ຣັຖບານລາວ ຕິດໜີ້ຕ່າງປະເທດ ຢ່າງ ມະຫາສານ ເປັນຕົ້ນ ທະນາຄານພັທນາເອເຊັຍ, ທະນາຄານໂລກ ແລະ ຣັຖບານຈີນປະເທດດຽວ ກໍຍັງຕິດໜີ້ເຖິງ 1 ຕື້ 600 ປາຍລ້ານ ໂດລາ ສະຫະຣັຖ ໂດຍຫວັງທີ່ຈະໃຫ້ຕ່າງປະເທດ ເຂົ້າມາຂຸດຄົ້ນເອົາ ແຮ່ທາດອັນປະເສີດຕ່າງໆ ຢ່າງຫຼວງຫຼາຍຂອງລາວເປັນສິ່ງໃຊ້ແທນຄືນ. ເວົ້າສະເພາະແຕ່ໂຄງການສ້າງທາງຣົດໄຟ ຄວາມໄວສູງລາວ-ຈີນ ທາງການລາວກໍຕົກລົງ ມອບ 2 ບໍ່ແຮ່ໃຫຍ່ ໃຫ້ຣັຖບານຈີນ ຂຸດຄົ້ນ ແລະເອົາໄປ.
ຕໍ່ຄຳຖາມຂອງສະມາຊິກສະພາແຫ່ງຊາດລາວ ກ່ຽວກັບການເປັນໜີ້ຂອງ ສປປລາວ ໃນກອງປະຊຸມສມັຍສາມັນເທື່ອທີ 8 ຂອງສະພາ ແຫ່ງຊາດຊຸດທີ 8 ທີ່ຫາກໍສິ້ນສຸດລົງນີ້ ທ່ານ ສົມດີ ດວງດີ ຮອງນາຍົກຣັຖມົນຕຣີ ຣັຖມົນຕຣີກະຊວງການເງິນ ເວົ້າແບບອືດໆອາດໆວ່າ ຣັຖບານລາວ ຕິດໜີ້ເຖິງ 60% ຂອງລວມຍອດມູນຄ່າຜລິດຕະພັນ ພາຍໃນ ຄືເປັນເທື່ອທຳອິດ ທີ່ທາງການລາວ ປະກາດອອກມາວ່າ ຣັຖບານ ສປປລາວ ເປັນໜີ້ສາທາຣະນະ 60% ໃນຂນະທີ່ ນັກຊ່ຽວຊານດ້ານການເງິນ ຂອງ ທະນາຄານໂລກ ປະຈຳລາວ ຢືນຢັນວ່າ ໜີ້ສິນສາທາຣະນະຂອງຣັຖບານລາວ ຫຼາຍກວ່າ 60% ຂອງລວມຍອດມູນຄ່າຜລິດຕະພັນ ພາຍໃນ ຫຼື GDP ຂອງລາວ ມີມາຕັ້ງແຕ່ປີ 2016 ທີ່ເປັນໜີ້ເຖິງ 9 ຕື້ ໂດລາສະຫະຣັຖ.
ຕາມຣາຍງານຂອງທະນາຄານໂລກ ເມື່ອປີ 2016 ແລະ ທັງວ່າ ໜີ້ຂອງຣັຖບານລາວ ເພີ່ມຂຶ້ນເປັນ 65,3% ຄືເທົ່າກັບ 10 ຕື້ ໂດລາ ສະຫະຣັຖ ໃນປີ 2018 ແລະທັງຍັງຈະເພີ່ມຂຶ້ນເປັນ 68% ໃນປີ 2019 ແລະ ຫຼາຍກວ່າ 70% ໃນປີ 2020 ຊຶ່ງເປັນປີສິ້ນສຸດ ຂອງ ແຜນພັທນາເສຖກິດ-ສັງຄົມ 5 ປີ ຄັ້ງທີ 8 ຂອງ ຣັຖບານລາວ ອັນເປັນການຍາກທີ່ສຸດ ທີ່ຈະໃຊ້ແທນຄືນໄດ້ ຕາມກຳນົດເວລາ.
ທ່ານ ສົມດີ ດວງດີ ກ່າວເຖິງເຣຶ່ອງການແກ້ໄຂບັນຫາ ໜີ້ສາທະຣະນະ ໃນປີໜ້າ ຄືປີ 2020 ວ່າມີຄວາມຫຍຸ້ງຍາກ ແລະເປັນເຣຶ່ອງທີ່ ທ້າທາຍຫລາຍ ທີ່ຈະຊຳຣະເງິນໜີ້ສິນ ໄດ້ຢ່າງຄົບຖ້ວນ ຍ້ອນບໍ່ມີງົບປະມານ ພຽງພໍ ດັ່ງທີ່ທ່ານກ່າວຕໍ່ ກອງປະຊຸມ ສະພາ ແຫ່ງຊາດວ່າ:
"ຕ້ອງການເງິນເພື່ອມາດຸນດ່ຽງ ຊຳຣະຕົ້ນທຶນເງິນກູ້ຕ່າງໆ 10,347 ຕື້ກີບ. ອັນນີ້ຖືວ່າເປັນຄວາມຕ້ອງການ ແຫລ່ງທຶນທີ່ສູງ ຖືວ່າເປັນ ແຫລ່ງດຸນດ່ຽງ ທີ່ຫລາຍພໍສົມຄວນ ເພື່ອຈະຊອກທຶນມາແກ້ໄຂ ການດຸນດ່ຽງ ຂອງພວກເຮົາໃນປີ 2020."
ຕາມຄຳເວົ້າຂອງທ່ານ ໃນການຊຳຣະເງິນ ກູ້ຢືມທີ່ວ່ານີ້ ປະກອບດ້ວຍ 2 ພາກພາກສ່ວນ ຄືການຊຳຣະເງິນກູ້ຢືມ ຕ່າງປະເທດ 5,759 ຕື້ກີບ ແລະ ເງິນກູ້ຢືມພາຍ ໃນປະເທດ 4,588 ຕື້ກີບ. ເງິນຈຳນວນທີ່ວ່ານີ້ ຍັງບໍ່ໄດ້ລວມດອກເບັ້ຽ ທີ່ຈະຕ້ອງໄດ້ຊຳຣະ ນຳດ້ວຍ.
ໃນການແກ້ໄຂບັນຫາດັ່ງກ່າວ ທ່ານ ສົມດີ ດວງດີ ເວົ້າວ່າ ມີມາດຕະການເພື່ອເຮັດໃຫ້ສາມາດ ຊຳຣະໜີ້ ສາທາຣະນະ ໄດ້ຄົບຖ້ວນ ຕາມແຜນ ໃນປີ 2020 ຄື ຣັຖບານຈະສຸມໃສ່ ວຽກງານກວດກາ ໃຫ້ເຂັ້ມງວດເພິ່ມຂຶ້ນ ເພື່ອບໍ່ໃຫ້ງົບປະມານ ຮົ່ວໄຫລ ພ້ອມທັງສັ່ງໃຫ້ ທຸກອົງການ ແລະ ໜ່ວຍງານຂອງຣັຖ ທົ່ວປະເທດ ປະຢັດ ດັ່ງທີ່ທ່ານກ່າວວ່າ:
"ມາດຕະການປີ 2020 ນີ້ຈະສຸໃສ່ປະຕິບັດ ເປັນຕົ້ນແມ່ນການແກ້ໄຂການຮົ່ວໄຫລ ຂອງງົບປະມານ ການດຳເນີນມາດຕະການ ປະຢັດ ຣາຍຈ່າຍ ບໍຣິຫານຢ່າງເຂັ້ມງວດ ປັບປຸງການຄຸ້ມຄອງ ແຫລ່ງຣາຍຮັບ."
ເຈົ້າໜີ້ຣາຍໃຫຍ່ຂອງຣັຖບານລາວ ຄືທະນາຄານພັທນາເອເຊຍ, ທະນາຄານໂລກ ແລະຣັຖບານຈີນ. ແລະກໍຄາດກັນວ່າ ຈີນຈະກ້າວຂຶ້ນ ເປັນເຈົ້າໜີ້ອັນດັບ 1 ຂອງລາວ ໃນອີກ 3 ປີຕໍ່ໜ້າ ຂະນທີ່ເຈົ້າໜ້າທີ່ຂັ້ນສູງຂອງກະຊວງການເງິນ ສປປລາວ ເປີດເຜີຍວ່າ ນັບແຕ່ປີ 1990 ມາເຖິງປັດຈຸບັນ ຣັຖບານຈີນ ໃຫ້ ການຊ່ອຍເຫຼືອລ້າແກ່ຣັຖບານ ສປປລາວ 5,900 ລ້ານຢວນ, ໃຫ້ກູ້ແບບບໍ່ມີດອກເບັ້ຍ 1,300 ລ້ານຢວນ ແລະເງິນກູ້ພິເສດດອກເບັ້ຍຕ່ຳ 11,000 ພັນປາຍລ້ານຢວນ ຫຼືເກືອບ 1,630 ລ້ານໂດລາສະຫະຣັຖ. ຈຳນວນເງິນທີ່ເວົ້າມານັ້ນ ຍັງບໍ່ນັບເງິນຈຳນວນ 4 ພັນ ລ້ານຢວນ ທີ່ທ່ານ ສີ ຈິ່ນຜິງ ຫົວໜ້າພັກຄອມມິວນິສຈີນ ປະທານປະເທດຈີນ ໄດ້ຊ່ອຍເຫຼືອລາວໃນໂອກາດ ທີ່ທ່ານມາຢ້ຽມຢາມ ລາວ ເມື່ອປີ 2018, ຕາມການເປີດເຜີຍ ຂອງເຈົ້າໜ້າທີ່ຂັ້ນສູງຂອງກະຊວງການເງິນ ສປປລາວ.
ຈີນ ເປັນຜູ້ລົງທຶນອັນດັບທີ 1 ຢູ່ ສປປລາວ ເປັນມູນຄ່າທັງໝົດຫລາຍກວ່າ 11,500 ລ້ານ ໂດລາສະຫະຣັຖ ໃນ 779 ໂຄງການ ເປັນຕົ້ນແມ່ນການລົງທຶນ ສ້າງໂຄງຮ່າງພື້ນຖານ, ເຊັ່ນເຂື່ອນໄຟຟ້າ ເຂດເສຖກິດຕ່າງໆ, ທາງຣົດໄຟຄວາມໄວສູງ ລາວ-ຈີນ, ທາງດ່ວນ ແລະເຄື່ອຂ່າຍສາຍສົ່ງໄຟຟ້າແຮງສູງ ທີ່ເປັນໂຄງການຮ່ວມທຶນ ໂດຍທີ່ຣັຖບານ ສປປລາວ ໄດ້ກູ້ຢືມທຶນຈາກຈີນ ອັນເຮັດໃຫ້ສາມາດ ຄາດຄະເນໄດ້ວ່າ ຣັຖບານ ສປປລາວ ຈະເປັນໜີ້ເງິນກູ້ຈາກ ຣັຖບານຈີນ ເພີ່ມຂຶ້ນຫລາຍກວ່າ 20,000 ລ້ານຢວນ ໃນປີ 2021 ແລະ ທັງຈະຕ້ອງໄດ້ເພິ່ງພາອາສັຍຈີນ ດ້ານວິທຍາສາດ ແລະ ເທັກໂນໂລຊີ ຫຼາຍຂຶ້ນນຳດ້ວຍ.
ເວົ້າເຖິງການເປັນໜີ້ສາທາຣະນະ ຊຶ່ງຣັຖບານລາວ ຈະຕ້ອງໄດ້ໃຊ້ແທນຄືນ ທັງຕົ້ນທັງດອກ ໃຫ້ເຈົ້າໜີ້ເປັນຈຳນວນຫຼວງຫຼາຍ ນັ້ນ ທ່ານ ປາກຽນ ວິຣະວົງ ນັກຮຽນຮູ້ປັນຍາຊົນ ອາວຸໂສລາວ ທີ່ປະເທດອ໊ອສເຕຣເລັຍ ຣັຖບານຍັງ ຈະຊອກກູ້ຢືມຢູ່ຕໍ່ໄປ ຈົນກວ່າວ່າຕ່າງປະເທດ ຈະຕີຣາຄາວ່າ ບໍ່ມີຄຸນສົມບັດ ທີ່ຈະຢືມເງິນໄດ້, ຕາມຄຳເວົ້າທີ່ທ່ານໃຫ້ສຳພາດ ວິທຍຸເອເຊັຍເສຣີ ໃນຂນະທີ່ກອງປະຊຸມ ເທື່ອທີ 8 ຂອງ ສະພາແຫ່ງຊາດ ຊຸດທີ 8 ຍັງດຳເນີນຢູ່ ນັ້ນຕອນນຶ່ງວ່າ:
"ເຣຶ່ອງເມືອງລາວຢືມເງິນຫັ້ນເກາະ ເພິ່ນຢືມເງິນນີ້ ເພິ່ນຢືມຈົນຕິດເປັນນິສັຍແລ້ວ ເງິນຢືມໄປຫັ້ນ ແທ້ຈິງແລ້ວຫັ້ນເງິນ ມັນບໍ່ເຂົ້າຣັຖ ບໍ່ ເຂົ້າຫລວງ ບໍ່ເຂົ້າຄັງເງິນຫັ້ນເກາະ ເງິນທີ່ຫາຢືມມາໄດ້ຫັ້ນເກາະ ມາຈ່າຍມະລຸມຊຸມຊົ້ວ ມັນກາຍຈາກຄຳວ່າຮົ່ວໄຫລ ມັນໄຫລລາມໄປໝົດ ຕັ້ງແຕ່ຍອດ ຕັ້ງແຕ່ກົກເຖິງປາຍເລີຍ ບາດນີ້ຫັ້ນເພິ່ນກະຫາເງິນຕຣາຕ່າງປະເທດບໍ່ໄດ້ ເພາະສະນັ້ນເງິນເພິ່ນຢືມໄປກ້ອນໃດ ທີ່ວ່າເພິ່ນ ຢືມໄດ້ ແລ້ວຫັ້ນນະ ກໍຕ້ອງຢືມໃໝ່ອີກ ຕ້ອງຢືມໃໝ່ອີກ ຕ້ອງຢືມໃໝ່ອີກເລື້ອຍໆ ຢືມຈົນເປັນ ນິສັຍແລ້ວ ແລ້ວມາຕິດໜີ້ ແນ່ນອນເພິ່ນ ສິຕິດຂຶ້ນ ນັບມື້ຈົນວ່າເຂົາສິກາງເພິ່ນເປັນປະເທດ ທີ່ບໍ່ມີຄຸນສົມບັດ ໃນການຢືມເງິນໄດ້ພຸ້ນແຫລະ."
ການເປັນໜີ້ສາທາຣະນະ ອັນມະຫາສານ ຂອງຣັຖບານ ສປປລາວ ທີ່ຈະຕ້ອງໄດ້ໃຊ້ທັງໜີ້ ທັງດອກເບັ້ຽເປັນຈຳນວນຫຼວງຫຼາຍໃນແຕ່ລະປີ ມີຂຶ້ນໃນຂນະທີ່ປະເທດ ຍັງທຸກຍາກຂາດເຂີນ ການພັທນາເສຖກິດ-ສັງຄົມ ອາໃສແຕ່ການຊ່ອຍເຫລືອ ຂອງ ຕ່າງປະເທດ ເປັນຕົ້ນຕໍນັ້ນ ກະທົບໂດຍກົງຕໍ່ອັນທີ່ວ່າ ຈະເຮັດໃຫ້ ສປປລາວ ຫຼຸດພົ້ນອອກຈາກສະຖານະພາບ ການເປັນປະເທດດ້ອຍພັທນາ ຊຶ່ງ ອົງການສະຫະ ປະຊາຊາດ ຈະປະເມີນເປັນຄັ້ງທີສອງໃນປີ 2021 ທີ່ຈະມາເຖິງນີ້ ແລະຖ້າຫາກວ່າ ການປະເມີນຜ່ານ ກໍຈະສາມາດປະກາດຫຼຸດພົ້ນ ອອກໄດ້ ໃນປີ 2024 ຂນະທີ່ຊຸມປີທີ່ຜ່ານ ແລະໃນປີ 2019 ນີ້ ການເຕີບໂຕເສຖກິດຂອງລາວ ກໍຄາດວ່າ ຈະຂຍາຍຕົວຢູ່ໃນລະດັບ 6,4% ຄືບໍ່ໄດ້ຕາມທີ່ມະຕິ ກອງປະຊຸມໃຫຍ່ ຄັ້ງລ້າສຸດຂອງພັກ ປະຊາຊົນ ປະຕິວັດລາວ ຜູ້ຜູກຂາດອຳນາດ ແບບຜະເດັດການພັກດຽວ ທີ່ກຳນົດເອົາໄວ້ ໃນແຜນພັທນາເສຖກິດ-ສັງຄົມ 5 ປີ ຄັ້ງທີ 8 ແຕ່ 2016 ຫາ 2020 ທີ່ວ່າຈະບໍ່ໃຫ້ຫຼຸດ 7,5% ຕໍ່ປີ.
ແຕ່ເຖິງຢ່າງໃດກໍຕາມ ເພື່ອຄວາມກະຈ່າງຕື່ມກ່ຽວກັບ ເຣຶ່ອງທີ່ວ່ານີ້ ວິທຍຸເອເຊັຍເສຣີ ໄດ້ພຍາຍາມຕິດຕໍ່ ຂໍຄວາມເຫັນຈາກ ກົມເສຖກິດ ກະຊວງການຕ່າງປະເທດ, ກົມພົວພັນ ແລະຜແນກໜີິ້ສິນ ກະຊວງການເງິນ, ກົມແຜນການ, ຜແນກສະຖາບັນ ການເງິນສາກົນ ແລະ ສະຖາບັນຄົ້ນຄວ້າເສຖກິດແຫ່ງຊາດ ຂອງກົມຮ່ວມມືສາກົນ ກະຊວງແຜນການ ແລະການລົງທຶນ. ແຕ່ບໍ່ສາມາດຕິດຕໍ່ໄດ້.
ທ່ານ Phil Robertson ຮອງຜູ້ອຳນວຍການອົງການ ສິ້ງຊອມດ້່ານສິດທິມະນຸດ ປະຈຳຂົງເຂດເອເຊັຽ ແລະ ປາຊິຟິກ ໃຫ້ສຳພາດຕໍ່ເອເຊັຽ ເສຣິ ວ່າການຫາຍສາບສູນຂອງ ທ້າວ ເພັດພູທອນ ພິລາຈັນ ຢູ່ລາວ, ເຈົ້າຫນ້າທີ່ລາວ ຕ້ອງແຈ້ງໃຫ້ ສາທາຣະນະຊົນຮູ້ວ່າ ມີຫຍັງເກີດຂຶ້ນ ກັບເຂົາ ຍ້ອນວ່າ ເຂົາຫາຍສາບສູນ ຫລັງຈາກຂ້າມໄປລາວ, ດ່ັງທ່ານກ່າວຕໍ່ເອເຊັຽເສຣີ ໃນມື້ວັນທີ 11 ທັນວາ ປີ 2019 ວ່າ:
“ການຫາຍສາບສູນ ຂອງ ທ້າວເພັດພູທອນ ຢູ່ລາວ ເຈົ້າຫນ້າທີ່ລາວ ຕ້ອງແຈ້ງໃຫ້ສາທາຣະນະຊົນ ຮູ້ກ່ຽວກັບຂໍ້ມູນທັງຫມົດ ທີ່ເກີດຂຶ້ນກັບ ລາວມັນເປັນເວລາເກືອບຮອດນຶ່ງເດືອນ ທີ່ຮູ້ກ່ຽວກັບລາວ ຄັ້ງຫຼ້າສຸດ ຄອບຄົວ ແລະ ຫມູ່ເພື່ອນຂອງລາວ ມີຂໍ້ມູນໜ້ອຍວ່າລາວຈະຢູ່ໃສ, ອິງຕາມປວັດການເຄື່ອນໄຫວ ທາງດ້ານການເມືອງ ຢູ່ບາງກອກ ຫລາຍຄົນສົງສັຍວ່າລາວຖືກຈັບ."
ທ່ານວ່າ ທາງການລາວ ຕ້ອງຮັບຜິດຊອບກ່ຽວກັບ ການຫາຍສາບສູນ ຂອງ ທ້່າວເພັດພູທອນ ເຊັ່ນກັນກັບຫຼາຍຄົນລາວ, ຫຼາຍຄົນທີ່ຖືກ ບັງຄັບ ໃຫ້ຫາຍສາບສູນໃນລາວ ໃນຣະຍະທີ່ຜ່ານມາ ແລະຕ້ອງສືບສວນເຣື້ອງນີ້ ຢ່າງຮີບດ່ວນ ທ່ານກ່າວຕື່ມວ່າ:
“ເທົ່າເຖິງປັດຈຸຍັນ ຍັງບໍ່ມີການຢືນຢັນຫຍັງຫມົດ ຈາກທາງການລາວ ສິ່ງທີ່ພວກເຮົາຢາກເວົ້າກໍແມ່ນວ່າ ຖ້າວ່າລາວຖືກເຈົ້າຫນ້າທີ່ລາວຈັບ ທາງການລາວ ຕ້ອງປະກາດໃຫ້ຮູ້ ແລະ ບອກເຖິງບ່ອນທີ່ລາວຖືກກັກຂັງ ຮ່ວມທັງອະທິບາຍ ວ່າລາວຖືກຈັບ ຍ້ອນຫຍັງ ແຕ່ຖ້າຫາກ ຣັຖບານລາວ ປະຕິເສດວ່າບໍ່ມີສ່ວນພົວພັນ ກ່ຽວກັບເຣື້ອງນີ້ ກໍຕ້ອງທຳການສືບສວນ ຢ່າງຮີບດ່ວນວ່າ ມີຫຍັງເກີດຂື້ນກັບລາວ ແລະ ຣາຍງານໃຫ້ຍາດພີ່່ນ້ອງ ແລະ ສາທາຣະນະຊົນຮູ້.”
ໃນຂນະດຽວກັນ ຍານາງ ວານິດາ ເທພສຸວັນ ປະທານ ຂະບວນການລາວ ເພື່ອ ສິດທິມະນຸດ ທີ່ມີສູນກາງຢູ່ ປະເທດຝຣັ່ງເສດ ກໍເວົ້າວ່າ ກໍຣະນີຂອງ ທ້າວ ເພັດພູທອນ ເປັນອີກກໍຣະນີນຶ່ງ ທີ່ຄົນລາວຖືກບັງຄັບ ໃຫ້ຫາຍສາບສູນ ໃນລາວ ຄືກັບຄົນລາວ ຫລາຍຄົນທີ່ຜ່ານມາ ເປັນຕົ້ນ ທ່ານ ສົມບັດ ສົມພອນ ແລະຄົນອື່ນໆ, ດັ່ງ ຍານາງກ່າວຕໍ່ ເອເຊັຽເສຣີ ໃນມື້ດຽວກັນນັ້ນວ່າ:
“ທ້າວ ເພັດພູພອນ ແມ່ນກໍຣະນີໃຫມ່ ຫລ້າສຸດ ຂອງການຫາຍສາບສູນ ແບບຖືກບັງຄັບ ໃນສປປລາວ ມັນສະແດງໃຫ້ເຫັນ ອີກເທື່ອນຶ່ງ ວ່າຣະບອບນີ້ ທຳທຸກຢ່າງ ໃນການປາບປາມທຸກຮູບແບບ. ດ່ັງນັ້ນ ໃນຄຳປາສັຍຕໍ່ອົງການສາກົນ ຂອງຂ້າພະເຈົ້າ ໃນມື້ອື່ນນີ້ ຂ້າພະເຈົ້າ ຈະຍົກບັນຫາການຫາຍສາບສູນ ແບບຖືກບັງຄັບໃນລາວ ພ້ອມທັງຮຽກຮ້ອງໃຫ້ເພີ່ນ ຮຽກທວງໃຫ້ ສປປລາວ ແກ້ໄຂການລ່ວງລະເມີດ ສິດທິມະນຸດ ທີ່ເກີດຂຶ້ນຢ່າງຕໍ່ເນື່ອງ ໃນລາວ.”
ທ້າວ ເພັດພູທອນ ເປັນນຶ່ງໃນຈໍານວນຄົນງານລາວ ທີ່ເຄີຍໄປຮຽກຮ້ອງເພື່ອສິດທິມະນຸດ ແລະປະຊາທິປະໄຕໃນລາວ ຢູ່ຕໍ່ໜ້າສະຖານທູດ ລາວຢູ່ບາງກອກ, ຜູ້ກ່ຽວເປັນເຄືອຂ່າຍດຽວກັນກັບ ທ້າວ ອັອດ ໄຊຍະວົງ ຄົນງານລາວໃນໄທທີ່ຫາຍສາບສູນ ໄປກ່ອນໜ້ານີ້ ແລະຍັງເປັນ ກຸ່ມດຽວກັນກັບ ຄົນງານລາວ 3 ຄົນ ທີ່ຖືກຕັດສິນຈໍາຄຸກ ຢູ່ລາວຄື ທ້າວ ສົມພອນ ພິມມະສອນ, ທ້າວ ສຸກັນ ໃຈທັດ ແລະ ນາງຫຼອດຄໍາ ທັມມະວົງ ທີ່ຖືກຈັບໃນຂໍ້ຫາ ໃສ່ຮ້າຍປ້າຍສີ ພັກຣັດ.
ໜີ້ດອກເບ້ຍຕ່ຳ ໄລຍະຍາວ, ຣັຖບານຊຸດນີ້ໃຊ້ບໍ່ໝົດກໍ່ມອບໃຫ້ເປັນພາລະ
ຂອງຣັຖບານລຸ້ນຫລານ ລຸ້ນເຫຼັນ ລຸ້ນຫລ້ອນ.
