ລາວໂຮມລາວ ເພື່ອປະຊາທິປະໄຕ

Members Login

Post Info

TOPIC: ລັດໃຊ້ງົບເກືອບໜຶ່ງພັນຕື້ກີບ ພັດທະນາພື້ນຖານໂຄງລ່າງ ແຂວງໄຊສົມບູນ

Anonymous

Date: Feb 9, 2014

ລັດໃຊ້ງົບເກືອບໜຶ່ງພັນຕື້ກີບ ພັດທະນາພື້ນຖານໂຄງລ່າງ ແຂວງໄຊສົມບູນ	Permalink

ລັດໃຊ້ງົບເກືອບໜຶ່ງພັນຕື້ກີບ ພັດທະນາພື້ນຖານໂຄງລ່າງ ແຂວງໄຊສົມບູນ ລັດຖະບານໄດ້ໃຊ້ງົບເກືອບ 1 ພັນຕື້ກີບ ເພື່ອພັດທະນາພື້ນຖານໂຄງລ່າງ ໂດຍສະເພາະກໍ່ແມ່ນເສັ້ນທາງ ຈຳນວນ 3 ເສັ້ນ ຢູ່ພາຍໃນແຂວງໄຊສົມບູນ ເຊິ່ງເປັນແຂວງໃໝ່ ເພື່ອເປັນການສ້າງເສັ້ນທາງຄົມມະນາຄົມ ເຊື່ອມຕໍ່ລະຫວ່າງເມືອງຕໍ່ເມືອງ ແລະ ແຂວງໄຊສົມບູນໄປຫາແຂວງອ້ອມຂ້າງ ເປັນຕົ້ນກໍ່ແມ່ນທະລຸໃສ່ແຂວງຊຽງຂວາງ ບໍລິຄຳໄຊ ວຽງຈັນ ແລະ ນະຄອນຫຼວງວຽງຈັນ ເພື່ອເຮັດໃຫ້ການໄປມາ ກໍ່ຄືການຄົມມະນາຄົມ-ຂົນສົ່ງມີຄວາມສະດວກ ເນື່ອງຈາກວ່າເສັ້ນທາງດັ່ງກ່າວນີ້ ມີບົດບາດສຳຄັນຕໍ່ການພັດທະນາເສດຖະກິດ-ສັງຄົມຂອງແຂວງໄຊສົມບູນ. ພິທີເຊັນສັນຍາໂຄງການກໍ່ສ້າງເສັ້ນທາງປູຢາງສອງຊັ້ນ 3 ເສັ້ນທາງພາຍໃນແຂວງໄຊສົມບູນ ໄດ້ມີຂຶ້ນວັນທີ 3 ກຸມພາ 2014 ຜ່ານມານີ້ ທີ່ສະໂມສອນຫ້ອງວ່າການປົກຄອງແຂວງໄຊສົມບູນ ຮ່ວມລົງນາມຄັ້ງນີ້ ຕາງໜ້າໃຫ້ລັດຖະບານກໍ່ຄືເຈົ້າຂອງໂຄງການໂດຍແມ່ນທ່ານ ດຣ. ສົມບັດ ເຢຍລີເຮີ ເລຂາພັກແຂວງ ເຈົ້າແຂວງໄຊສົມບູນ ທ່ານ ດຣ. ຄຳລຽນ ພົນເສນາ ລັດຖະມົນຕີຊ່ວຍວ່າການກະຊວງແຜນການ ແລະ ການລົງທຶນ ແລະ ຕາງໜ້າຜູ້ຮັບເໝົາກໍ່ສ້າງ 3 ບໍລິສັດ ໂດຍແມ່ນທ່ານ ວິໄລ ສີລາຊາ ປະທານບໍລິສັດ ທະວີໂຊກພັດທະນາກໍ່ສ້າງ ຈຳກັດ ທ່ານ ຄຳໄຊ ບຸນມີສີດາວົງ ຜູ້ອຳນວຍການບໍລິສັດ ຫຼັກໄຊກໍ່ສ້າງຂົວ-ທາງ ຈຳກັດຜູ້ດຽວ ແລະ ທ່ານ ບຸນທັນ ປັນຍາທິລາດ ຜູ້ອຳນວຍການບໍລິສັດ ປັນຍາທິລາດກໍ່ສ້າງຂົວ-ທາງເຄຫາ ແລະ ຊົນລະປະທານ ຈຳກັດ ຊຶ່ງມີບັນດາທ່ານຮອງເຈົ້າແຂວງ ຄະນະປະຈຳພັກ ຄະນະພັກແຂວງ ທ່ານເຈົ້າເມືອງ ຫົວໜ້າ ຮອງຫົວໜ້າກົມ ກະຊວງກ່ຽວຂ້ອງ ແລະ ພະນັກງານທີ່ກ່ຽວຂ້ອງທັງສອງຝ່າຍ ເຂົ້າຮ່ວມເປັນສັກຂີພິຍານ. ທ່ານ ໄຊສົມພັນ ສີເຕັງເບຼຍຈື່ ຫົວໜ້າພະແນກໂຍທາທິການ ແລະ ຂົນສົ່ງ ແຂວງໄຊສົມບູນ ຕາງໜ້າໃຫ້ເຈົ້າຂອງໂຄງການ ໄດ້ຂຶ້ນລາຍງານຫຍໍ້ກ່ຽວກັບໂຄງການກໍ່ສ້າງເສັ້ນທາງປູຢາງສອງ ຊັ້ນ 3 ເສັ້ນທາງພາຍໃນແຂວງໄຊສົມບູນ ຊຶ່ງໄດ້ຮູ້ວ່າ: ໂຄງການດັ່ງກ່າວນີ້ ເປັນໂຄງການບຸລິມະສິດຂອງລັດຖະບານ ເຊິ່ງໄດ້ຮັບການຮ່ວມມືຈາກຫຼາຍພາກສ່ວນ ໂດຍສະເພາະແມ່ນ ໄດ້ຮັບການຊີ້ນຳຈາກຂັ້ນເທິງຢ່າງໃກ້ຊິດ ຈຶ່ງເຮັດໃຫ້ໂຄງການດັ່ງກ່າວນີ້ ໄດ້ຮັບການຈັດຕັ້ງປະຕິບັດ ໂດຍມີໄລຍະເວລາການກໍ່ສ້າງແມ່ນ 24 ເດືອນ ກໍ່ຄືໃຫ້ສຳເລັດທ້າຍເດືອນທັນວາ 2015 ຊຶ່ງໂຄງການດັ່ງກ່າວແມ່ນພະແນກໂຍທາທິການ ແລະ ຂົນສົ່ງ ແຂວງໄຊສົມບູນ ເປັນເຈົ້າຂອງໂຄງການ ສ່ວນບໍລິສັດທີ່ປຶກສາແມ່ນລັດວິສາຫະກິດ ວິສະວະກຳຄົມມະນາຄົມ ແລະ ມີ 3 ບໍລິສັດເປັນຜູ້ຮັບເໝົາກໍ່ສ້າງຄືດັ່ງນີ້: 1. ເສັ້ນທາງແຕ່ບ້ານຜາສະຫງົບ ເມືອງອານຸວົງຫາບ້ານວຽງທອງ ເມືອງທ່າໂທມ ແຂວງໄຊສົມບູນ ຄວາມຍາວ 50,01ກິໂລແມັດ ພ້ອມດ້ວຍຂົວເບຕົງ 4ແຫ່ງ ຍາວທັງໝົດ 267ແມັດ ໃນນັ້ນມີຂົວນ້ຳງຽບຍາວ 165ແມັດ ໂດຍແມ່ນບໍລິສັດ ທະວີໂຊກພັດທະນາກໍ່ສ້າງ ຈຳກັດ ເປັນຜູ້ຮັບເໝົາກໍ່ສ້າງ ໃນມູນຄ່າ 356,89ຕື້ກີບ. 2. ເສັ້ນທາງແຕ່ບ້ານພູຫົວຊ້າງຫາບ້ານອ່າວໃຕ້ ເມືອງອານຸວົງ ແຂວງໄຊສົມບູນ ຄວາມຍາວ 30,50ກິໂລແມັດ ພ້ອມດ້ວຍຂົວເບຕົງ 2ແຫ່ງ ຍາວທັງໝົດ 55,60ແມັດ ໂດຍແມ່ນບໍລິສັດ ຫຼັກໄຊກໍ່ສ້າງຂົວ-ທາງ ຈຳກັດຜູ້ດຽວ ເປັນຜູ້ຮັບເໝົາກໍ່ສ້າງ ໃນມູນຄ່າ 263,36 ຕື້ກີບ. 3. ເສັ້ນທາງແຕ່ຂົວນ້ຳຍອນຫາບ້ານລ້ອງແຈ້ງ ເມືອງລ້ອງແຈ້ງ ແຂວງໄຊສົມບູນ ຄວາມຍາວ 40ກິໂລແມັດ ພ້ອມດ້ວຍຂົວເບຕົງ 3ແຫ່ງ ຍາວທັງໝົດ 100ແມັດ ໂດຍແມ່ນບໍລິສັດ ປັນຍາທິລາດກໍ່ສ້າງຂົວ-ທາງ ເຄຫາ ແລະ ຊົນລະປະທານ ຈຳກັດ ເປັນຜູ້ຮັບເໝົາກໍ່ສ້າງ ໃນມູນຄ່າ 304,02ຕື້ກີບ. __________________

Anonymous

Date: Feb 9, 2014

RE: ລັດໃຊ້ງົບເກືອບໜຶ່ງພັນຕື້ກີບ ພັດທະນາພື້ນຖານໂຄງລ່າງ ແຂວງໄຊສົມບູນ	Permalink

ຂໍສະແດງຄວາມຍິນດີນໍາທ່ານເຈົ້າແຂງແລະປະຊາຊົນແຂງໄຊສົມບູນທຸກຄົນ, ທ່ານສົມບັດ ເຢັຽລືເຮີ ຢ່າກືນນໍ້າລາຍແຮງຫຼາຍເດີທ່ານຢ້ານມັນຄາຄໍ ! __________________

Page 1 of 1 sorted by

Create your own FREE Forum
Report Abuse