ທີ່ດິນບ້ານນ້ອຍຊຽງດາຈະ ຖືກຍຶດ

ທີ່ດິນ ຂອງຊາວບ້ານ ຢູ່ ບ້ານນ້ອຍຊຽງດາ ເມືອງ ໄຊເສດຖາ ນະຄອນຫລວງ ວຽງຈັນ ກຳລັງ ຈະຖືກຍຶດ ເປັນຂອງ ເອກຊົນ ຊຶ່ງ ຊາວບ້ານ ກໍບໍ່ ຮູ້ວ່າ ຈະໄປຢູ່ ບ່ອນໃດ ຈະທຳມາ ຫາກິນ ແບບໃດ. ປະຊາຊົນ ຜູ້ນຶ່ງເວົ້າວ່າ: "ໂຄງການ ຈະມາເອົາທັງ ດິນປູກຝັງ ແລະ ດິນເຮືອນ ຂອງພວກເຮົາ ແລ້ວຊິໃຫ້ ພວກເຮົາ ໄປຢູ່ໃສ?"

ເນື້ອທີ່ດິນ 30 ເຮັກຕາ ຂອງ ປະຊາຊົນ ຫລາຍກວ່າ 100 ຄອບຄົວ ທີ່ເຄີຍຖືກ ໂຄງການ ສຳປະທານ ມາຫລາຍ ໂຄງການແລາວ ເປັນຕົ້ນແມ່ນ ໂຄງການ ສະໜາມ ກ໊ອຟ ລ່ອງທັນ, ໂຄງການ ສ້າງ ມະຫາວິທະຍາໄລ ຊູໂຈ ຂອງຈີນ, ໂຄງການ ທະບວງ ການ ປົກຄອງ ຂອງ ກະຊວງພາຍໃນ, ໂຄງການ ກະສິກັມ, ໂຄງການ ສ້າງສູນ ສຸຂພາບຈິດຂອງກະຊວງ ສາທາລະນະສຸຂ. ແລະຫລ້າສຸດ ແມ່ນ ບໍລິສັດ ນ້ຳທາ ກໍ່ສ້າງ ໄດ້ຮັບ ສຳປະທານ ພັທນາ ທີ່ດິນເຂດ ດັ່ງກ່າວ.

ອີງຕາມການບອກເລົ່າ ຂອງຊາວບ້ານ ໄດ້ຮູ້ວ່າ ບໍລິສັດນ້ຳທາ ກໍ່ສ້າງ ເປັນຜູ້ທີ່ໄດ້ຮັບ ສຳປະທານ ໃນການບຸກເບີກ ເນື້ອທີ່ດິນ ແລ້ວ ເປີດໃຫ້ ໂຄງການ ເຫລົ່ານັ້ນມາ ປະມູນຊື້ ແລະ ນອກ ຈາກນັ້ນ ບໍຣິສັດນ້ຳທາ ກໍ່ສ້າງ ຍັງມີສາຍ ພົວພັນ ກັບທ່ານ ສຸກັນ ມະຫາຣາດ ເຈົ້າຄອງ ນະຄອນຫລວງ ວຽງຈັນ ຄົນປັດຈຸບັນ ເພາະວ່າ ລູກສາວ ຂອງທ່ານສຸກັນ ມະຫາຣາດ ໄປແຕ່ງງານ ກັບລູກຊາຍ ເຈົ້າຂອງ ບໍຣິສັດ ນ້ຳທາ ກໍ່ສ້າງ ຊຶ່ງເປັນ ບໍຣິສັດ ທີ່ເຮັດ ທຸຣະກິດ ການກໍ່ສ້າງ ແລະ ພັທນາທີ່ດິນ ຄົບວົງຈອນ.

ຊາວບ້ານ ບໍ່ພໍໃຈກັບ ຄ່າຊົດເຊີຍ ທີ່ບໍຣິສັດ ນ້ຳທາ ກໍ່ສ້າງ ຈ່າຍໃຫ້ແມ່ນ 5,000,000 ກີບ ຫລື ປະມານ 700 ໂດລາ ຕໍ່ນຶ່ງ ເຮັກຕາ ໃນຂະນະທີ່ຄ່າຊົດເຊີຍຕົວຈິງ ບໍຣິສັດໄດ້ຂຽນໃນບົດ ວິພາກເສຖກິດ ແມ່ນ 100 ລ້ານ ຫລື ປະມານ 12,000 ໂດລາ ຕໍ່ນຶ່ງເຮັກຕາ.

ໂຄງການພັທນາ ດັ່ງກ່າວ ໄດ້ມີແຜນ ຈະບຸກເບີກ ເນື້ອທີ່ດິນ ສຳປະທານ ຕັ້ງແຕ່ປີ 2009 ແລະ ໃນເວລານັ້ນ ປະຊາຊົນ ຄັດຄ້ານ ໂຄງການ ດັ່ງກ່າວ ຈຶ່ງຢຸດໄປ ຣະຍະນຶ່ງ ແລະ ໃນ ເວລາ ດຽວກັນ ກໍມີແຈ້ງການ ຈາກ ຣັຖມົນຕຣີ ປະຈໍາຫ້ອງ ວ່າການ ຣັຖບານ ໃຫ້ມີການ ສັ່ງໂຈະ ການພັທນາ ທີ່ດິນເຂດ ບ້ານນ້ອຍຊຽງດາ ເພາະວ່າ ເປັນທີ່ດິນ ຂອງກຸ່ມ ຊາວ ກະສິກອນ ເຮັດໂຄງການ ປູກຜັກ ອິນຊີ.