ຊາວເມືອງແບງໃນເຂດດິນເຈື່ອນ

ຊາວເມືອງແບງ ທ່ານນຶ່ງ ເປີດເຜີຍວ່າ ໂຄງການ ໂຍກຍ້າຍ ຊາວບ້ານ ໃນເຂດ ເມືອງແບງ ແຂວງ ອຸດົມໄຊ ອອກຈາກ ເຂດທີ່ມີ ຄວາມ ສ່ຽງ ວ່າຈະເກີດ ດິນເຈື່ອນ ໄປຢູ່ ບ່ອນໃໝ່ ນັ້ນ ບໍ່ປະສົບ ຜົນສໍາເຣັດ ຍ້ອນ ທາງການ ລາວ ບໍ່ຍອມໃຫ້ ພື້ນທີ່ ອັນ ເໝາະສົມ ແລະ ບໍ່ຊ່ວຍ ດ້ານວຸດຖຸ ທີ່ຈໍາເປັນ ຊຶ່ງຊາວບ້ານ ຮ້ອງຂໍ ໃນການ ໂຍກຍ້າຍ:

"ຍ້ອນວ່າ 1. ກໍພື້ນທີ່ ບໍ່ເໝາະສົມ 2. ມາກໍການ ສນອງ ຈາກຂັ້ນເທີງ ບໍ່ໄດ້ຕາມ ຄວາມ ຮຽກຮ້ອງ ຕ້ອງການ ຂອງ ຂະເຈົ້າ ບໍ່ໜ້ອຍ ກໍຫລາຍ ຕ້ອງໃຊ້ທຶນ ໃຊ້ຮອນ ແລ້ວ ຂັ້ນເທິງ ສິທົດແທນ ບໍ່ ຕົວຢ່າງ ວ່າດິນ ບ໋ອກ ຄ້ອນ ເຫລັກ ຕະປູ ນີ້ໜາ ຂະເຈົ້າ ຢາກ ຮຽກຮ້ອງ ນ່າ ແຕ່ ທາງຂັ້ນເທິງ ບໍ່ມີ ສນອງໃຫ້ ຫັ້ນນະ".

ທ່ານກ່າວ ຕໍ່ໄປວ່າ ປະຊາຊົນ ບໍ່ໄປຢູ່ ບ່ອນໃໝ່ 1. ແມ່ນຍ້ອນ ທາງການ ລາວ ຈະໃຫ້ ປະຊາຊົນ ຈໍານວນນຶ່ງ ໄປຢູ່ເຂດ ປ່າຊ້າ ເກົ່າ. 2. ທາງການ ບໍ່ ຊ່ວຍເຫຼືອ ຫຍັງ ໃນການ ໂຍກ້າຍ ບໍ່ວ່າຈະ ເປັນເງິນ ຫຼືວ່າ ວັດຖຸ ສິ່ງຂອງ.

ໃນທ້າຍ ປີກາຍ ເບື້ອງຕົ້ນ ປະຊາຊົນ ບາງສ່ວນ ກໍຍອມ ໂຍກຍ້າຍ ບ້ານເຮືອນ ອອກໄປ ຕາມຄໍາສັ່ງ ຂອງ ທາງການ, ແຕ່ຕໍ່ມາ ບໍ່ດົນ ກໍໄດ້ຍ້າຍ ກັບຄືນມາ ຢູ່ບ່ອນເກົ່າ ຍ້ອນຄິດວ່າ ພື້ນທີ່ ບ່ອນໃໝ່ ທີ່ ທາງການລາວ ໃຫ້ ໂຍກຍ້າຍ ໄປຢູ່ນັ້ນ ບໍ່ເໝາະສົມ.

ບ້ານ ເພັຍຫົວນໍ້າ ເປັນບ້ານນຶ່ງ ທີ່ໄດ້ຮັບ ຜົລກະທົບ ຫລາຍ ທີ່ສຸດ ຈາກ ນໍ້າຖ້ວມ ເມືອງແບງ ເມື່ອ ເດືອນ ສິງຫາ ປີ 2013 ຍ້ອນຕັ້ງ ຢູ່ ບໍຣິເວນ ຈ້າຍພູ. ມີ ຄວາມສ່ຽງ ທີ່ ຈະເກີດ ດິນເຈື່ອນ ໄດ້. ດັ່ງນັ້ນ ຝ່າຍ ປົກຄອງ ເມືອງ ຈຶ່ງມີແຜນ ໂຍກຍ້າຍ ປະຊາຊົນ ຈໍານວນ 109 ຄອບຄົວ ອອກໄປຢູ່ ບ່ອນໃໝ່ ເພື່ອ ຄວາມ ປອດພັຍ.

ຜູ້ເຄາະຮ້າຍຈາກນໍ້າຖ້ວມຢາກໃຫ້ ຊ່ອຍເຫຼືອ

ຊາວ ເມືອງແບງ ແແຂວງ ອຸດົມໄຊ ແລະ ເມືຶອງ ໂພນໄຊ ແຂວງ ຫລວງພIະບາງ ທີ່ໄດ້ຮັບ ຜົລກະທົບ ຈາກ ພັຍ ນໍ້າຖ້ວມ ໃນປີ 2013 ຍັງ ປະສົບ ກັບ ຄວາມ ຫຍຸ້ງຍາກ ຂາດເຂີນ ບໍ່ມີ ເຂົ້າກິນ, ບໍ່ມີນໍ້າ ສະອາດ ໃຊ້ ແລະ ບໍ່ມີ ທີ່ດິນ ທໍາກິນ ໃນ ຣະດູແລ້ງ ຈຶ່ງ ຢາກ ຮຽກຮ້ອງ ໃຫ້ ທາງການ ລາວ ຊ່ອຍເຫຼືອ ຢ່າງ ຮີບດ່ວນ. ດັ່ງ ຊາວເມືອງ ໂພນໄຊ ຜູ້ນຶ່ງ ເວົ້າວ່າ:

"ກໍຝືດເຄືອງ ພໍສົມຄວນ ວ່າ ຊັ້ນສະ ຈໍານວນ ນຶ່ງ ກໍໍອຶດເຂົ້າ ເພາະວ່າ ປີແລ້ວ ມານີ້ ຖືກພັຍ ທັມຊາດ ຂົ່ມຂູ່ ໜັກ ນາ ກໍຖ້ວມ ໄຮ່ ເປັນສວນ ອັນໃດ ກໍຖືກ ຖລົ່ມເຈື່ອນ ໄປຫລາຍ ທີ່ນີ້ ປະຊາຊົນ ເຮົາ ອຶດເຂົ້າ ນາແຊງ".

ທ່ານເວົ້າ ຕື່ມ ອີກວ່າ ຕັງແຕ່ ນໍ້າຖ້ວມ ໃນ ຣະດູຝົນ ປີ 2013 ມາຮອດ ປັດຈຸບັນ ໄດ້ຮັບ ການ ຊ່ວຍເຫລືອ ຈາກ ທາງການ ເທື່ອດຽວ, ເອົາ ເຂົ້າສານ ມາ ແຈກໃຫ້ ປະມານ ຄອບຄົວ ລະ 10 ກິໂລ ກຣາມ, ກຸ້ມກິນ ບໍ່ ພໍເທົ່າໃດ ອາທິດ ກໍໝົດ ຂະນະ ທີ່ ດິນນາ ດິນສວນ ຂອງ ປະຊາຊົນ ເກືອບ ທັງໝົດ ໄດ້ຮັບ ຜົລ ກະທົບ ຈາກດິນ ເຈື່ອນ ຫິນເຈື່ຶອນ ລົງມາຖົມ ເຮັດໃຫ້ ຫລາຍ ຄອບຄົວ ບໍ່ມີ ທີ່ດິນ ເຮັດນາ ແຊງ.

ພ້ອມກັນ ນັ້ນ ຊາວບ້ານ ຈາກ ເມືອງແບງ ກໍເວົ້າວ່າ ຖ້າທາງການ ບໍ່ຊ່ວຍເຫລືອ ບຸກເບີກ ທີ່ນາ, ແນວພັນສັດ, ນໍ້າສະອາດ ແລະ ສິ່ງອື່ນໆ ທີ່ຈໍາເປັນ ຊາວບ້ານ ກໍຈະ ຫຍຸ້ງຍາກ ຢູ່ຕໍ່ໄປ:

"ໃນ ສູ່ມື້ນີ້  ປັດຈຸບັນ ຍັງ ຫຍຸ້ງຍາກ ຫລາຍ ໂດຍສະເພາະ ຕົ້ນຕໍ ກໍແມ່ນ ເຣື່ອງ ນໍ້າກິນ ຂອງ ປະຊາຊົນ ເຫັນວ່າ ຫຍູ້ງຍາກ ຫລາຍ ເພາະວ່າ ຂຸດ ນໍ້າສ້າງ ນໍ້າບໍ່ ຈັກໜ່ອຍ ຝົນຕົກ ມັນກໍຖົມ ຄືເກົ່າ ແລ້ວ ກໍໄປຕັກ ຢູ່ໄກ ແນ່ ພົບຄວາມ ຫຍູ້ງຍາກ ບັນຫາ 1 ບັນຫາ 2 ກໍເຫັນວ່າ ສະພາບ ພື້ນທີ່ ຂອງ ຊາວບ້ານ ກໍຖືວ່າ ກະທົບ ຢ່າງ ຫລວງຫລາຍ ບາງ ຄອບຄົວ ກໍຮອດ ບໍ່ມີ ເນື້ອທີ່ ການຜລິດ".

ນໍ້າຖ້ວມ ເມືອງແບງ ເມື່ອປີ 2013 ເຮັດໃຫ້ ປະຊາຊົນ ເສັຍ ຊີວິດ 15 ຄົນ ບ້ານເຮືອນ ປະຊາຊົນ ໄດ້ຮັບ ຜົລກະທົບ 160 ກວ່າ ຫຼັງ, ເນື້ອທີ່ ການຜລິດ ຖືກ ນໍ້າຖ້ວມ 400 ເຮັກຕາ ຢູ່ ເມືອງ ໂພນໄຊ ນໍ້າຖ້ວມ ຫລາຍບ້ານ, ປະຊາຊົນ 800 ກວ່າຄົນ ໄດ້ຮັບ ຜົລ ກະທົບ, ເນື້ອທີ່ ການຜລິດ ເສັຍຫາຍ 300 ກວ່າ ເຮັກຕາ.