ລາວໂຮມລາວ ເພື່ອປະຊາທິປະໄຕ

ຂ້າພະເຈົ້າ ໃນນາມປະຊາຊົນລາວຜູ້ໜຶ່ງທີ່ທຳມາຫາກິນ ຢູ່ນະຄອນຫຼວງວຽງຈັນ ຮູ້ສຶກວ່າມີ ນາຍທຶນໜຶ່ງ ຊື່ວ່າ ພຶດສະພາ ໄດ້ສ້າງຕັ້ງ ລັດວິສາຫະກິດ ປະສົມລົງທຶນ ແລະ ພັດທະນາ ອະສັງຫາລິມະຊັບ ຂຶ້ນມາ ໂດຍຮ່ວມກັບ ອຳນາດການປົກຄອງ ນະຄອນຫຼວງວຽງຈັນ ເພື່ອຈຸດປະສົງຢາກພັດທະນາດິນລັດ ທີ່ຢູ່ໃນຂອບເຂດ ນະຄອນຫຼວງວຽງຈັນ. ຄວາມເປັນຈິງແລ້ວ ເປັນຄືແນວນີ້ແທ້ບໍ? ຫາງສຽງຂອງສັງຄົມຕໍ່ກັບ ລັດວິສາຫະກິດດັ່ງກ່າວນີ້ ແມ່ນເຫັນວ່າ ບໍ່ຂາວສະອາດຈັກດີ້. ວິທີການກໍ່ຄື ກອບໂກຍເອົາດິນລັດ, ດິນລັດທີ່ຜູ້ທີ່ມີຜົນງານ, ນັກຮົບປະຕິວັດ ຄຸ້ມຄອງມາໄດ້ຫຼາຍປີ. ຄຳວ່າ "ພັດທະນາ" ສຳລັບພວກນີ້ ແມ່ນການພັດທະນາຢູ່ເຂດ ສີຫອມ, ຫາຍໂສກ, ນ້ຳພຸ (ຮ້ານອາຫານ Mix ໃນປະຈຸບັນ), ປະຕູໄຊ, ສວນເຈົ້າຟ້າງຸ່ມ (ທັງສອງແມ່ນຂັ້ນຕອນສະເໜີຂໍສຳປະທານ). ດຽວນີ້ແມ່ນກຳລັງຫັນໄປສູ່ເຂດ ບຶງຂະຫຍອງ (ມີແຜນຂັບໄລ່ປະຊາຊົນອອກ), ສີໄຄ, ວັດໄຕ ແລະ ອື່ນໆ...ເວົ້າງ່າຍໆວ່າຢາກພັດທະນາຢູ່ບ່ອນທີ່ມີຄວາມຈະເລີນແລ້ວ ວ່າຊັ້ນຊາ! ສຳປະທານນ້ຳພຸ (ຊຶ່ງເປັນໜຶ່ງໃນສະຖານທີ່ທ່ອງທ່ຽວຂອງ ນະຄອນຫຼວງວຽງຈັນ) ກໍພໍແຮງແລ້ວ, ຍັງດັນຂໍປະຕູໄຊ ກັບສວນເຈົ້າຟ້າງຸ່ມ ອີກ! ຮູບການພັດທະນາແນວນີ້ ຄິດວ່າໃຜກໍເຮັດໄດ້, ເອົາແຕ່ສະຖານທີ່ໆ ພັດທະນາແລ້ວ. ຂພຈ ຄິດວ່າຄືຊິບໍ່ແມ່ນການພັດທະນາຕີ, ເປັນການກອບໂກຍເອົາດິນລັດຢູ່ເຂດທີ່ຈະເລີນແລ້ວ ຂາຍເພື່ອເອົາກຳໄລ ອັນມະຫາສານ! ລັດຖະບານໄດ້ຫຍັງ? ຄິດວ່າບໍ່ໄດ້ຫຍັງ!!! ແມ່ນບຸກຄົນຫຼາຍກວ່າທີ່ເປັນຜູ້ມີຜົນປະໂຫຍດ! ນອກນີ້ກໍ່ຍັງມີ ໂຄງການເມືອງ ຈຳປາ ແລະ ໄປເອົາດິນປະຊາຊົນຢູ່ເຂດໜອງປີງນຳອີກ ຫຼາຍຮ້ອຍເຮັກຕາ. ສະເໜີໃຫ້ອຳນາດການປົກຄອງນະຄອນຫຼວງ ກໍ່ຄືລັດຖະບານ ລົງເລິກບັນຫາດັ່ງກ່າວຕື່ມ ເພາະມັນເປັນບັນຫາພົ້ນເດັ່ນໃນສັງຄົມປະຈຸບັນ!