຍ, ກິນເຫຼົ້າ ເມົາຢາ
2. ສະແຫວງຫາຜົນປະໂຫຍດໃສ່ຕົວທຸກຮູບແບບ(ສໍ້ລາດບັງຫຼວງ, ສໍ້ຫຼວງບັງລາດ) ຖ້າໄດ້ແລ້ວຮູ້ຈັກພໍກະຍັງຖືວ່າຍັງມີສະຕິພັກຢູ່(ຢ່າຊົ່ວເກີນນີ້)
3. ຫາທຸກວິທີທາງເພື່ອໃຫ້ໄດ້ມາຊຶ່ງອຳນາດ-ບາລະມີ (ເກີດການຊື້-ຂາຍຕຳແໜ່ງ ຢ່າງແຜ່ຫຼາຍ) ຄົນດີ ມີຄວາມຮູ້ ຄວາມສາມາດ ແຕ່ບໍ່ມີເງິນກໍ່ເລີຍໝົດໂອກາດທີ່ຈະໄດ້ຮັບໃຊ້ຊາດ,ຮັບໃຊ້ພັກ.
4. ຫາທຸກວິທີເພື່ອລຳລາຍກັນເອງ(ໝາຍເຖີງສະມາຊິກພັກດ້ວຍກັນ ແຕ່ບໍ່ແມ່ນພວກດຽວກັນ)
5. ອັນສຳຄັນ ຄືການທຳລາຍຄົນດີ ຄົນມີຄວາມຮູ້ ຄວາມສາມາດ ປິດກັ້ນທຸກຊ່ອງຫວ່າງເພື່ອບໍ່ໃຫ້ບຸກຄົນເລົ່ານີ້ໄດ້ຮັບໃຊ້ຊາດຕາມເຈດຕະນາລມຂອງເຂົາ
6. ປິດບັງພັກໃນທຸກໆຂໍ້ຄົງຄ້າງ ທີ່ເຫັນວ່າຕົນເອງເປັນຜູ້ສ້າງຂຶ້ນ ໂດຍບໍ່ຄຳນຶງເຖີງຜົນເສຍທີ່ຈະຕາມມາ.
ບາງບັນຫາຂ້າງເທິງນີ້ ຖ້າເບິ່ງຜິວເຜີນກໍ່ຄືການສໍ້ລາດບັງຫຼວງ ຖ້າເບິ່ງເລິກໆ ລະກໍນີ້ລະ ຄືບາດກ້າວຂອງການທໍລະຍົດພັກ
ລາວໂຮມລາວ ເພື່ອປະຊາທິປະໄຕ
|
|
||
