ກອງປະຊຸມວຽກງານ ຕິດຕາມກວດກາ ທົ່ວ ແຂວງສະຫວັນນະເຂດ ປະຈຳປີ 2018 ເມື່ອວັນທີ 20-21 ມິນາ ຜ່ານມາ ຄນະກວດກາ ພັກ-ຣັຖ ແຂວງສະຫວັນນະເຂດ ຣາຍງານວ່າໄດ້ລຶບຊື່ພະນັກງານ ອອກຈາກພັກ 19 ຄົນ ຍ້ອນມີສ່ວນພົວພັນກັບ ການສໍ້ຣາດບັງຫຼວງ ພ້ອມກັບ ລົງວິນັຍສະມາຊິກພັກ ອິກ 40 ຄົນ, ດັ່ງເຈົ້າໜ້າທີ່ແຂວງສະຫວັນນະເຂດ ເວົ້່າຕໍ່ ວິທຍຸເຊັຍເສຣີ ເມື່ອ 26 ມີນາ ວ່າ:
"ພວກເຮົາກາໄດ້ກວດກາຕາມຄຳຮ້ອງສເນີ ມີພຶດຕິກັມບໍ່ ອີ່ຫຍັງຕ່າງໆຫັ້ນນະ, ໂຕຢ່າງ ຫລືວ່າມີຄຳຮ້ອງຄຳສເນີ ຂອງປະຊາຊົນສເນີເຂົ້າມາ ພວກເຮົາກາຕິດຕາມ ຂໍ້ມູນຫລັງຈາກສຳເຣັດ ກາຣາຍງານທາງຄນະພັກ ຂັ້ນເທິງເພິ່ນ ແມ່ນພວກເຮົາເຮັດ ຕາມພາລະບົດບາດນະ."
ສະມາຊິກພັກ ຂອງແຂວງສະຫວັນນະເຂດ ທີ່ຖືກລົງວິນັຍ ສ່ວນຫລາຍແມ່ນພະນັກງານ ຂັ້ນຄຸ້ມຄອງ ທີ່ມີສ່ວນຮ່ວມ ໃນການນໍາຣົດເຂົ້າ ເສັຍພາສີ ບໍ່ຖືກຕ້ອງມູນຄ່າ 45 ຕື້ກີບ, ຣະເມີດຄຳສັ່ງ ເລກທີ 15 ຂອງນາຍົກຣັຖມົນຕຣີ ສອງກໍຣະນີ, ໂດຍໄດ້ຢັ້ງຢືນ ເອົາຜລິຕພັນໄມ້ ເພື່ອສົ່ງອອກໄປ ວຽດນາມ ຂອງໂຮງງານປຸງແຕ່ງໄມ້ ຄູນຄຳ ແລະ ໂຮງງານປຸງແຕ່ງໄມ້ ຊັນຊາຍ ຈຳນວນ 5 ແສນປາຍແມັດກ້ອນ ພະນັກງານທີ່ມີສ່ວນກ່ຽວຂ້ອງ ລວມມີ 21 ຄົນ, ປັດຈຸບັນ ກຳລັງຢູ່ໃນຣະຫວ່າງ ການສືບສວນ ແລະ ການຍັກຍອກຊັບສິນ ຂອງຣັຖ, ຂອງພະນັກງານການເງິນ ເມືອງທ່າພະລານໄຊ, ເມືອງສອງຄອນ ມູນຄ່າ 700 ປາຍ ລ້ານກີບ ມີພະນັກງານກ່ຽວຂ້ອງ 4 ຄົນ ແລະ ພະນັກງານອາກອນ ເມືອງໄຊບູລີ ຍັກຍອກເງິນຣັຖ ໄປໃຊ້ສ່ວນໂຕ ມູນຄ່າ 3,3 ຕື້ກີບ ມີ ພະນັກງານກ່ຽວຂ້ອງ 5 ຄົນ, ປັດຈຸບັນ ຄວາມຜິດດັ່ງກ່າວ ໄດ້ສລຸບສຳນວນສົ່ງອັຍການແຂວງ ເພື່ອສັ່ງຟ້ອງຕາມກົດໝາຍ.
ແຂວງສະຫວັນນະເຂດ ແມ່ນແຂວງນຶ່ງ ທີ່ໄດ້ກວດພົບການສໍ້ຣາດບັງຫລວງ ເພີ່ມຂຶ້ນເຣື້ອຍໆ ນັບແຕ່ປີ 2016 ເປັນຕົ້ນມາ. ໂດຍສະເພາະ ແມ່ນພະນັກງານທີ່ກ່ຽວຂ້ອງ ກັບການເງິນ ແມ່ນມີການສໍ້ໂກງເພີ່ມຂຶ້ນ.
ໂຄງການເຂື່ອນນໍ້າທາ 1 ເມືອງນາແລ ແຂວງຫລວງນ້ຳທາ ໃຊ້ວັດຖຸ ບໍ່ໄດ້ມາຕຖານ ສ້າງເຮືອນໃຫ້ ປະຊາຊົນບ້ານຈັດສັນພູຄາ ເຊິ່ງເປັນ ເຂດທີ່ມີຜູ້ໄດ້ຮັບຜົລກະທົບ ຈາກເຂື່ອນນໍ້າທາ 1 ອາສັຍຢູ່ນັ້ນ, ປັດຈຸບັນ ເຮືອນປະຊາຊົນ ຢູ່ເຂດດັ່ງກ່າວ 64 ຫລັງ ເປ່ເພແລ້ວ, ດັ້ງ ຊາວບ້ານຈັດສັນແຫ່ງນີ້ ໄດ້ເວົ້າເມື່ອວັນທີ 26 ມິນາ ວ່າ:
"ບັນຫາທີ່ວ່າຍັງຄ້າງ ກັບບໍຣິສັດນີ້ແມ່ນ 1 ມັນເຮືອນເປ່ເພເນາະ, ມັນບໍ່ໄດ້ມາຕຖານ, ແລ້ວມັນມາຈາກພວກໜ່ວຍງານກໍ່ສ້າງຫັ້ນແຫລະ, ເອົາໄມ້ອັນທີ່ວ່າບໍ່ດີເນື້ອໄມ້ ທີ່ວ່າບໍ່ດີມັນເປັນມອດ ປະສົມປູນ ກໍ່ບໍ່ຖືກຕາມແບບເຂົາ ປະສົມເທພື້ນກໍ່ແຕກ."
ບ້ານພູຄາ ເປັນບ້ານຈັດສັນຂນາດນ້ອຍ, ອີກແຫ່ງນຶ່ງຂອງຜູ້ໄດ້ຮັບຜົລກະທົບ ຈາກເຂື່ອນນໍ້າທາ 1 ມີປະຊາຊົນ 80 ປາຍຄອບຄົວມາຈາກ ບ້ານຫາດແຕ້ 2, ບ້ານ ຕົກລະຫ້າງ ແລະ ບ້ານຫ້ວຍເຄື່ອງ ຊາວບ້ານຖືກຍົກຍ້າຍ ມາຕັ້ງແຕ່ປີ 2016.
ປັດຈຸບັນບ້ານຈັດສັນເຂື່ອນສ້າງໃຫ້ 80 ປາຍຫຼັງເຮືອນເປ່ເພໄປແລ້ວ 64 ຫລັງຄາເຮືອນ ໂດຍຮູບແບບເຮືອນ ຂອງຊາວບ້ານ ບໍ່ຖືກກັບທີ່ ໄດ້ເຊັນສັນຍາກັນ. ໃນສັນຍາຕ້ອງໄດ້ໃຊ້ໄມ້ເນື້ອແຂງ ແຕ່ໂຕຈິງເຮືອນສ້າງດ້ວຍໄມ້ເກົ່າໆ, ໃນສ່ວນທີ່ເຮັດ ດ້ວຍຊີມັງກໍ່ເປ່ເພ ແຕກງ່າຍ. ກ່ຽວກັບເຣື່ອງນີ້ ຊາວບ້ານໄດ້ຮ້ອງຮຽນ ໄປຍັງທາງການ ໃຫ້ລົງມາແກ້ໄຂຜ່ານໄປ 4 ເດືອນແລ້ວ ກໍ່ຍັງບໍ່ມີພາກສ່ວນໃດ ລົງມາເທື່ອ.
"ອັນນີ້ມັນບົດບັນທຶກແຕ່ເບື້ອງຕົ້ນ ບໍຣິສັດຮັບຮອງ ໃຫ້ດຽວນີ້ເຮົາກໍ່ຍັງລໍຖ້າ ປະຊາຊົນນີ້ກໍ່ມີການສເນີເນາະ ແຕ່ທາງບໍຣິສັດນີ້ ຮັບທາງ ບໍຣິສັດວ່າຮັບຮອງ ທີ່ວ່າມາສ້ອມແປງຄືນດຽວນີ້ ເຮົາສົ່ງນໍ້ມູນແລ້ວ ເຂົາຍັງບໍ່ມາຮອດຕອນນີ້."
ສ່ວນເຈົ້າໜ້າທີ່ປົກຄອງ ເມືອງນາແລ ໃຫ້ຄວາມເຫັນກັບເຣື່ອງນີ້ວ່າ ທາງຫ້ອງການ ຍັງບໍ່ທັນຮູ້ເຣື້ອງນີ້ ແຕ່ຈະປະສານຫາ ພາກສ່ວນ ກ່ຽວຂ້ອງໃຫ້, ຖ້າເປັນຄືດັ່ງປະຊາຊົນເວົ້າແທ້, ກໍຈະກວດຄືນສັນຍາ ການກໍ່ສ້າງບ້ານຈັດສັນແຫ່ງນີ້ໃໝ່.
ເຂື່ອນນໍ້າທາ 1 ມີຜູ້ໄດ້ຮັບຜົລກະທົບຢູ່ສອງເມືອງ ເມືອງຜາອຸດົມ ແຂວງບໍ່ແກ້ວ ແລະ ເມືອງນາແລ ແຂວງຫລວງນໍ້າທາ ໂດຍຜູ້ໄດ້ຮັບ ຜົລກະທົບ ແບ່ງເປັນສາມເຂດ ໃນນັ້ນມີ ບ້ານຈັດສັນ ເຂື່ອນນາແລ ມີປະຊາຊົນ 9 ບ້ານ, ບ້ານຈັດສັນເຂດພູຄາ ມີປະຊາຊົນ 3 ບ້ານ ແລະ ບ້ານຈັດສັນເຂດ ຜາອຸດົມ ມີປະຊາຊົນ 11 ບ້ານ.
ໃນປີ 2018 ຜ່ານມາແຂວງອັດຕະປື ໄດ້ປະຕິບັດວິໄນຕໍ່ສະມາຊິກພັກ-ພະນັກງານລວມທັງໝົດ 27 ສະຫາຍ,ຍິງ 2 ສະຫາຍ,ໃນນັ້ນລຶບຊື່ອອກຈາກພັກມີ 18 ສະຫາຍ,ຍິງ 2 ສະຫາຍ,ໂຈະຮ່ວມຊີວິດພັກ 9 ສະຫາຍ ແລະປະຕິບັດວິໄນເບື້ອງລັດມີ 18 ສະຫາຍ,ຍິງ 1 ສະຫາຍ .
ທ່ານ ບົວໄລ ກົມມະສິດ ຮອງຄະນະຈັດຕັ້ງແຂວງອັດຕະປື ໄດ້ກ່າວລາຍງານຢູ່ໃນກອງປະຊຸມສະຫຼຸບວຽກງານຈັດຕັ້ງທົ່ວແຂວງອັດຕະປື ຫວ່າງບໍ່ດົນຜ່ານມານີ້ວ່າ: ໃນ 1 ປີຜ່ານມາຄະນະຈັດຕັ້ງແຂວງອັດຕະປື ໄດ້ເອົາໃຈໃສ່ກຳສະພາບຕິດຕາມສະມາຊີກພັກ-ພະນັກງານແລະຄຸ້ມຄອງຊີວະປະຫວັດ, ການເຄື່ອນໄຫວຂອງສະມາຊີກພັກ-ພະນັກງານຢ່າງເປັນປົກກະຕີ,ຕິດຕາມເກັບກຳຫາງສຽງສັງຄົມ, ຄໍາຮ້ອງຟ້ອງ, ຮ້ອງທຸກ, ຄໍາສະເໜີຕ່າງໆຕໍ່ການຈັດຕັ້ງ,ຕໍ່ບຸກຄົນຂອງສະມາຊີກພັກ-ພະນັກງານ,ພ້ອມທັງປະສານສົມທົບກັບພາກສ່ວນທີ່ກ່ຽວຂ້ອງໃນການຄົ້ນຄວ້າແກ້ໄຂກໍລະນີຕ່າງໆ ແລະໄດ້ປະຕິບບັດວີໃນຕໍ່ສະມາຊີກພັກ-ພະນັກງານ,ເຊິ່ງໃນໄລຍະ 1 ປີຜ່ານມາໄດ້ປະຕິບັດວີໃນຕໍ່ພະນັກງານ-ສະມາຊີກພັກລວມທັງໝົດ 27 ສະຫາຍ, ຍິງ 2 ສະຫາຍ,ໃນນັ້ນລືບຊື່ອອກຈາກສະມາຊີກພັກ 18 ສະຫາຍ,ຍິງ 2 ສະຫາຍ,ໂຈະຮ່ວມຊີວິດພັກ 9 ສະຫາຍ,ປະຕິບັດວີໃນເບື້ອງລັດ 18 ສະຫາຍ,ຍິງ 1 ສະຫາຍ.
ທ່ານ ບົວໄລ ກົມມະສິດ ຮອງຄະນະຈັດຕັ້ງແຂວງ ຍັງໄດ້ກ່າວຕື່ມວ່າ:ປະຈຸບັນທົ່ວແຂວງອັດຕະປື ມີສະມາຊິກພັກທັງໝົດ 9.129 ສະຫາຍ,ຍິງ 2.339 ສະຫາຍ,ທຽບໃສ່ປີ 2017 ເພີ່ມຂື້ນ 254 ສະຫາຍ,ຍິງ 54 ສະຫາຍ,ສະມາຊິກພັກສົມບູນມີ 8057 ສະຫາຍ,ຍິງ 2.049 ສະຫາຍ,ສະມາຊິກພັກສໍາຮອງມີ 1.072 ສະຫາຍ,ຍິງ 350 ສະຫາຍ,ສ່ວນພະນັກງານ-ລັດຖະກອນທັງໝົດທົ່ວແຂວງມີ 5.264 ຄົນ,ຍິງ 2.181 ຄົນ,ທຽບໃສ່ປີ 2017 ຫຼຸດລົງ 343 ຄົນ,ຍິງ 67 ຄົນ,ຂັ້ນສູນກາງຄຸ້ມຄອງມີ 32 ຄົນ,ຍິງ 5 ຄົນ,ຂັ້ນແຂວງຄຸ້ມຄອງມີ 4.483 ຄົນ,ຍິງ1.873 ຄົນ ແລະຂັ້ນເມືອງຄຸ້ມຄອງມີ 749 ຄົນ,ຍິງ 303 ຄົນ,ໃນນີ້ບໍ່ນັບທະຫານ ແລະຕໍາຫຼວດ .
ກອງປະຊຸມທົບທວນແລະ ປຶກສາຫາລືກ່ຽວກັບການປະສານງານລະຫວ່າງອົງການກວດກາລັດຖະບານແລະ ອົງການກວດສອບແຫ່ງລັດ ປະຈຳປີ 2018 ໄດ້ຈັດຂຶ້ນໃນຕອນແລງວັນທີ 26 ມີນານີ້ ທີ່ອົງການກວດກາລັດຖະບານ ໂດຍການເຂົ້າຮ່ວມເປັນປະທານ ແລະ ກ່າວເປີດກອງປະຊຸມຂອງທ່ານ ບຸນທອງ ຈິດມະນີ ກຳມະການກົມການເມືອງສູນກາງພັກ ຄະນະເລຂາທິການສູນກາງພັກ ຮອງນາຍົກລັດຖະມົນຕີ ປະທານຄະນະກວດກາສູນກາງພັກ-ອົງການກວດກາລັດຖະບານ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ ຊຶ່ງມີທ່ານ ນາງ ວຽງທອງ ສີພັນດອນ ກຳມະການສູນກາງພັກ ປະທານອົງການກວດສອບແຫ່ງລັດ.
ໃນກອງປະຊຸມ, ທ່ານ ສີໃນ ມຽງລາວັນ ຮອງປະທານອົງ ການກວດກາລັດຖະບານ ໄດ້ຂຶ້ນຜ່ານບົດສະຫຼຸບການຈັດຕັ້ງປະຕິບັດບົດບັນທຶກການປະ ສານງານລະຫວ່າງສອງອົງ ການ ປະຈຳປີ 2018 ແລະ ເຜີຍແຜ່ມະຕິຂອງສະພາແຫ່ງຊາດ ວ່າດ້ວຍການຮັບຮອງການເຄື່ອນໄຫວວຽກງານກວດສອບປະຈຳປີ 2018 ແລະ ບົດລາຍງານຂອງອົງການກວດກາລັດຖະບານກ່ຽວກັບຜົນຂອງການກວດກາຕາມຜົນຂອງການກວດສອບ ຊຶ່ງໄດ້ຍົກໃຫ້ເຫັນວ່າ ການຈັດຕັ້ງປະຕິບັດໂຄງການຈຳນວນໜຶ່ງບໍ່ຖືກຕາມຂັ້ນຕອນຂອງກົດໝາຍ ແລະ ລະບຽບການເຊັ່ນ ບໍ່ມີການສຳຫຼວດ-ອອກແບບ ແລະ ບໍ່ໄດ້ຮັບຮອງຈາກຂະແໜງການທີ່ກ່ຽວຂ້ອງ ຫຼື ມີການຮັບຮອງກໍຮັບຮອງແບບຮູບການ, ແບບຂາດຄວາມຮັບຜິດຊອບ, ບໍ່ມີການປະເມີນ, ບໍ່ປະມູນ, ການສະຫຼຸບບໍລິມາດວຽກບໍ່ຖືກກັບຕົວຈິງ, ການຊຳລະຊ້ຳຊ້ອນ ແລະ ບັນຫາອື່ນໆ ເຮັດໃຫ້ກາຍເປັນໜີ້ສິນສາທາລະນະຢ່າງຫຼວງຫຼາຍ.
ໃນໄລຍະຜ່ານມາ ລັດຖະ ບານ, ກະຊວງ-ອົງການ ແລະອົງການປົກຄອງທ້ອງຖິ່ນໄດ້ ສຸມໃສ່ການລົງທຶນກໍ່ສ້າງພື້ນຖານໂຄງລ່າງໃນດ້ານຕ່າງໆ ເປັນຈຳນວນຫຼວງຫຼາຍແມ່ນບໍ່ໄດ້ເລືອກເຟັ້ນຈັດລະ ດັບໂຄງການໃດມີຄວາມຈຳ ເປັນ, ໂຄງການໃດເປັນບຸລິ ມະສິດເຮັດກ່ອນເຮັດຫຼັງ ແລະ ບໍ່ໄດ້ໄລ່ລຽງ ແລະ ຄົ້ນຄ້ວາ ແຫຼ່ງງົບປະມານທີ່ຈະຊຳລະຈຶ່ງເປັນສາເຫດເຮັດໃຫ້ໂຄງ ການຕ່າງໆທີ່ໄດ້ລົງທຶນໄປແລ້ວກາຍເປັນໜີ້ສີນຄຸມເຄືອແກ່ຍາວແກ້ໄຂບໍ່ຕົກ, ຄວາມຮັບຜິດຊອບໃນການປະຕິບັດພາລະບົດບາດ, ສິດໜ້າທີ່ ຕາມກົດໝາຍກຳນົດໄວ້ຂອງເຈົ້າຂອງໂຄງການ, ຄະນະຮັບຜິດຊອບໂຄງການ, ບໍລິສັດທີ່ປຶກສາ, ວິຊາການປະຈຳພາກສະໜາມ, ບໍລິສັດຮັບເໝົາລວມເຖິງຄະນະກຳມະການກວດກາຢັ້ງຢືນການປະຕິບັດວຽກສຳ ເລັດຍັງບໍ່ສູງ ຫຼາຍໂຄງການບໍ່ໂປ່ງໃສສະແດງອອກຄືບໍ່ມີການປະເມີນ, ບໍ່ມີການປະມູນ, ການກໍ່ສ້າງບໍ່ເຮັດຕາມອອກແບບມີການປ່ຽນແປງແບບ (ບໍລິມາດວຽກເພີ່ມຂຶ້ນ ຫຼື ຫຼຸດລົງ) ການຢັ້ງຢືນບໍລິມາດວຽກສຳເລັດ 100% ແຕ່ຕົວຈິງຍັງບໍ່ທັນໄດ້ສຳເລັດ 100% ແລະ ມີຫຼາຍໜ້າວຽກບໍ່ໄດ້ຈັດຕັ້ງປະຕິບັດ,
ຄຸນນະພາບຂອງໂຄງການບໍ່ໄດ້ຕາມການອອກແບບ, ເປ່ເພກ່ອນກຳນົດເວລາທີ່ກຳນົດໄວ້ ເຮັດໃຫ້ລັດເສຍຫາຍງົບປະມານຢ່າງຫຼວງຫຼາຍ ຊຶ່ງບັນຫາທັງໝົດແມ່ນຍ້ອນພະນັກງານ, ເຈົ້າຂອງໂຄງການແລະຂະ ແໜງການທີ່ກ່ຽວຂ້ອງແລະບໍລິສັດທີ່ປຶກສາມີການສົມຮູ້ຮ່ວມຄິດນຳກັນ ຊຶ່ງເຮັດສອງໜ້າທີ່ຄື: ດ້ານໜຶ່ງແມ່ນປະຕິບັດໜ້າທີ່ໃຫ້ລັດແຕ່ອີກດ້ານໜຶ່ງ ແມ່ນເຮັດໜ້າທີ່ໃຫ້ບໍລິສັດ ສະແດງອອກໃນການປົກປ້ອງຜົນປະໂຫຍດໃຫ້ບໍລິສັດ ແລະ ບໍ່ລາຍງານຄວາມຈິງໃຫ້ຂັ້ນເທິງຂອງຕົນ, ການອອກນິຕິກຳຂອງຂະແໜງການກ່ຽວຂ້ອງມີບາງນິຕິກຳບໍ່ສອດຄ່ອງກັບກົດໝາຍ ແລະ ລະບຽບການທີ່ມີແລ້ວ, ການປະສານສົມທົບລະຫວ່າງກະຊວງແຜນການແລະ ການລົງທຶນກັບພະແນກ ແຜນການ ແລະ ການລົງທຶນແຂວງ ແລະ ເຈົ້າຂອງໂຄງການກ່ຽວກັບການສະຫຼຸບໂຕເລກ, ການຊຳລະມູນຄ່າໂຄງການຍັງບໍ່ຖືກກັບການຊຳລະຕົວຈິງ, ສຳລັບທິດທາງແຜນການປະສານງານໃນຕໍ່ໜ້າອົງການກວດກາລັດຖະບານຈະສືບຕໍ່ກວດກາຕາມຜົນຂອງການກວດສອບທີ່ຍັງຄ້າງຄາໃນສົກປີ 2013- 2014, 2014-2015 ແລະ 2015-2016 ຕາມທີ່ອົງການກວດສອບສັງລວມສົ່ງໃຫ້, ສືບຕໍ່ປະຕິບັດຕາມພາລະບົດບາດ, ສິດໜ້າທີ່ຂອງແຕ່ລະອົງການ ທີ່ໄດ້ກຳນົດໄວ້ໃນກົດໝາຍ, ລະບຽບການ ແລະຕາມບົດບັນທຶກການປະສານງານລະຫວ່າງສອງອົງການໃຫ້ດີກວ່າເກົ່າ, ອົງການກວດກາລັດຖະບານ ແລະ ອົງການກວດສອບແຫ່ງລັດຊີ້ນຳຂະແໜງສາຍຕັ້ງຂອງຕົນ ເພື່ອຈັດຕັ້ງປະຕິບັດເນື້ອໃນບົດບັນທຶກການປະສານງານ ແລະ ພ້ອມກັນປະຕິບັດຕາມເນື້ອໃນບົດບັນທຶກການປະສານງານຄືກັນກັບຢູ່ຂັ້ນສູນກາງ.
ກອງປະຊຸມວຽກງານກວດກາ ປະຈໍາປີ 2018 ກະຊວງອຸດສາຫະກຳ ແລະ ການຄ້າ ( ອຄ ) ໄດ້ເປີດເຜີຍເຖິງຕົວເລກພະນັກງານທີ່ລະເມີດກົດລະບຽບ ແລະ ຖືກປະຕິບັດວິໄນ ທັງໝົດ 33 ຄົນ. ໃນນີ້, ມີມະຕິຕົກລົງປະຕິບັດວິໄນແລ້ວ 25 ຄົນ.
ກອງປະຊຸມດັ່ງກ່າວຈັດຂຶ້ນໃນວັນທີ 26 ມີນາ 2019 ຜ່ານມາ ຢູ່ທີ່ຫ້ອງປະຊຸມໃຫຍ່ກະຊວງ ອຄ ໂດຍການເປັນ ປະທານຂອງ ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງ ອຄ, ມີ ທ່ານ ບຸນມີ ມະນີວົງ ຮອງລັດຖະມົນຕີກະຊວງ ອຄ, ມີຕາງໜ້າຈາກຄະນະກວດກາສູນກາງ, ມີບັນດາພະນັກງານຈາກກົມອ້ອມຂ້າງ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ນາງ ເຂັມມະນີ ພົນເສນາ ກ່າວເປີດກອງປະຊຸມບາງຕອນ ວ່າ: ກອງປະຊຸມໃນຄັ້ງນີ້ເປັນການເບິ່ງຄືນວຽກງານກວດກາໃນທົ່ວປະເທດເວົ້າລວມ, ເວົ້າສະເພາະ ກະຊວງ ອຄ ໃນໜຶ່ງປີຜ່ານມາໄດ້ພ້ອມກັນຕັ້ງໜ້າບຸກບືນປະຕິບັດວຽກງານຕິດຕາມກວດກາ, ສະກັດກັ້ນ ແລະ ຕ້ານການສໍ້ລາດບັງຫຼວງ ຄົ້ນຄວ້າແກ້ໄຂຄໍາຮ້ອງ ແລະ ປັບປຸງກົງຈັກການຈັດຕັ້ງຢູ່ຂັ້ນຂອງຕົນມີຜົນສໍາເລັດຫຼາຍດ້ານ. ຄຽງຄູ່ກັນນັ້ນ, ພວກເຮົາກໍຍັງມີດ້ານອ່ອນ ແລະ ຂໍ້ຄົງຄ້າງ. ສະນັ້ນ, ກອງປະຊຸມໃນຄັ້ງນີ້ຈະໄດ້ພ້ອມກັນຄົ້ນຄວ້າຍົກໃຫ້ເຫັນດ້ານ ດີ, ບົດຮຽນທີ່ຕ້ອງເສີມຂະຫຍາຍ, ຊອກໃຫ້ເຫັນດ້ານອ່ອນເພື່ອປັບປຸງແກ້ໄຂໃນຕໍ່ໜ້າ ເປັນຕົ້ນແມ່ນວຽກງານຕິດຕາມກວດກາພາຍໃນພັກ, ການຄຸ້ມຄອງບໍລິຫານລັດດ້ວຍກົດໝາຍ, ສະກັດກັ້ນ ແລະ ຕ້ານການສໍ້ລາດບັງຫຼວງ. ພ້ອມກັນນັ້ນ, ຕ້ອງຄົ້ນຄວ້າປະກອບຄໍາຄິດເຫັນໃຫ້ເລິກເຊິ່ງເພື່ອຄວາມເປັນເອກະພາບຕໍ່ທິດທາງໜ້າທີ່ ແລະ ບັນດາວຽກທີ່ຈະຕ້ອງສຸມໃສ່ຈັດຕັ້ງປະຕິບັດໃນປີ 2019 ນີ້.
ທ່ານ ພຸດທະວັນ ນັນທະວົງ ຫົວໜ້າກົມກວດກາ ກະຊວງ ອຄ ໄດ້ລາຍງານບົດສະຫຼຸບການເຄື່ອນໄຫວວຽກງານກວດກາ ປີ 2018 ແລະ ທິດທາງແຜນການປີ 2019 ຕໍ່ກອງປະຊຸມໂດຍຫຍໍ້ ວ່າ: ການຕິດຕາມກວດກາພຶດຕິກໍາທີ່ເປັນການສໍ້ລາດບັງຫຼວງຢູ່ໃນຂະແໜງອຸດສາຫະກຳ ແລະ ການຄ້າ ແມ່ນໄດ້ຈັດຕັ້ງປະຕິບັດກວດກາຕາມຄໍາສັ່ງ, ຂໍ້ຕົກລົງ, ຫາງສຽງຂອງສັງຄົມ, ຄໍາຮ້ອງ – ຄໍາສະເໜີຂອງພົນລະເມືອງມີສະມາຊິກພັກ – ພະນັກງານທີ່ລະເມີດລະບຽບຖືກປະຕິບັດວິໄນມີທັງໝົດ 33 ຄົນ ຢູ່ 5 ແຂວງ, 6 ເມືອງ, ມີມະຕິຕົກລົງປະຕິບັດວິໄນແລ້ວ 25 ຄົນ ຍັງລໍຖ້າ 8 ຄົນ, ມີຕໍາແໜ່ງເປັນຫົວໜ້າ, ຮອງຫົວໜ້າ ແລະ ວິຊາການຫ້ອງການ ອຄ ເມືອງ; ສໍາລັບ 25 ຄົນ ໄດ້ປະຕິບັດລະບຽບວິໄນຕາມຮູບການ ດັ່ງ ນີ້: ມອບໃຫ້ຂະບວນຍຸຕິທໍາ 2 ຄົນ; ຫຼຸດຕໍາແໜ່ງ 1 ຂັ້ນ, ຍົກຍ້າຍໄປຮັບຕໍາແໜ່ງອື່ນທີ່ຕໍ່າກວ່າ, ໂຈະການເລື່ອນຊັ້ນ – ຂັ້ນເງິນເດືອນ 1 ຮອບ ແລະ ໂຈະການຍ້ອງຍໍ 1 ປີ ມີ 4 ຄົນ; ໄລ່ອອກການ 1 ຄົນ ( ເປັນພະນັກງານອາສາສະໝັກ ); ກ່າວເຕືອນຄວາມຜິດ, ຂຽນໃບສໍາຫຼວດຕົນເອງ ແລະ ບັນທຶກຄວາມຜິດໄວ້ເປັນຫຼັກຖານ 18 ຄົນ; ການປະຕິບັດວິໄນຄັ້ງນີ້ບັນຫາທີ່ຕິດພັນກັບການປ່ອຍໄມ້ 19 ຄົນ; ຄະດີກັກລົດສິນຄ້າ ແລະ ປັບໃໝເອົາເງິນ ແຕ່ບໍ່ເອົາເຂົ້າລັດ 9 ຄົນ.
ເຖິງຈະກຳຈັດໄດ້ແຕ່ສະມາຊິກພັກເມືອງ ສະມາຊິກພັກແຂວງ ແຕ່ມັນກໍ່ສາມາດເຮັດໃຫ້ສະມາຊິກສູນກາງພັກລະອາຍແກ່ໃຈ ບໍ່ຫລາຍກໍ່ໜ້ອຍ.ການປະຕິບັດວິໄນສະມາຊິກພັກແມ່ນການຍົກຍ້າຍຈາກໜ້າທີ່ນຶ່ງໄປຫາໜ້າທີ່ອື່ນ ຈາກຕຳແໜ່ງໜຶ່ງໄປຮັກສາຕຳແໜ່ງອື່ນ ບໍ່ແມ່ນຈັບກຸມຄຸມຂັງເອົາໄປສຳມະນາຢູ່ເຂດໄກກັນດານເໝືອນກັບການທຳວິໄນພະນັກງານຊັ້ນນ້ອຍໆທີ່ບໍ່ໄດ້ເປັນສະມາຊິກພັກ.
