ລາວໂຮມລາວ ເພື່ອປະຊາທິປະໄຕ

ເພື່ອເຮັດໃຫ້ຊີວິການເປັນຢູ່ຂອງພໍ່ແມ່ປະຊາຊົນລາວ ໂດຍສະເພາະກໍແມ່ນເດັກນ້ອຍຜູ້ທີ່ຈະເປັນອະນາຄົດຂອງຊາດ ໄດ້ມີຊີວິດ, ສຸຂະພາບ ພາລະນາໄມທີ່ສົມບູນຕັ້ງແຕ່ຍັງນ້ອຍ ຜູ້ທີ່ເປັນພໍ່ແມ່ຕ້ອງໄດ້ມີຊີວິດ, ອາຊີບທີ່ດີ ສາມາດກຸ້ມຕົນເອງ ແລະ ລ້ຽງພວກເຂົາເຫຼົ່ານັ້ນໃຫ້ເຕີບໃຫຍ່ຢ່າງເຕັມທີ່ ແລະ ສົມບູນ.

ເພື່ອສູ້ຊົນເຮັດໃຫ້ປະເທດເຮົາຫຼຸດພົ້ນອອກຈາກຄວາມທຸກຍາກໃຫ້ໄວທີ່ສຸດ ລັດຖະບານໄດ້ຫາທຸກຊ່ອງທາງຊ່ວຍພໍ່ແມ່ປະຊາຊົນ ຫຼ້າສຸດນີ້ໄດ້ກູ້ຢືມເງິນເພີ່ມຈາກທະນາຄານໂລກ ກໍ່ຄືຈາກ ສະມາຄົມເພື່ອການພັດທະນາສາກົນ (IDA), ທີ່ຖືກສ້າງຕັ້ງຂຶ້ນ ໃນປີ 1960, ເພື່ອຊ່ວຍເຫຼືອປະເທດ ທີ່ທຸກຍາກທີ່ສຸດໃນໂລກ ໂດຍການສະໜອງທຶນຊ່ວຍເຫຼືອລ້າ, ທຶນກູ້ຢືມໃນອັດຕາດອກເບ້ຍຕໍ່າ ແລະ ບໍ່ມີດອກເບ້ຍ ສໍາລັບໂຄງການ ແລະ ແຜນງານຕ່າງໆ ເພື່ອສະໜັບສະໜູນການເຕີບໂຕທາງເສດຖະກິດ, ຫຼຸດຜ່ອນຄວາມທຸກຍາກ ແລະ ປັບປຸງຊີວິດການເປັນຢູ່ ຂອງປະຊາຊົນ.

ກະຊວງການເງິນ ແລະ ທະນາຄານໂລກ ໄດ້ມີພິທີລົງນາມເຊັນສັນຍາ ການສະໜອງທຶນກູ້ຢືມເພີ່ມ ຈໍານວນ 22,5 ລ້ານໂດລາສະຫະລັດ ໃສ່ກອງທຶນຫຼຸດຜ່ອນຄວາມທຸກຍາກ ຫຼື ທລຍ ເພື່ອການຫຼຸດຜ່ອນຄວາມທຸກຍາກ ແລະ ພາວະເຕ້ຍເກີນມາດຕະຖານຂອງເດັກ ໃນ 12 ເມືອງບູລິມະສິດຂອງ 4 ແຂວງພາກເໜືອຄື: ຜົ້ງສາລີ, ຊຽງຂວາງ, ຫົວພັນ ແລະ ອຸດົມໄຊ

ໂດຍມີ ທ່ານ ບຸນໂຈມ ອຸບົນປະເສີດ, ຮອງລັດຖະມົນຕີ, ກະຊວງການເງິນ ແລະ ທ່ານ ນິໂກລາ ປອນຕາຣາ, ຫົວໜ້າຫ້ອງການທະນາຄານໂລກ ປະຈໍາ ສປປ ລາວ ໄດ້ຮ່ວມກັນລົງນາມສັນຍາ;

ການສະໜອງທຶນກູ້ຢືມເພີ່ມ ໄດ້ຮັບການອະນຸມັດ ຈາກສະພາບໍລິຫານ ຂອງທະນາຄານໂລກ ໃນວັນທີ 2 ທັນວາ 2019 ຜ່ານມາ ເພື່ອສະໜັບສະໜູນການຈັດຕັ້ງປະຕິບັດແຜນຍຸດທະສາດດ້ານໂພຊະນາການແຫ່ງຊາດ ຂອງລັດຖະບານ ແຫ່ງ ສປປ ລາວ ຊຶ່ງຈະສຸມໃສ່ ພື້ນຖານໂຄງລ່າງ, ການຊ່ວຍເຫຼືອດ້ານໂພຊະນາການ ໃຫ້ແກ່ແມ່ຍິງຖືພາ ແລະ ເດັກອ່ອນ, ແລະກິດຈະກໍາສ້າງລາຍຮັບຕ່າງໆ ໃຫ້ແກ່ກຸ່ມຜະລິດສະບຽງອາຫານຕ່າງໆ ໃນນັ້ນ ທລຍ ຈະຂະຫຍາຍການຈັດຕັ້ງປະຕິບັດ ກິດຈະກໍາເຫຼົ່ານີ້ ໃນຕົ້ນປີ 2020