ໃນປີນີ້ມີຄົນລາວ ກວ່າ 56 ພັນ ອອກໄປຊອກຫາວຽກເຮັດງານທຳ ຢູ່ໄທ ໃນນັ້ນ 18 ພັນຄົນ ເຮັດວຽກແບບຖືກຕ້ອງ ຕາມຂໍ້ຕົກລົງ ຣະ ຫວ່າງລາວ-ໄທ. ເຈົ້າຫນ້າທີ່ລາວເວົ້າວ່າ ສາເຫດທີ່ແຮງງານລາວ ເຂົ້າໄປເຮັດ ວຽກໃນໄທຫລາຍຂື້ນນັ້ນ ຍ້ອນວ່າບໍ່ມີວຽກເຮັດ ຢູ່ປະເທດ ລາວ ຫຼືວ່າ ວຽກຢູ່ລາວສ່ວນໃຫຍ່ ເປັນວຽກ ທີ່ໃຊ້ຝີມື ທີ່ນັກລົງທຶນ ຕ້ອງການ:
"ຈົບຮຽນ ຈົບມາກໍມີຫລາຍເນາະ ຈົບວິຊາສະເພາະມາ ກໍບໍ່ມີວຽກເຮັດງານທຳ ແຕ່ລະບ່ອນໃຜ ກໍໄປຮຽນຊໍ້າກັນມາ ຄືວ່າບັນຊີ ການເງີນ ມັນບໍ່ມີບ່ອນເຮັດວຽກ ເລີຍເຮັດໃຫ້ ວ່າງງານ ປາດຢາງພາລາ ບາງບໍຣິສັດ ກໍຮັບເອົາພຽງແຕ່ 1 ພັນຄົນ ແລ້ວແຮງງານ ເຮົາຊອກບໍໄດ້ ສເນີບໍ່ໄດ້ ເຂົາກໍເອົາເຂົ້າມາ".
ທ່ານກ່າວຕໍ່ໄປວ່າ ໄທເປັນປະເທດ ທີ່ມີແຮງງານລາວ ເຂົ້າໄປເຮັດວຽກຫລາຍ ກວ່າຫມູ່ ແຮງງານລາວສ່ວນໃຫຍ່ ທີ່ໄປເຮັດວຽກໃນໄທ ຈະຮຽນຮອດຊັ້ນປະຖົມ ແລະ ບາງຄົນກໍຮອດຂັ້ນມັທຍົມປາຍ ຍ້ອນພາສາ ປາກເວົ້າແລະວັທນະທັມ ຄ້າຍຄືກັນ ແລະຄ່າຈ້າງແຮງງານ ໃນໄທ ກໍສູງກວ່າໃນລາວ. ແຮງງານລາວ ສ່ວນຫລາຍນິຍົມ ໄປເຮັດວຽກ ໃນໂຮງງານ ອຸດສາຫະກັມ ກໍ່ສ້າງ ພະນັກງານຮ້ານອາຫານ ແມ່ບ້ານ ແລະ ຊາວປະໂມງ.
ເຫດຜົລອັນທີ່ສອງ ທີີ່ແຮງງານລາວ ໄປເຮັດວຽກໃນໄທ ຫລາຍກໍຍ້ອນວ່າ ນັກລົງທຶນຕ່າງຊາດໃນລາວ ຕ້ອງການແຮງງານ ທີ່ມີຝີມື ໃນ ການເຮັດວຽກ ແຮງງານລາວສ່ວນໃຫຍ່ ມີຄວາມຮູ້ຫນ້ອຍຈື່ງບໍ່ສາມາດ ເຮັດວຽກໃນລາວໄດ້. ການທີ່ແຮງງານລາວຍ້າຍຖິ່ນໄປ ເຮັດວຽກ ຢູ່ໃນປະເທດ ເພື່ອນບ້ານ ເປັນການ ສ່ຽງຕໍ່ຄວາມປອດພັຍ ຂອງພວກຂະເຈົ້າ ຈາກກຸ່ມ ຄ້າມະນຸດ ແລະ ຄ້າປະເວນີ ໃນໄທ.
