ເຈົ້າຫນ້າທີ່ທ່ານນຶ່ງເວົ້າວ່າ ຊາວບ້ານສີບຸນເຮືອງ ເມືອງຕົ້ນເຜີ້ງແຂວງບໍ່ແກ້ວ ໄດ້ຮັບຄວາມເດືອດຮ້ອນ ຢ່າງຫນັກເນື່ອງຈາກໂຄງການ ສ້າງ ສນາມບີນແລະສນາມກ໊ອຟຂອງບໍຣິີສັດດອກງີ້ວຄໍາ ຂອງນັກລົງທຶນຈີນ ກຸ່ມໂຣມັນກຣຸບ ໃນເຂດສາມຫລ່ຽມຄໍາ ໄປກວມເອົມດິນໄຮ່ນາ ຂອງ ປະຊາຊົນຊາວບ້ານ.
ໃນຣະຫວ່າງທ້າຍປີ 2013 ທ່ານ ສົມສວາດ ເລັ່ງສວັດໄດ້ໄປໂອ້ລົມກັບຊາວບ້ານວ່າ ນັກລົງທຶນຈີນຈະເຂົ້າມາສ້າງຄວາມຈະເຣີນໃຫ້ແກ່ພວກ ເຮົາ ແຕ່ຊາວບ້ານບໍ່ສົນໃຈ ບາງຄົນເວົ້າວ່າ ທຸກມື້ນີ້ຊີວິດລໍາບາກກວ່າເກົ່າ ບໍ່ມີຫຍັງດີຂຶ້ນເລີຍ.
ຊາວບ້ານກຸ່ມທີ່ວ່ານັ້ນໄດ້ອອກເງີນກັນຜູ້ລະເລັກລະນ້ອຍເພື່ອສົ່ງຕົວແທນ ມາຍື່ນຄໍາຮຽກຮ້ອງຕໍ່ພັກຣັຖ ທີ່ນະຄອນຫລວງວຽງຈັນ ແຕ່ຈົນເຖິງ ປັດຈຸບັນກໍບໍ່ມີຄໍາຕອບ ແລະບໍ່ມີການແກ້ໄຂຫຍັງເລີິຍ.
ພນັກງານຣັຖຄົນນື່ງເວົ້າວ່າ ທຸກມື້ນີ້ພນັກງານຣັຖ ກໍບໍ່ກ້າຍ່າງເຂົ້າໄປບ້ານສີບຸນເຮືອງ ຍ້ອນຢ້ານປະຊາຊົນເອົາຟ້າໄລ່ຟັນ ເພາະເຂົາຖືກຕົວະ ຕົ້ມເອົາເນື້ອທີ່ຈາກນາຍທຶນຈີນ ບ້ານສີບຸນເຮືອງ ມີປະມານ 130 ຫລັງຄາເຮືອນ.
ນອກຈາກບ້ານ ສີບຸນເຮືອງແລ້ວ ກໍຍັງມີພື້ນທີ່ອື່ນໆ ໃນເຂດຊົນນະບົດ ທີ່ຖືກຈີນ ສຳປະທານ ປູກຢາງພາລາ ທີ່ກວມເອົາດີນໄຮ່ນາຮົ້ວສວນ ຂອງຊາວບ້ານປາສຈາກການໃຫ້ຄ່າຊົດເຊີຍທີ່ສົມເຫດສົມຜົລ. ຣັຖບານລາວໄດ້ອະນຸມັດ ໃຫ້ບໍຣິສັດຄິງສ໌ໂຣມັນສ້າງກາຊີໂນ ທີ່ແຂວງບໍ່ແກ້ວ ໃນເນື້ອທີ່ປະມານ 10 ພັນເຮັກຕາ ແລະບາງສ່ວນເປັນດິນຊາວບ້ານ.
