ການສໍ້ຣາສບັງຫຼວງ ໃນກົງຈັກການຈັດຕັ້ງຂອງຣັຖ ຢູ່ ສປປລາວ, ໃນຣະຍະ 1 ປີຜ່ານມາ, ນັບແຕ່ຂັ້ນສູນກາງ ຈົນຮອດທ້ອງຖິ່ນມີເຖິງ 1 ພັນຕື້ກີບ, ຍ້ອນເຈົ້າໜ້າທີ່ຣະເມີດກົດໝາຍ ເປັນຕົ້ນຣະບຽບການເງິນ, ພ້ອມທັງການປະຕິບັດວິນັຍການເງິນບໍ່ເຂັ້ມງວດ ແລະ ມີຢ່າງແພ່ ລາມຫຼາຍ. ດັ່ງທ່ານ ສີໄນ ວຽງລາວັນ ຮອງປະທານ ຄນະກວດກາສູນກາງພັກ ປະຊາຊົນປະຕິວັດລາວ, ໄດ້ຣາຍງານ ຕໍ່ກອງປະຊຸມ ວຽກງານ ກວດກາທົ່ວປະເທດ ປະຈຳປີ 2018 ເມື່ອທ້າຍເດືອນ ມົກຣາ ທີ່ຜ່ານມາວ່າ:
"ການປະຕິບັດວີນັຍແຜນການການເງິນບໍ່ເຂັ້ມງວດ, ການປັບປຸງການຈັດຕັ້ງຂອງຣັຖ, ບໍ່ໄປຕາມທິດສົມເຫດສົມຜົລ ແລະການເຄື່ອນໄຫວ ບໍ່ມີປະສິດຕິຜົລ."
ທ່ານ ສີນັຍ ກ່າວຕື່ມວ່າ ຕະຫຼອດຣະຍະນຶ່ງປີຜ່ານມາ ຄນະກວດກາສູນກາງພັກ ໄດ້ຕິດຕາມກວດກາ ອົງການຣັຖແຕ່ລະຂັ້ນ ທັງອົງການ ບໍຣິຫານຣັຖ ຢູ່ບັນດາກະຊວງ, ອົງການ, ແຂວງ, ນະຄອນຫຼວງ ແລະເມືອງ ຮວມທັງໝົດ 1,200 ປາຍເປົ້າໝາຍນັ້ນ, ໄດ້ພົບເຫັນຄວາມ ເສັຍຫາຍທັງໝົດ 1 ພັນຕື້ກີບ ຫລືປະມານ 120 ລ້ານໂດລາ ສະຫະຣັຖ ແລະສາມາດເກັບຄືນມາໄດ້ພຽງແຕ່ 26 ຕື້ປາຍກີບ.
ພ້ອມກັນນັ້ນ ທ່ານຍັງຢືນຢັນຕື່ມວ່າຜ່ານມາ 1 ປີ, ການປະຕິບັດວຽກງານສະກັດກັ້ນ ແລະການຕ້ານການສໍ້ຣາສບັງຫຼວງ ຍັງພົບຄວາມຫຍຸ້ງ ຍາກ, ຍ້ອນມີ ການສວຍໂອກາດ ໃຊ້ໜ້າທີ່ຕຳແໜ່ງ ເພື່ອຊອກຫາຜົລປະໂຫຍດ ສ່ວນໂຕ ເກີດຂຶ້ນຫຼາຍ, ການສືບສວນ-ສອບສວນຄະດີ ສໍ້ຣາສບັງຫຼວງ, ຍັງຊັກຊ້າແກ່ຍາວ, ການຈັດຕັ້ງປະຕິບັດຄຳຕັດສິນຂອງສານ ຍັງບໍ່ຄົບຖ້ວນ, ພະນັກງານຈຳນວນນຶ່ງ ຍັງບໍ່ທັນໄດ້ແຈ້ງ ຊັບສິນ ຕາມຣະບຽບການ ທີ່ໄດ້ກຳນົດໄວ້.
94 ຕື້₭ ເກັບກູ້ບໍ່ໄດ້ເພາະມັນຢູ່ໃນຖົງລູກຫລານການນຳ !
