ມຽນມາປະກາດປ່ອຍນັກໂທດທາງການເມືອງ ຈໍານວນ 56 ຄົນ ໃນວັນອັງຄານມື້ນີ້ ໃນການນິລະໂທດກໍາ ເທື່ອຫຼ້າສຸດ ຕາມຄໍາສັ່ງຂອງປະທານາທິບໍດີ Thein Sein. ຊື່ສຽງຂອງພວກທີ່ໄດ້ຮັບນິລະໂທດກໍາໃນຄັ້ງນີ້ ຍັງບໍ່ຮູ້ໃນທັນທີ ນີ້ເທື່ອ ແຕ່ທາງເຈົ້າໜ້າທີ່ກ່າວວ່າ ມີຮວມທັງ ພວກຊົນເຜົ່ານ້ອຍ ຫົວແບ່ງແຍກດິນແດນ ຫຼາຍໆຄົນນໍາ. ເປັນທີ່ເຊື່ອກັນວ່າ ຍັງມີນັກໂທດທາງການເມືອງຈໍານວນຫຼາຍສິບ ຄົນ ຕິດຄ້າງຢູ່ໃນຄຸກຢູ່ໃນປະເທດດັ່ງກ່າວ ທີ່ເມື່ອກ່ອນຢູ່ໃຕ້ການ ປົກຄອງຂອງພວກທະຫານ ແຕ່ໄດ້ທໍາການປະຕິຮູບຢ່າງ ໃຫຍ່ຢ່າງຕໍ່ເນື່ອງກັນມາ ໃນໄລຍະ ບໍ່ເທົ່າໃດປີມານີ້. ໃນການຢ້ຽມຢາມກຸງລອກດອນປະເທດອັງກິດໃນເດືອກໍລະກົດແລ້ວນີ້ ປະທານາທິບໍດີ Thein Sein ໄດ້ໃຫ້ຄໍາໝັ້ນສັນຍາວ່າ ຈະປ່ອຍບັນດານັກໂທດທາງການເມືອງທັງໝົດ ພາຍໃນທ້າຍປີນີ້. ພວກນັກວິຈານໄດ້ຮຽກຮ້ອງໃຫ້ທ່ານປ່ອຍບັນດານັກໂທດທາງການເມືອງໃນທັນທີ ແລະກ່າວວ່າ ພວກນັກໂທດບໍ່ຄວນຖືກໃຊ້ເປັນເຄື່ອງມື ເພື່ອໃຫ້ໄດ້ຮັບການຍິນຍອມຕ່າງໆ ຈາກຝ່າຍຕາເວັນຕົກ. ການນີລະໂທດກໍາເທື່ອຫລ້າສຸດນີ້ ມີຂຶ້ນໃນວັນດຽວກັນກັບ ທີ່ປະທານາທິບໍດີມຽນມາກໍາລັງ ມຸ່ງໜ້າໄປຍັງປະເທດ Brunei ເພື່ອເຂົ້າຮ່ວມກອງປະຊຸມຂອງບັນດາຜູ້ນໍາຂົງເຂດແລະຜູ້ນໍາ ນາໆຊາດ.
