ລາວພຍາຍາມເປັນຣັຖແຫ່ງ ກົດໝາຍ

ສປປລາວ ໄດ້ຕັ້ງເປົ້າໝາຍທີ່ຈະສ້າງຕົນເອງໃຫ້ເປັນປະເທດທີ່ປົກ ຄອງດ້ວຍກົດໝາຍ ເພື່ອຊ່ວຍ ພັທນາ ປະເທດຊາດ, ຄ້ຳປະກັນ ຄວາມ ຍຸຕິທັມ ທາງສັງຄົມ ແລະ ຄວາມໂປ່ງໄສ ເພື່ອໃຫ້ ປະຊາ ຊົນ ທຸກຖ້ວນໜ້າ ສາມາດ ເຂົ້າເຖິງ ຂະບວນ ການຍຸຕິທັມ ໄດ້. ອີງຕາມ ຣາຍງານ ຂອງ ໜັງສືພິມ ວຽງຈັນທາມສ໌.

ສປປລາວ ໄດ້ປະກາດວ່າ ຈະພັທນາປະເທດ ໃຫ້ກາຍເປັນປະເທດ ທີ່ປົກຄອງ ດ້ວຍກົດໝາຍ ຢ່າງສົມບູນແບບ ໃນປີ 2020 ແລະ ມາ ຮອດປັດຈຸບັນ ຣັຖບານລາວ ມີກົດໝາຍ ແລ້ວປະມານ 100 ສະບັບ ທັງ ສະບັບ ປັບປຸງໃໝ່ ແລະ ສະບັບ ທີ່ຫາກໍ່ຖືກ ຮັບຮອງເອົາ. ແຕ່ ສິ່ງທີ່ ທ້າທາຍ ກໍຄື ບັນຫາ ການບໍ່ເຄົາຣົບ ກົດໝາຍ ກົດໝາຍ ບໍ່ຖືກ ປະຕິບັດ ຢ່າງເຂັ້ມງວດ ຕົວຢ່າງ:

ກົດໝາຍ ວ່າດ້ວຍ ການຕ້ານ ການສໍ້ຣາສ ບັງຫລວງ ແມ່ນຖືກ ເມີນເສີຍ ຫລາຍທີ່ສຸດ ແລະເຖິງວ່າຈະມີກົດໝາຍ ດັ່ງກ່າວ ແຕ່ການ ສໍ້ຣາສ ບັງຫລວງ ໃນຖັນແຖວ ພນັກງານ ຂັ້ນສູງ ຂອງຣັຖ ຍັງມີ ຢ່າງກວ້າງຂວາງ ຈົນເຮັດໃຫ້ ປະເທດລາວ ມີບັນຫາ ທາງດ້ານ ການເງິນ ເພາະວ່າ ງົບປະມານ ຮົ່ວໄຫລ ໄປກັບ ການສໍ້ໂກງ ຈົນບໍ່ສາມາດ ຈ່າຍເງິນເດືອນ ໃຫ້ພນັກງານ ຂອງຣັຖ ໄດ້ທັນ ເວລາ.

ບັນຫາການ ລ່ວງຣະເມີດ ສິດທິມະນຸດ ຜູ້ເຮັດຜິດ ກໍຄື ເຈົ້າໜ້າທີ່ ຂອງຣັຖ ໄດ້ໃຊ້ອໍານາດ ຂອງຕົນ ໃນການ ຈັບກຸມ ປະຊາຊົນ ໃນ ກໍຣະນີ ຂັດແຍ່ງ ທີ່ດິນ ໂດຍບໍ່ມີ ໝາຍຈັບ ຈາກ ອັຍການສານ ບໍ່ມີການ ສືບສວນ ສອບສວນ ຫຍັງເລີຍ. ແຕ່ເຈົ້າໜ້າທີ່ ຜູ້ກະທຳ ຄວາມຜິດ ບໍ່ໄດ້ຖືກ ລົງໂທດ ຫຍັງໝົດ.

ນອກຈາກນີ້ ການເຜີຍແພ່ກົດໝາຍ ໃຫ້ປະຊາຊົນຮັບຮູ້ ຍັງບໍ່ກວ້າງຂວາງ ແລະຖືກຈຳກັດ  ທີ່ຜ່ານມາການເຜີຍແພ່ກົດໝາຍຢູ່ບາງເຂດກໍຖືກ ສັ່ງຫ້າມບໍ່ໃຫ້ ມີການເຜີຍແພ່ ໃຫ້ປະຊາຊົນໄດ້ຮັບຮູ້ ຕົວຢ່າງ:

ອຳນາດ ການປົກຄອງ ເມືອງຫົງສາ ແຂວງ ໄຊຍະບຸຣີ ຫ້າມບໍ່ໃຫ້ ມີການເຜີຍແພ່ ກົດໝາຍ ໃຫ້ ປະຊາຊົນ ໂດຍສະເພາະ ກົດໝາຍທີ່ດິນ ແລະ ດຳຣັຖ 192 ວ່າດ້ວຍ ຄ່າຊົດເຊີຍ ຕໍ່ຜູ້ທີ່ໄດ້ຮັບ ຜົນກະທົບ ຈາກການ ສຳປະທານ ທີ່ດິນ.

ທັງໝົດນີ້ແມ່ນ ສິ່ງທີ່ທ້າທາຍ ສຳລັບ ສປປລາວ ທີ່ຈະພັທນາ ໃຫ້ກາຍ ເປັນປະເທດ ທີ່ປົກຄອງ ດ້ວຍກົດໝາຍ.